Pañcaviṃśa (Tāṇḍya) Brāhmaṇa of the Sāmaveda (in part) 14.5

यस् ते मदो वरेण्य इति गायत्री भवति मदवद् वै रसवत् तृतीयसवनं मदम् एव तद् रसं दधाति

yas te mado vareṇya iti gāyatrī bhavati madavad vai rasavat tṛtīyasavanaṃ madam eva tad rasaṃ dadhāti

Sanskrit only: no published translation is held for this verse.

एष स्य धारया सुत इति ककुभः सत्यो ऽभ्यारम्भेण त्रिष्टुभः

eṣa sya dhārayā suta iti kakubhaḥ satyo 'bhyārambheṇa triṣṭubhaḥ

Sanskrit only: no published translation is held for this verse.

अपभ्रंश इव वा एष यत् ज्यायसः स्तोमात् कनीयांसं स्तोमम् उपयन्ति यद् एता अभ्यारम्भेण त्रिष्टुभो भवन्त्य् अह्न एव प्रत्युत्तम्भाय

apabhraṃśa iva vā eṣa yat jyāyasaḥ stomāt kanīyāṃsaṃ stomam upayanti yad etā abhyārambheṇa triṣṭubho bhavanty ahna eva pratyuttambhāya

Sanskrit only: no published translation is held for this verse.

सखाय आनिषीदतेति वालखिल्या वालखिल्याव् एतौ तृचौ षष्ठे चाहनि सप्तमे च यद् एतौ वालखिल्यौ तृचौ भवतो ऽह्नोर् एव व्यतिषङ्गायाव्यवस्रंसाय सन्तत्यै

sakhāya āniṣīdateti vālakhilyā vālakhilyāv etau tṛcau ṣaṣṭhe cāhani saptame ca yad etau vālakhilyau tṛcau bhavato 'hnor eva vyatiṣaṅgāyāvyavasraṃsāya santatyai

Sanskrit only: no published translation is held for this verse.

पुरोजिती वो अन्धस इति विराड् अन्नं विराड् अन्नाद्यस्यावरुद्ध्यै

purojitī vo andhasa iti virāḍ annaṃ virāḍ annādyasyāvaruddhyai

Sanskrit only: no published translation is held for this verse.

प्र वाज्य् अक्षार् इत्य् अक्षरपङ्क्तिः स्तोमानां प्रभूतिः

pra vājy akṣār ity akṣarapaṅktiḥ stomānāṃ prabhūtiḥ

Sanskrit only: no published translation is held for this verse.

अथो एतद्ध्येवैतर्हि छन्दो ऽयातयाम यद् अक्षरपङ्क्तिस् तेन छन्दोमा अयातयामानः क्रियन्ते

atho etaddhyevaitarhi chando 'yātayāma yad akṣarapaṅktis tena chandomā ayātayāmānaḥ kriyante

Sanskrit only: no published translation is held for this verse.

ब्रह्मवादिनो वदन्ति यत् षडहे स्तोमाश् छन्दांस्य् आप्यन्ते किंछन्दसश् छन्दोमा इत्य् एतच्छन्दसो यद् एता अक्षरपङ्क्तय इति ब्रूयात्

brahmavādino vadanti yat ṣaḍahe stomāś chandāṃsy āpyante kiṃchandasaś chandomā ity etacchandaso yad etā akṣarapaṅktaya iti brūyāt

Sanskrit only: no published translation is held for this verse.

ये सोमासः परावतीति परावतम् इव वा एतर्हि यज्ञो गतस् तम् एवैतेनान्विच्छन्ति

ye somāsaḥ parāvatīti parāvatam iva vā etarhi yajño gatas tam evaitenānvicchanti

Sanskrit only: no published translation is held for this verse.

गायत्र्यः सत्यो जगत्यो रूपेण तस्माज्जगतीनां लोके क्रियन्ते

gāyatryaḥ satyo jagatyo rūpeṇa tasmājjagatīnāṃ loke kriyante

Sanskrit only: no published translation is held for this verse.

गायत्रं भवति यद् एव गायत्रस्य ब्राह्मणम्

gāyatraṃ bhavati yad eva gāyatrasya brāhmaṇam

Sanskrit only: no published translation is held for this verse.

दक्षणिधनं भवति

dakṣaṇidhanaṃ bhavati

Sanskrit only: no published translation is held for this verse.

प्रजापतिः प्रजा असृजत ता अस्मात् सृष्टा अबला इवाच्छदयंस् तास्व् एतेन साम्ना दक्षायेत्य् ओजो वीर्यम् अदधाद् यद् एतत् साम भवत्य् ओज एव वीर्यम् आत्मन् धत्ते

prajāpatiḥ prajā asṛjata tā asmāt sṛṣṭā abalā ivācchadayaṃs tāsv etena sāmnā dakṣāyety ojo vīryam adadhād yad etat sāma bhavaty oja eva vīryam ātman dhatte

Sanskrit only: no published translation is held for this verse.

शार्करं भवति

śārkaraṃ bhavati

Sanskrit only: no published translation is held for this verse.

इन्द्रं सर्वाणि भूतान्य् अस्तुवन् स शर्करं शिशुमारर्षिम् उपेत्याब्रवीत् स्तुहि मेति सो ऽपः प्रस्कन्दन्न् अब्रवीद् एतावतो ऽहं त्वां स्तुयाम् इति तस्माद् अपां वेगम् अवेजयत् स हीन इवामन्यत स एतत् सामापश्यत् तेनापो ऽनुसमाश्नुत तद् वाव स तर्ह्यकामयत कामसनि साम शार्करं कामम् एवैतेनावरुन्द्धे

indraṃ sarvāṇi bhūtāny astuvan sa śarkaraṃ śiśumārarṣim upetyābravīt stuhi meti so 'paḥ praskandann abravīd etāvato 'haṃ tvāṃ stuyām iti tasmād apāṃ vegam avejayat sa hīna ivāmanyata sa etat sāmāpaśyat tenāpo 'nusamāśnuta tad vāva sa tarhyakāmayata kāmasani sāma śārkaraṃ kāmam evaitenāvarunddhe

Sanskrit only: no published translation is held for this verse.

प्लवो भवति

plavo bhavati

Sanskrit only: no published translation is held for this verse.

समुद्रं वा एते प्रस्नान्तीत्य् आहुर् ये द्वादशाहम् उपयन्तीति यो वा अप्लवः समुद्रं प्रस्नाति न स तत उदेति यत् प्लवो भवति स्वर्गस्य लोकस्य समष्ट्यै

samudraṃ vā ete prasnāntīty āhur ye dvādaśāham upayantīti yo vā aplavaḥ samudraṃ prasnāti na sa tata udeti yat plavo bhavati svargasya lokasya samaṣṭyai

Sanskrit only: no published translation is held for this verse.

अतिविश्वानि दुरिता तरेमेति यद् एवैषां दुष्टुतं दुश्शस्तं तद् एतेन तरन्ति

ativiśvāni duritā taremeti yad evaiṣāṃ duṣṭutaṃ duśśastaṃ tad etena taranti

Sanskrit only: no published translation is held for this verse.

एकादशाक्षरणिधनो भवत्य् एकादशाक्षरा त्रिष्टुब् ओजोवीर्यं त्रिष्टुब् ओजस्य् एव वीर्ये प्रतितिष्ठति

ekādaśākṣaraṇidhano bhavaty ekādaśākṣarā triṣṭub ojovīryaṃ triṣṭub ojasy eva vīrye pratitiṣṭhati

Sanskrit only: no published translation is held for this verse.

गौरीवितं भवति यद् एव गौरीवितस्य ब्राह्मणम्

gaurīvitaṃ bhavati yad eva gaurīvitasya brāhmaṇam

Sanskrit only: no published translation is held for this verse.

कार्तयशं भवति

kārtayaśaṃ bhavati

Sanskrit only: no published translation is held for this verse.

हीति निधनम् उपयन्ति पाप्मनो ऽपहत्यै

hīti nidhanam upayanti pāpmano 'pahatyai

Sanskrit only: no published translation is held for this verse.

अप पाप्मानं हते कार्तयशेन तुष्टुवानः

apa pāpmānaṃ hate kārtayaśena tuṣṭuvānaḥ

Sanskrit only: no published translation is held for this verse.

सौहविषं भवति

sauhaviṣaṃ bhavati

Sanskrit only: no published translation is held for this verse.

सुहविर् वा एतेनाङ्गिरसो ऽञ्जसा स्वर्गं लोकम् अपश्यत् स्वर्गस्य लोकस्यानुख्यात्यै स्वर्गाल्लोकान् न च्यवते तुष्टुवानः

suhavir vā etenāṅgiraso 'ñjasā svargaṃ lokam apaśyat svargasya lokasyānukhyātyai svargāllokān na cyavate tuṣṭuvānaḥ

Sanskrit only: no published translation is held for this verse.

ब्रह्मवादिनो वदन्ति यत् षडहे स्तोमाश् छन्दांस्य् आप्यन्ते किंछन्दसश् छन्दोमा इति पुरुषश् छन्दस इति ब्रूयात् पुरुषो वै पाङ्क्तः पुरुषो द्विपदा छन्दोमानाम् अयातयामतायै

brahmavādino vadanti yat ṣaḍahe stomāś chandāṃsy āpyante kiṃchandasaś chandomā iti puruṣaś chandasa iti brūyāt puruṣo vai pāṅktaḥ puruṣo dvipadā chandomānām ayātayāmatāyai

Sanskrit only: no published translation is held for this verse.

जराबोधीयं भवत्य् अन्नाद्यस्यावरुद्ध्यै

jarābodhīyaṃ bhavaty annādyasyāvaruddhyai

Sanskrit only: no published translation is held for this verse.

अन्नं वै जराबोधीयं मुखं गायत्री मुख एव तद् अन्नं धत्ते ऽन्नम् अत्ति

annaṃ vai jarābodhīyaṃ mukhaṃ gāyatrī mukha eva tad annaṃ dhatte 'nnam atti

Sanskrit only: no published translation is held for this verse.

अन्नादो भवति य एवं वेद

annādo bhavati ya evaṃ veda

Sanskrit only: no published translation is held for this verse.

गायत्रीषु स्तुवन्ति प्रतिष्ठायै ब्रह्मवर्चसाय येनैव प्राणेन प्रयन्ति तम् अभ्युद्यन्ति

gāyatrīṣu stuvanti pratiṣṭhāyai brahmavarcasāya yenaiva prāṇena prayanti tam abhyudyanti

Sanskrit only: no published translation is held for this verse.

इडान्ताः पावमाना भवन्ति पशवो वा इडाः पशवश् छन्दोमाः पशुष्व् एव तत् पशून् दधाति स्तोमः

iḍāntāḥ pāvamānā bhavanti paśavo vā iḍāḥ paśavaś chandomāḥ paśuṣv eva tat paśūn dadhāti stomaḥ

Sanskrit only: no published translation is held for this verse.