Pañcaviṃśa (Tāṇḍya) Brāhmaṇa of the Sāmaveda (in part) 6.6

ग्राव्नः संसाद्य द्रोणकलशम् अध्यूहन्ति विड् वै ग्रावाणो ऽन्नं सोमो राष्ट्रं द्रोणकलशो यद् ग्रावसु द्रोणकलशम् अध्यूहन्ति विश्य् एव तद् राष्ट्रम् अध्यूहन्ति

grāvnaḥ saṃsādya droṇakalaśam adhyūhanti viḍ vai grāvāṇo 'nnaṃ somo rāṣṭraṃ droṇakalaśo yad grāvasu droṇakalaśam adhyūhanti viśy eva tad rāṣṭram adhyūhanti

Sanskrit only: no published translation is held for this verse.

यं द्विष्याद् विमुखान् ग्राव्णः कृत्वेदम् अहम् अमुम् आमुष्यायणम् अमुष्याः पुत्रम् अमुष्या विशो ऽमुष्माद् अन्नाद्यान् निरूहामीति निरूहेद् विश एवैनम् अन्नाद्यान् निरूहति

yaṃ dviṣyād vimukhān grāvṇaḥ kṛtvedam aham amum āmuṣyāyaṇam amuṣyāḥ putram amuṣyā viśo 'muṣmād annādyān nirūhāmīti nirūhed viśa evainam annādyān nirūhati

Sanskrit only: no published translation is held for this verse.

यो ऽस्य प्रियः स्यात् संमुखान् ग्राव्णः कृत्वेदम् अहम् आमुष्यायणम् अमुष्याः पुत्रम् अमुष्यां विश्य् अमुष्मिन्न् अन्नाद्ये ऽध्यूहामीत्य् अध्यूहेद् विश्य् एवैनम् अन्नाद्ये ऽध्यूहति

yo 'sya priyaḥ syāt saṃmukhān grāvṇaḥ kṛtvedam aham āmuṣyāyaṇam amuṣyāḥ putram amuṣyāṃ viśy amuṣminn annādye 'dhyūhāmīty adhyūhed viśy evainam annādye 'dhyūhati

Sanskrit only: no published translation is held for this verse.

अथो तद् उभयम् अनादृत्येदम् अहं मां तेजसि ब्रह्मवर्चसे ऽध्यूहामीत्य् अध्यूहेत् तेजस्य् एव ब्रह्मवर्चस आत्मानम् अध्यूहति

atho tad ubhayam anādṛtyedam ahaṃ māṃ tejasi brahmavarcase 'dhyūhāmīty adhyūhet tejasy eva brahmavarcasa ātmānam adhyūhati

Sanskrit only: no published translation is held for this verse.

यः कामयेत विशा राष्ट्रं हन्याम् इति व्यूह्य ग्राव्णो ऽधो द्रोणकलशं सादयित्वोपांशुसवनम् उपरिष्टाद् अभिनिदध्याद् इदम् अहम् अमुया विशा ऽदो राष्ट्रं हन्मीति विशैव तद् राष्ट्रं हन्ति

yaḥ kāmayeta viśā rāṣṭraṃ hanyām iti vyūhya grāvṇo 'dho droṇakalaśaṃ sādayitvopāṃśusavanam upariṣṭād abhinidadhyād idam aham amuyā viśā 'do rāṣṭraṃ hanmīti viśaiva tad rāṣṭraṃ hanti

Sanskrit only: no published translation is held for this verse.

यो वै दैवानि पवित्राणि वेद पूतो यज्ञियो भवति छन्दांसि वै दैवानि पवित्राणि तैर् द्रोणकलशं पावयन्ति

yo vai daivāni pavitrāṇi veda pūto yajñiyo bhavati chandāṃsi vai daivāni pavitrāṇi tair droṇakalaśaṃ pāvayanti

Sanskrit only: no published translation is held for this verse.

वसवस् त्वा गायत्रेण छन्दसा पुनन्तु रुद्रास् त्वा त्रैष्टुभेन छन्दसा पुनन्त्व् आदित्यास् त्वा जागतेन छन्दसा पुनन्त्व् एतानि वै दैवानि पवित्राणि पूतो यज्ञियो भवति य एवं वेद

vasavas tvā gāyatreṇa chandasā punantu rudrās tvā traiṣṭubhena chandasā punantv ādityās tvā jāgatena chandasā punantv etāni vai daivāni pavitrāṇi pūto yajñiyo bhavati ya evaṃ veda

Sanskrit only: no published translation is held for this verse.

स्वर्भानुर् वा आसुर आदित्यं तमसाविध्यत् तं देवा न व्यजानंस् ते ऽत्रिम् उपाधावंस् तस्यात्रिर् भासेन तमो ऽपाहन् यत् प्रथमम् अपाहन् सा कृष्णाविर् अभवद् यद् द्वितीयं सा रजता यत् तृतीयं सा लोहिनी यया वर्णम् अभ्यतृणत् सा शुक्लासीत्

svarbhānur vā āsura ādityaṃ tamasāvidhyat taṃ devā na vyajānaṃs te 'trim upādhāvaṃs tasyātrir bhāsena tamo 'pāhan yat prathamam apāhan sā kṛṣṇāvir abhavad yad dvitīyaṃ sā rajatā yat tṛtīyaṃ sā lohinī yayā varṇam abhyatṛṇat sā śuklāsīt

Sanskrit only: no published translation is held for this verse.

तस्माच्छुक्लं पवित्रं शुक्रः सोमः स शुक्रत्वाय

tasmācchuklaṃ pavitraṃ śukraḥ somaḥ sa śukratvāya

Sanskrit only: no published translation is held for this verse.

यं द्विष्यात् तस्यैतेषां वर्णानाम् अपि पवित्रे कुर्यात् पाप्मनैवैनं तमसा विध्यति कृष्णम् इव हि तमो यो ऽस्य प्रियः स्याद् आसक्तिशुक्लं कुर्याज् ज्योतिर् वै हिरण्यं ज्योतिर् एवास्मिन् दधाति

yaṃ dviṣyāt tasyaiteṣāṃ varṇānām api pavitre kuryāt pāpmanaivainaṃ tamasā vidhyati kṛṣṇam iva hi tamo yo 'sya priyaḥ syād āsaktiśuklaṃ kuryāj jyotir vai hiraṇyaṃ jyotir evāsmin dadhāti

Sanskrit only: no published translation is held for this verse.

तस्माद् आत्रेयं चन्द्रेणेच्छन्त्य् अत्रिर् हि तस्य ज्योतिः

tasmād ātreyaṃ candreṇecchanty atrir hi tasya jyotiḥ

Sanskrit only: no published translation is held for this verse.

अभ्यतृणत् पवित्रं विगृह्णन्ति हस्तकार्यम् एव तद् यज्ञस्य क्रियत एतद् वा उद्गातॄणां हस्तकार्यं यत् पवित्रस्य विग्रहणम्

abhyatṛṇat pavitraṃ vigṛhṇanti hastakāryam eva tad yajñasya kriyata etad vā udgātṝṇāṃ hastakāryaṃ yat pavitrasya vigrahaṇam

Sanskrit only: no published translation is held for this verse.

न हस्तवेष्यान् निरृच्छति य एवं वेद

na hastaveṣyān nirṛcchati ya evaṃ veda

Sanskrit only: no published translation is held for this verse.

यो ऽपि न विगृह्णाति प्राणाद् एनम् अन्तर्यन्ति

yo 'pi na vigṛhṇāti prāṇād enam antaryanti

Sanskrit only: no published translation is held for this verse.

तं ब्रूयाद् वेपमानः प्रमेष्यस इति वेपमान एव प्रमीयते

taṃ brūyād vepamānaḥ prameṣyasa iti vepamāna eva pramīyate

Sanskrit only: no published translation is held for this verse.

प्र शुक्रैतु देवी मनीषास्मद् रथः सुतष्टो न वाजीत्य् उद्गाता धाराम् अनुमन्त्रयते

pra śukraitu devī manīṣāsmad rathaḥ sutaṣṭo na vājīty udgātā dhārām anumantrayate

Sanskrit only: no published translation is held for this verse.

आयुषे मे पवस्व वर्चसे मे पवस्व विदुः पृथिव्या दिवो जनित्राच्छृण्वन्त्व् आपो ऽधः क्षरन्तीः सोमेहोद्गायेत्य् आह मह्यं तेजसे ब्रह्मवर्चसायेति

āyuṣe me pavasva varcase me pavasva viduḥ pṛthivyā divo janitrācchṛṇvantv āpo 'dhaḥ kṣarantīḥ somehodgāyety āha mahyaṃ tejase brahmavarcasāyeti

Sanskrit only: no published translation is held for this verse.

एष वै सोमस्योद्गीथो यत् पवते सोमोद्गीथम् एव साम गायति

eṣa vai somasyodgītho yat pavate somodgītham eva sāma gāyati

Sanskrit only: no published translation is held for this verse.

अछिन्नं पावयन्ति यज्ञं चैव प्राणांश् च संतन्वन्ति संततं पावयन्ति यज्ञस्य संतत्यै

achinnaṃ pāvayanti yajñaṃ caiva prāṇāṃś ca saṃtanvanti saṃtataṃ pāvayanti yajñasya saṃtatyai

Sanskrit only: no published translation is held for this verse.