Narahari: Bodhasara 14.8

अथ सप्तमी ततः षष्ठीमतिक्रम्य तुरीयां याति सप्तमीम् । महाकक्षेति सैवोक्ता सैव गूढसुषुप्तिका

atha saptamī tataḥ ṣaṣṭhīmatikramya turīyāṃ yāti saptamīm / mahākakṣeti saivoktā saiva gūḍhasuṣuptikā

Sanskrit only: no published translation is held for this verse.

योगनिद्रेति सा प्रोक्ता परा काष्ठेति सा स्मृता । अनुत्तरं च सहजं स्वरूपस्थितिरित्यपि

yoganidreti sā proktā parā kāṣṭheti sā smṛtā / anuttaraṃ ca sahajaṃ svarūpasthitirityapi

Sanskrit only: no published translation is held for this verse.

मौनमेवावलम्बन्ते यस्यां हरिहरादयः । सा तु वर्णयितुं शक्या न केनापि कदाचन

maunamevāvalambante yasyāṃ hariharādayaḥ / sā tu varṇayituṃ śakyā na kenāpi kadācana

Sanskrit only: no published translation is held for this verse.

चिदङ्गे कोमले लग्नो दैवादज्ञानकण्टकः । तं बोधकण्टकेनायं विनिवार्य सुखं स्थितः

cidaṅge komale lagno daivādajñānakaṇṭakaḥ / taṃ bodhakaṇṭakenāyaṃ vinivārya sukhaṃ sthitaḥ

Sanskrit only: no published translation is held for this verse.

अमृतजलधौ यस्मिन्वार्त्ता न मीनतरंगयोर् न च परिचयः पारावारस्थितेरपि कुत्रचित् । समरसपरब्रह्मानन्दप्रणुन्नविकल्पनः सहजगलितद्वैतज्वालः स भाति महामुनिः

amṛtajaladhau yasminvārttā na mīnataraṃgayor na ca paricayaḥ pārāvārasthiterapi kutracit / samarasaparabrahmānandapraṇunnavikalpanaḥ sahajagalitadvaitajvālaḥ sa bhāti mahāmuniḥ

Sanskrit only: no published translation is held for this verse.

बंधध्वंसमभीप्सुना सुमनसा जिज्ञासया तीव्रया ज्ञाते ब्रह्मणि बाधिताक्षविषये बोधे चमत्कुर्वति । स्वान्तर्मन्तृविमानमान्यविवृतिव्यावृत्तिनिर्भङ्गको भाति ज्ञानसुखात्मकः स्वयमयं योग्यापगानां पतिः

baṃdhadhvaṃsamabhīpsunā sumanasā jijñāsayā tīvrayā jñāte brahmaṇi bādhitākṣaviṣaye bodhe camatkurvati / svāntarmantṛvimānamānyavivṛtivyāvṛttinirbhaṅgako bhāti jñānasukhātmakaḥ svayamayaṃ yogyāpagānāṃ patiḥ

Sanskrit only: no published translation is held for this verse.

वाचा मौनमयी गतिः स्थितिमयी निद्रामयो जागरो निद्रा बोधमयी निशा दिनमयी नक्तंमयो वासरः । कर्म ब्रह्ममयं जगत्सुखमयं किञ्चिन्न किञ्चिन्मयं दुर्लङ्घ्यं गुणवर्त्म लङ्घितवतो वार्त्ता कथं वर्ण्यताम्

vācā maunamayī gatiḥ sthitimayī nidrāmayo jāgaro nidrā bodhamayī niśā dinamayī naktaṃmayo vāsaraḥ / karma brahmamayaṃ jagatsukhamayaṃ kiñcinna kiñcinmayaṃ durlaṅghyaṃ guṇavartma laṅghitavato vārttā kathaṃ varṇyatām

Sanskrit only: no published translation is held for this verse.

अत्यन्तहीनो बलपौरुषाभ्याम् अकिंचनो यो गलिताभिमानः । तेनैव नीता रिपवो विनाशं न ये हतास्तात महेन्द्रमुख्यैः

atyantahīno balapauruṣābhyām akiṃcano yo galitābhimānaḥ / tenaiva nītā ripavo vināśaṃ na ye hatāstāta mahendramukhyaiḥ

Sanskrit only: no published translation is held for this verse.

ब्रह्मविद्ब्रह्मविद्यायां भवान्यां पुत्रतां गतः । निजाङ्गे लालयत्येनं परमात्मा सदाशिवः

brahmavidbrahmavidyāyāṃ bhavānyāṃ putratāṃ gataḥ / nijāṅge lālayatyenaṃ paramātmā sadāśivaḥ

Sanskrit only: no published translation is held for this verse.