उच्यते - यो ऽर्थात् प्राप्तः स्यात्, स यत्र प्रयोजनं तत्रैव क्रियेत। शब्देन तु सर्वे ऽमी पदार्था विहिताः, तेन न, यत्र केवलं प्रयोजनं प्रत्यक्षं दृश्यते, तत्रैव कर्तव्याह्। क्व तर्हि? यत्र यत्र विहिताः, ते चामी सर्वत्र विहिताः गम्यन्ते। कुतः? संयोगतो ऽविशेषात् प्रकरणाविशेषाच् च। सर्वेषां तावद् आज्यौषधसान्नाय्यानाम् अपूर्वेण साध्यसाधनसंयोगो ऽविशिष्टः, यत्र क्रियमाणा अपूर्वस्य कृता भवतीति विज्ञायते। तथा प्रकरणम् अविशिष्टम्, यस्मिन् विहिताः सर्वेषां विहिता भवन्तीति गम्यते। अतः सर्वे सर्वत्र कर्तव्याः, यत् त्व् अमी न सर्वत्रोपकुर्वन्तीति, विधानसामर्थ्यात् सर्वत्रोपकारका इति गम्यते। स चायम् अदृष्ट उपकारो भविष्यति। अर्थलोपाद् अकर्म स्यात्
ucyate - yo 'rthāt prāptaḥ syāt, sa yatra prayojanaṃ tatraiva kriyeta. śabdena tu sarve 'mī padārthā vihitāḥ, tena na, yatra kevalaṃ prayojanaṃ pratyakṣaṃ dṛśyate, tatraiva kartavyāh. kva tarhi? yatra yatra vihitāḥ, te cāmī sarvatra vihitāḥ gamyante. kutaḥ? saṃyogato 'viśeṣāt prakaraṇāviśeṣāc ca. sarveṣāṃ tāvad ājyauṣadhasānnāyyānām apūrveṇa sādhyasādhanasaṃyogo 'viśiṣṭaḥ, yatra kriyamāṇā apūrvasya kṛtā bhavatīti vijñāyate. tathā prakaraṇam aviśiṣṭam, yasmin vihitāḥ sarveṣāṃ vihitā bhavantīti gamyate. ataḥ sarve sarvatra kartavyāḥ, yat tv amī na sarvatropakurvantīti, vidhānasāmarthyāt sarvatropakārakā iti gamyate. sa cāyam adṛṣṭa upakāro bhaviṣyati. arthalopād akarma syāt
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.