Narasimha-Purana 15

श्रोतुम् इच्छाम्य् अहं तात सांप्रतं मुनिभिः सह । संसारवृक्षं सकलं येनेदं परिवर्तते

śrotum icchāmy ahaṃ tāta sāṃprataṃ munibhiḥ saha / saṃsāravṛkṣaṃ sakalaṃ yenedaṃ parivartate

Sanskrit only: no published translation is held for this verse.

वक्तुम् अर्हसि मे तात त्वयैतत् सूचितं पुरा । नान्यो वेत्ति महाभाग संसारोच्चारलक्षणम्

vaktum arhasi me tāta tvayaitat sūcitaṃ purā / nānyo vetti mahābhāga saṃsāroccāralakṣaṇam

Sanskrit only: no published translation is held for this verse.

स पुत्रेणैवम् उक्तस् तु शिष्याणां मध्यगेन च । कृष्णद्वैपायनः प्राह संसारतरुलक्षणम्

sa putreṇaivam uktas tu śiṣyāṇāṃ madhyagena ca / kṛṣṇadvaipāyanaḥ prāha saṃsāratarulakṣaṇam

Sanskrit only: no published translation is held for this verse.

शृण्वन्तु शिष्याः सकला वत्स त्वं शृणु भावितः । संसारवृक्षं वक्ष्यामि येन चेदं समावृतम्

śṛṇvantu śiṣyāḥ sakalā vatsa tvaṃ śṛṇu bhāvitaḥ / saṃsāravṛkṣaṃ vakṣyāmi yena cedaṃ samāvṛtam

Sanskrit only: no published translation is held for this verse.

अव्यक्तमूलप्रभवस् तस्माद् अग्रे तथोत्थितः । बुद्धिस्कन्धमयश् चैव इन्द्रियाङ्करकोटरः

avyaktamūlaprabhavas tasmād agre tathotthitaḥ / buddhiskandhamayaś caiva indriyāṅkarakoṭaraḥ

Sanskrit only: no published translation is held for this verse.

महाभूतविशाखश् च विशेषैः पत्त्रशाखवान् । धर्माधर्मसुपुष्पश् च सुखदुःखफलोदयः

mahābhūtaviśākhaś ca viśeṣaiḥ pattraśākhavān / dharmādharmasupuṣpaś ca sukhaduḥkhaphalodayaḥ

Sanskrit only: no published translation is held for this verse.

आजीव्यः सर्वभूतानां ब्रह्मवृक्षः सनातनः । एतद् ब्रह्म परं चैव ब्रह्म वृक्षस्य तस्य तत्

ājīvyaḥ sarvabhūtānāṃ brahmavṛkṣaḥ sanātanaḥ / etad brahma paraṃ caiva brahma vṛkṣasya tasya tat

Sanskrit only: no published translation is held for this verse.

इत्य् एवं कथितं वत्स संसारवृक्षलक्षणम् । वृक्षं एनं समारूढा मोहम् आयान्ति देहिनः

ity evaṃ kathitaṃ vatsa saṃsāravṛkṣalakṣaṇam / vṛkṣaṃ enaṃ samārūḍhā moham āyānti dehinaḥ

Sanskrit only: no published translation is held for this verse.

संसरन्तीह सततं सुखदुःखसमन्विताः । प्रायेण प्राकृता मर्त्या ब्रह्मज्ञानपराङ्मुखाः

saṃsarantīha satataṃ sukhaduḥkhasamanvitāḥ / prāyeṇa prākṛtā martyā brahmajñānaparāṅmukhāḥ

Sanskrit only: no published translation is held for this verse.

छित्त्वैनं कृतिनो यान्ति नो यान्ति ब्रह्मज्ञानिनः । कर्मक्रिये महाप्राज्ञ नैनं छिन्दन्ति दुष्कृताः

chittvainaṃ kṛtino yānti no yānti brahmajñāninaḥ / karmakriye mahāprājña nainaṃ chindanti duṣkṛtāḥ

Sanskrit only: no published translation is held for this verse.

एनं छित्त्वा च भित्त्वा च ज्ञानेन परमासिना । ततो ऽमरत्वं ते यान्ति यस्मान् नावर्तते पुनः

enaṃ chittvā ca bhittvā ca jñānena paramāsinā / tato 'maratvaṃ te yānti yasmān nāvartate punaḥ

Sanskrit only: no published translation is held for this verse.

देहदारमयैः पाशैर् दृढं बद्धो ऽपि मुच्यते । ज्ञानम् एव परं पुंसां श्रेयसाम् अभिवाञ्छितम् । तोषणं नरसिंहस्य ज्ञानहीनः पशुः पुमान्

dehadāramayaiḥ pāśair dṛḍhaṃ baddho 'pi mucyate / jñānam eva paraṃ puṃsāṃ śreyasām abhivāñchitam / toṣaṇaṃ narasiṃhasya jñānahīnaḥ paśuḥ pumān

Sanskrit only: no published translation is held for this verse.

आहारनिद्राभयमैथुनानि समानम् एतत् पशुभिर् नराणाम् । ज्ञानं नराणाम् अधिकं हि लोके ज्ञानेन हीनाः पशुभिः समानाः

āhāranidrābhayamaithunāni samānam etat paśubhir narāṇām / jñānaṃ narāṇām adhikaṃ hi loke jñānena hīnāḥ paśubhiḥ samānāḥ

Sanskrit only: no published translation is held for this verse.