अभ्यतिरिच्येत : फ़्न् एमेन्देद्। एद्।: अभ्यतिरिच्यते अथैषो ऽदाभ्यो देवाश् च वा असुराश् चास्पर्धन्त ते देवा एतम् अपश्यंस् तम् अगृह्णत तान् असुरा नादभ्नुवंस् तद् अदाभ्यस्यादाभ्यत्वं नैनं भ्रातृव्यो दभ्नोति य एतं गृह्णीते घ्नन्ति वा एतत् सोमं यद् अभिषुण्वन्त्य् एषा वै सोमस्यातिमोक्षिणी तनूर् यान् एतान् अंशून् प्रवृहन्त्य् एवं वा एतं लोकं यजमानो ऽन्वतिमुच्यते वि वा एतद् यज्ञश् छिद्यते यत् सवनानि संतिष्ठन्ते यद् एतान् अंशून् पुनर् अप्यस्यति यज्ञस्य संतत्या अविछेदाय वृष्ट्यै वा एष गृह्यते मरुन्नामानि हि वर्षति पर्जन्यो यत्रैष गृह्यते ऽग्निः प्रातःसवनात् पात्व् अस्मान् इति सवनानि वा एतेन देवा असुराणाम् अवृञ्जत सवनान्य् एवैतेन यजमानो भ्रातृव्यस्य वृङ्क्ते ऽग्नये त्वा प्रवृहामि गायत्रेण छन्दसेति छन्दांसि च वा एतेन देवताश् च देवा असुराणाम् अवृञ्जत छन्दांसि चैवैतेन देवताश् च यजमानो भ्रातृव्यस्य वृङ्क्ते चतुर् आधूनोति दिशो वा एतेन देवा असुराणाम् अवृञ्जत दिश एवैतेन यजमानो भ्रातृव्यस्य वृङ्क्ते जीवग्रहो वा एष सोमस्याहुतस्य ह्य् अनभिषुतस्य गृह्यते यजुषा च वा आहुत्या च यज्ञः संततो यद् यजुर् वदन्न् आहुतिं जुहोति यजुषा चैवाहुत्या च यज्ञं संतनोति देवा वै सोमम् अगृह्णत स प्रजापतिर् अवेद् यो वा इह प्रथमः सोमं ग्रहीष्यते स इदं भविष्यतीति स एतम् अगृह्णीत सो ऽभवद् यो भूतिकामः स्यात् स एतं गृह्णीते भवति यदि शक्नोति ग्रहीतुम् उभौ भवतो यदि न शक्नोति ग्रहीतुम् उभौ न भवतः पराचीनेन प्राणता ग्रहीतव्यः पराङ् हि स प्राणैः श्रियो ऽन्तम् अगछद् अपानता ग्रहीतव्यो ऽपानं हि स तम् अगृह्णीत प्राण्यापान्याव्यवानता ग्रहीतव्यो ऽव्यवानं हि स तम् अगृह्णीत यद् व्यवानेत् प्राणान् विछिन्द्याद् यदि व्यवानेद् धिरण्येनापिदध्याद् अमृतं वै हिरण्यम् अमृतेनैव प्राणान्त् संदधाति सकृद् अभिषुणोति सकृद् गृह्णात्य् एको वै प्रजापतिः प्रजापतिम् एवाप्नोति चतुःस्रक्तिना ग्रहीतव्यश् चतुःस्रक्तिना वा एतं प्रजापतिर् अगृह्णीत स सर्वासु दिक्ष्व् आर्ध्नोत् स सर्वासु दिक्ष्व् ऋध्नोति य एवं विद्वान् एतं चतुःस्रक्तिना गृह्णीते ऽपो वै सोमस्य रसः प्रविष्टः सोमम् अपां रसो यथा वा इदं गावौ संजग्माने अन्यान्यां हत एवं वा एतौ संजग्माना अन्यो ऽन्यस्येन्द्रियं वीर्यं विनिर्हतस् तयोर् वा एष रसो यद् दधि यद् दध्ना जुहोति स्वेनैवैनौ रसेन शमयति
abhyatiricyeta : FN emended. Ed.: abhyatiricyate athaiṣo 'dābhyo devāś ca vā asurāś cāspardhanta te devā etam apaśyaṃs tam agṛhṇata tān asurā nādabhnuvaṃs tad adābhyasyādābhyatvaṃ nainaṃ bhrātṛvyo dabhnoti ya etaṃ gṛhṇīte ghnanti vā etat somaṃ yad abhiṣuṇvanty eṣā vai somasyātimokṣiṇī tanūr yān etān aṃśūn pravṛhanty evaṃ vā etaṃ lokaṃ yajamāno 'nvatimucyate vi vā etad yajñaś chidyate yat savanāni saṃtiṣṭhante yad etān aṃśūn punar apyasyati yajñasya saṃtatyā avichedāya vṛṣṭyai vā eṣa gṛhyate marunnāmāni hi varṣati parjanyo yatraiṣa gṛhyate 'gniḥ prātaḥsavanāt pātv asmān iti savanāni vā etena devā asurāṇām avṛñjata savanāny evaitena yajamāno bhrātṛvyasya vṛṅkte 'gnaye tvā pravṛhāmi gāyatreṇa chandaseti chandāṃsi ca vā etena devatāś ca devā asurāṇām avṛñjata chandāṃsi caivaitena devatāś ca yajamāno bhrātṛvyasya vṛṅkte catur ādhūnoti diśo vā etena devā asurāṇām avṛñjata diśa evaitena yajamāno bhrātṛvyasya vṛṅkte jīvagraho vā eṣa somasyāhutasya hy anabhiṣutasya gṛhyate yajuṣā ca vā āhutyā ca yajñaḥ saṃtato yad yajur vadann āhutiṃ juhoti yajuṣā caivāhutyā ca yajñaṃ saṃtanoti devā vai somam agṛhṇata sa prajāpatir aved yo vā iha prathamaḥ somaṃ grahīṣyate sa idaṃ bhaviṣyatīti sa etam agṛhṇīta so 'bhavad yo bhūtikāmaḥ syāt sa etaṃ gṛhṇīte bhavati yadi śaknoti grahītum ubhau bhavato yadi na śaknoti grahītum ubhau na bhavataḥ parācīnena prāṇatā grahītavyaḥ parāṅ hi sa prāṇaiḥ śriyo 'ntam agachad apānatā grahītavyo 'pānaṃ hi sa tam agṛhṇīta prāṇyāpānyāvyavānatā grahītavyo 'vyavānaṃ hi sa tam agṛhṇīta yad vyavānet prāṇān vichindyād yadi vyavāned dhiraṇyenāpidadhyād amṛtaṃ vai hiraṇyam amṛtenaiva prāṇānt saṃdadhāti sakṛd abhiṣuṇoti sakṛd gṛhṇāty eko vai prajāpatiḥ prajāpatim evāpnoti catuḥsraktinā grahītavyaś catuḥsraktinā vā etaṃ prajāpatir agṛhṇīta sa sarvāsu dikṣv ārdhnot sa sarvāsu dikṣv ṛdhnoti ya evaṃ vidvān etaṃ catuḥsraktinā gṛhṇīte 'po vai somasya rasaḥ praviṣṭaḥ somam apāṃ raso yathā vā idaṃ gāvau saṃjagmāne anyānyāṃ hata evaṃ vā etau saṃjagmānā anyo 'nyasyendriyaṃ vīryaṃ vinirhatas tayor vā eṣa raso yad dadhi yad dadhnā juhoti svenaivainau rasena śamayati
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.