स्नात्वा सचैलः स्पृष्ट्वाग्निं घृतं प्राश्य विशुध्यति ॥ म्न् ५।१०३[१०२म्] ॥ न विप्रं स्वेषु तिष्ठत्सु मृतं शूद्रेण नाययेत् । अस्वर्ग्या ह्य् आहुतिः सा स्याच् छूद्रसंस्पर्शदूषिता ॥ म्न् ५।१०४[१०३म्] ॥ ज्ञानं तपो ऽग्निर् आहारो मृन् मनो वार्य् उपाञ्जनम् । वायुः कर्मार्ककालौ च शुद्धेः कर्तॄणि देहिनाम् ॥ म्न् ५।१०५[१०४म्] ॥ सर्वेषाम् एव शौचानाम् अर्थशौचं परं स्मृतं । यो ऽर्थे शुचिर् हि स शुचिर् न मृद्वारिशुचिः शुचिः ॥ म्न् ५।१०६[१०५म्] ॥ क्षान्त्या शुध्यन्ति विद्वांसो दानेनाकार्यकारिणः । प्रच्छन्नपापा जप्येन तपसा वेदवित्तमाः ॥ म्न् ५।१०७[१०६म्] ॥ मृत्तोयैः शुध्यते शोध्यं नदी वेगेन शुध्यति । रजसा स्त्री मनोदुष्टा संन्यासेन द्विजोत्तमाः ॥ म्न् ५।१०८[१०७म्] ॥ अद्भिर् गात्राणि शुध्यन्ति मनः सत्येन शुध्यति । विद्यातपोभ्यां भूतात्मा बुद्धिर् ज्ञानेन शुध्यति ॥ म्न् ५।१०९[१०८म्] ॥ एष शौचस्य वः प्रोक्तः शरीरस्य विनिर्णयः । नानाविधानां द्रव्याणां शुद्धेः शृणुत निर्णयम् ॥ म्न् ५।११०[१०९म्] ॥ तैजसानां मणीनां च सर्वस्याश्ममयस्य च । भस्मनाद्भिर् मृदा चैव शुद्धिर् उक्ता मनीषिभिः ॥ म्न् ५।१११[११०म्] ॥ निर्लेपं काञ्चनं भाण्डम् अद्भिर् एव विशुध्यति । अब्जम् अश्ममयं चैव राजतं चानुपस्कृतम् ॥ म्न् ५।११२[१११म्] ॥ अपाम् अग्नेश् च संयोगाद् धैमं रौप्यं च निर्बभौ । तस्मात् तयोः स्वयोन्यैव निर्णेको गुणवत्तरः ॥ म्न् ५।११३[११२म्] ॥ ताम्रायःकांस्यरैत्यानां त्रपुणः सीसकस्य च । शौचं यथार्हं कर्तव्यं क्षाराम्लोदकवारिभिः ॥ म्न् ५।११४[११३म्] ॥ द्रवाणां चैव सर्वेषां शुद्धिर् उत्पवनं स्मृतम् । प्रोक्षणं संहतानां च दारवाणां च तक्षणम् ॥ म्न् ५।११५[११४म्] ॥ मार्जनं यज्ञपात्राणां पाणिना यज्ञकर्मणि । चमसानां ग्रहाणां च शुद्धिः प्रक्षालनेन तु ॥ म्न् ५।११६[११५म्] ॥ चरूणां स्रुक्स्रुवाणां च शुद्धिर् उष्णेन वारिणा । स्फ्यशूर्पशकटानां च मुसलोलूखलस्य च ॥ म्न् ५।११७[११६म्] ॥ अद्भिस् तु प्रोक्षणं शौचं बहूनां धान्यवाससाम् । प्रक्षालनेन त्व् अल्पानाम् अद्भिः शौचं विधीयते ॥ म्न् ५।११८[११७म्] ॥ चैलवच् चर्मणां शुद्धिर् वैदलानां तथैव च । शाकमूलफलानां च धान्यवच् छुद्धिर् इष्यते ॥ म्न् ५।११९[११८म्] ॥ कौशेयाविकयोर् ऊषैः कुतपानाम् अरिष्टकैः । श्रीफलैर् अंशुपट्टानां क्षौमाणां गौरसर्षपैः ॥ म्न् ५।१२०[११९म्] ॥ क्षौमवच् छङ्खशृङ्गाणाम् अस्थिदन्तमयस्य च । शुद्धिर् विजानता कार्या गोमूत्रेणोदकेन वा ॥ म्न् ५।१२१[१२०म्] ॥ प्रोक्षणात् तृणकाष्ठं च पलालं चैव शुध्यति । मार्जनोपाञ्जनैर् वेश्म पुनःपाकेन मृन्मयम् ॥ म्न् ५।१२२[१२१म्] ॥ मद्यैर् मूत्रैः पुरीषैर् वा ष्ठीवनैह् पूयशोणितैः । संस्पृष्टं नैव शुद्ध्येत पुनःपाकेन मृन्मयम्
snātvā sacailaḥ spṛṣṭvāgniṃ ghṛtaṃ prāśya viśudhyati // Mn 5.103[102M] // na vipraṃ sveṣu tiṣṭhatsu mṛtaṃ śūdreṇa nāyayet / asvargyā hy āhutiḥ sā syāc chūdrasaṃsparśadūṣitā // Mn 5.104[103M] // jñānaṃ tapo 'gnir āhāro mṛn mano vāry upāñjanam / vāyuḥ karmārkakālau ca śuddheḥ kartṝṇi dehinām // Mn 5.105[104M] // sarveṣām eva śaucānām arthaśaucaṃ paraṃ smṛtaṃ / yo 'rthe śucir hi sa śucir na mṛdvāriśuciḥ śuciḥ // Mn 5.106[105M] // kṣāntyā śudhyanti vidvāṃso dānenākāryakāriṇaḥ / pracchannapāpā japyena tapasā vedavittamāḥ // Mn 5.107[106M] // mṛttoyaiḥ śudhyate śodhyaṃ nadī vegena śudhyati / rajasā strī manoduṣṭā saṃnyāsena dvijottamāḥ // Mn 5.108[107M] // adbhir gātrāṇi śudhyanti manaḥ satyena śudhyati / vidyātapobhyāṃ bhūtātmā buddhir jñānena śudhyati // Mn 5.109[108M] // eṣa śaucasya vaḥ proktaḥ śarīrasya vinirṇayaḥ / nānāvidhānāṃ dravyāṇāṃ śuddheḥ śṛṇuta nirṇayam // Mn 5.110[109M] // taijasānāṃ maṇīnāṃ ca sarvasyāśmamayasya ca / bhasmanādbhir mṛdā caiva śuddhir uktā manīṣibhiḥ // Mn 5.111[110M] // nirlepaṃ kāñcanaṃ bhāṇḍam adbhir eva viśudhyati / abjam aśmamayaṃ caiva rājataṃ cānupaskṛtam // Mn 5.112[111M] // apām agneś ca saṃyogād dhaimaṃ raupyaṃ ca nirbabhau / tasmāt tayoḥ svayonyaiva nirṇeko guṇavattaraḥ // Mn 5.113[112M] // tāmrāyaḥkāṃsyaraityānāṃ trapuṇaḥ sīsakasya ca / śaucaṃ yathārhaṃ kartavyaṃ kṣārāmlodakavāribhiḥ // Mn 5.114[113M] // dravāṇāṃ caiva sarveṣāṃ śuddhir utpavanaṃ smṛtam / prokṣaṇaṃ saṃhatānāṃ ca dāravāṇāṃ ca takṣaṇam // Mn 5.115[114M] // mārjanaṃ yajñapātrāṇāṃ pāṇinā yajñakarmaṇi / camasānāṃ grahāṇāṃ ca śuddhiḥ prakṣālanena tu // Mn 5.116[115M] // carūṇāṃ sruksruvāṇāṃ ca śuddhir uṣṇena vāriṇā / sphyaśūrpaśakaṭānāṃ ca musalolūkhalasya ca // Mn 5.117[116M] // adbhis tu prokṣaṇaṃ śaucaṃ bahūnāṃ dhānyavāsasām / prakṣālanena tv alpānām adbhiḥ śaucaṃ vidhīyate // Mn 5.118[117M] // cailavac carmaṇāṃ śuddhir vaidalānāṃ tathaiva ca / śākamūlaphalānāṃ ca dhānyavac chuddhir iṣyate // Mn 5.119[118M] // kauśeyāvikayor ūṣaiḥ kutapānām ariṣṭakaiḥ / śrīphalair aṃśupaṭṭānāṃ kṣaumāṇāṃ gaurasarṣapaiḥ // Mn 5.120[119M] // kṣaumavac chaṅkhaśṛṅgāṇām asthidantamayasya ca / śuddhir vijānatā kāryā gomūtreṇodakena vā // Mn 5.121[120M] // prokṣaṇāt tṛṇakāṣṭhaṃ ca palālaṃ caiva śudhyati / mārjanopāñjanair veśma punaḥpākena mṛnmayam // Mn 5.122[121M] // madyair mūtraiḥ purīṣair vā ṣṭhīvanaih pūyaśoṇitaiḥ / saṃspṛṣṭaṃ naiva śuddhyeta punaḥpākena mṛnmayam
Devanagari rendered by HREEM from the edition's roman (IAST) text; the IAST is the edition's own.
Sanskrit only: no published translation is held for this verse.