Pañcaviṃśa (Tāṇḍya) Brāhmaṇa of the Sāmaveda (in part) 6.4

प्रजापतिर् देवेभ्य ऊर्जं व्यभजत् तत उदुम्बरः समभवत् प्राजापत्यो वा उदुम्बरः प्राजापत्य उद्गाता यद् उद्गातौदुम्बरीं प्रथमेन कर्मणान्वारभते स्वयैव तद् देवतयात्मानम् आर्त्विज्याय वृणीते

prajāpatir devebhya ūrjaṃ vyabhajat tata udumbaraḥ samabhavat prājāpatyo vā udumbaraḥ prājāpatya udgātā yad udgātaudumbarīṃ prathamena karmaṇānvārabhate svayaiva tad devatayātmānam ārtvijyāya vṛṇīte

Sanskrit only: no published translation is held for this verse.

ताम् उच्छ्रयति द्युतानस् त्वा मारुत उच्छ्रयतूद् दिवं स्तभानान्तरिक्षं पृण दृंह पृथिवीम्

tām ucchrayati dyutānas tvā māruta ucchrayatūd divaṃ stabhānāntarikṣaṃ pṛṇa dṛṃha pṛthivīm

Sanskrit only: no published translation is held for this verse.

ताम् अन्वारभत आयोष् ट्वा सदने सादयाम्य् अवतश् छायायां समुद्रस्य हृदय इति

tām anvārabhata āyoṣ ṭvā sadane sādayāmy avataś chāyāyāṃ samudrasya hṛdaya iti

Sanskrit only: no published translation is held for this verse.

यज्ञो वा आयुस् तस्य तत् सदनं क्रियते

yajño vā āyus tasya tat sadanaṃ kriyate

Sanskrit only: no published translation is held for this verse.

यज्ञो वा अवति तस्य सा छाया क्रियते

yajño vā avati tasya sā chāyā kriyate

Sanskrit only: no published translation is held for this verse.

मध्यतो वा आत्मनो हृदयं तस्मान् मध्ये सदस औदुम्बरी मीयते

madhyato vā ātmano hṛdayaṃ tasmān madhye sadasa audumbarī mīyate

Sanskrit only: no published translation is held for this verse.

नमः समुद्राय नमः समुद्रस्य चक्षुष इत्य् आह वाग् वै समुद्रो मनः समुद्रस्य चक्षुस् ताभ्याम् एव तन् नमस् करोति

namaḥ samudrāya namaḥ samudrasya cakṣuṣa ity āha vāg vai samudro manaḥ samudrasya cakṣus tābhyām eva tan namas karoti

Sanskrit only: no published translation is held for this verse.

मा मा यूनर्वा हासीद् इत्य् आह साम वै यूनर्वा साम्न एव तन् नमस्करोत्य् आर्त्विज्यं करिष्यन्

mā mā yūnarvā hāsīd ity āha sāma vai yūnarvā sāmna eva tan namaskaroty ārtvijyaṃ kariṣyan

Sanskrit only: no published translation is held for this verse.

यो वा एवं साम्ने नमस्कृत्य साम्नार्त्विज्यं करोति न साम्नो हीयते नैनं सामापहते

yo vā evaṃ sāmne namaskṛtya sāmnārtvijyaṃ karoti na sāmno hīyate nainaṃ sāmāpahate

Sanskrit only: no published translation is held for this verse.

य एनम् अनुव्याहरति स आर्तिम् आर्छति

ya enam anuvyāharati sa ārtim ārchati

Sanskrit only: no published translation is held for this verse.

ऊर्ग् अस्य् ऊर्जोदा ऊर्जं मे देह्य् ऊर्जं मे धेह्य् अन्नं मे देह्य् अन्नं मे धेहि प्रजापतेर् वा एतद् उदरं यत् सद ऊर्ग् उदुम्बरो यद् औदुम्बरी मध्ये सदसो मीयते मध्यत एव तत् प्रजाभ्यो ऽन्नम् ऊर्जं दधाति

ūrg asy ūrjodā ūrjaṃ me dehy ūrjaṃ me dhehy annaṃ me dehy annaṃ me dhehi prajāpater vā etad udaraṃ yat sada ūrg udumbaro yad audumbarī madhye sadaso mīyate madhyata eva tat prajābhyo 'nnam ūrjaṃ dadhāti

Sanskrit only: no published translation is held for this verse.

तस्माद् यत्रैषा यातयामा क्रियते तत् प्रजा अशनायवो भवन्ति

tasmād yatraiṣā yātayāmā kriyate tat prajā aśanāyavo bhavanti

Sanskrit only: no published translation is held for this verse.

साम देवानाम् अन्नं सामन्य् एव तद् देवेभ्यो ऽन्न ऊर्जं दधाति स एव तद् ऊर्जि श्रितः प्रजाभ्य ऊर्जं विभजति

sāma devānām annaṃ sāmany eva tad devebhyo 'nna ūrjaṃ dadhāti sa eva tad ūrji śritaḥ prajābhya ūrjaṃ vibhajati

Sanskrit only: no published translation is held for this verse.

उदङ्ङ् आसीन उद्गायत्य् उदीचीं तद् दिशम् ऊर्जा भाजयति प्रत्यङ्ङ् आसीनः प्रस्तौति प्रतीचीं तद् दिशम् ऊर्जा भाजयति दक्षिणासीनः प्रतिहरति दक्षिणां तद् दिशम् ऊर्जा भाजयति प्राञ्चो ऽन्य ऋत्विज आर्त्विज्यं कुर्वन्ति तस्माद् एषा दिशां वीर्यवत्तमैतां हि भूयिष्ठाः प्रीणन्ति

udaṅṅ āsīna udgāyaty udīcīṃ tad diśam ūrjā bhājayati pratyaṅṅ āsīnaḥ prastauti pratīcīṃ tad diśam ūrjā bhājayati dakṣiṇāsīnaḥ pratiharati dakṣiṇāṃ tad diśam ūrjā bhājayati prāñco 'nya ṛtvija ārtvijyaṃ kurvanti tasmād eṣā diśāṃ vīryavattamaitāṃ hi bhūyiṣṭhāḥ prīṇanti

Sanskrit only: no published translation is held for this verse.

ब्रह्मवादिनो वदन्ति कस्मात् सत्यात् प्राञ्चो ऽन्य ऋत्विज आर्त्विज्यं कुर्वन्तीति विपरिक्रम्योद्गातार इति दिशाम् अभीष्ट्यै दिशाम् अभिप्रीत्या इति ब्रूयात् तस्मात् सर्वासु दिक्ष्व् अन्नं विद्यते सर्वा ह्य् अभीष्टाः प्रीताः

brahmavādino vadanti kasmāt satyāt prāñco 'nya ṛtvija ārtvijyaṃ kurvantīti viparikramyodgātāra iti diśām abhīṣṭyai diśām abhiprītyā iti brūyāt tasmāt sarvāsu dikṣv annaṃ vidyate sarvā hy abhīṣṭāḥ prītāḥ

Sanskrit only: no published translation is held for this verse.