इमाश् शक्तयो ऽयम् आत्मेत्य् एवं विकल्पजालं व्यवहारार्थं धीमद्भिः परिकल्पितं लोके न त्व् आत्मनि विद्यते भेदः । यथोर्मितरङ्गैः पयसां कटकाङ्गदकेयूरैर् वा हेम्नः अवयवावयविनोस् संवित् काल्पनिकी द्विधा न वास्तवी । यथा यच् चेत्यते तथैव तन् न बाह्यतो नान्तरतश् चेतनं समुदेति हि । सर्वात्मत्वात् स्वम् आभासं क्वचित् किञ्चित् प्रपश्यति सर्वाकारमयं ब्रह्मैवेदं तत्र मिथ्याज्ञानवद्भिश् शक्तिशक्तिमत्ते अवयवावयविरूपे कल्पिते न पारमार्थिके सद् वा भवत्व् असद् वा चिद् यत् सङ्कल्पयत्य् अभिनिविष्टा तत् तत्पश्यति सकलं तत् तत् सद्वस्तुवद् भाति
imāś śaktayo 'yam ātmety evaṃ vikalpajālaṃ vyavahārārthaṃ dhīmadbhiḥ parikalpitaṃ loke na tv ātmani vidyate bhedaḥ | yathormitaraṅgaiḥ payasāṃ kaṭakāṅgadakeyūrair vā hemnaḥ avayavāvayavinos saṃvit kālpanikī dvidhā na vāstavī | yathā yac cetyate tathaiva tan na bāhyato nāntarataś cetanaṃ samudeti hi | sarvātmatvāt svam ābhāsaṃ kvacit kiñcit prapaśyati sarvākāramayaṃ brahmaivedaṃ tatra mithyājñānavadbhiś śaktiśaktimatte avayavāvayavirūpe kalpite na pāramārthike sad vā bhavatv asad vā cid yat saṅkalpayaty abhiniviṣṭā tat tatpaśyati sakalaṃ tat tat sadvastuvad bhāti
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.