Library·Pañcaviṃśa (Tāṇḍya) Brāhmaṇa of the Sāmaveda (in part)·7·7.5

Pañcaviṃśa (Tāṇḍya) Brāhmaṇa of the Sāmaveda (in part) 7.5

प्रजापतिर् अकामयत बहु स्यां प्रजायेयेति स शोचन्न् अमहीयमानो ऽतिष्ठत् स एतद् आमहीयवम् अपश्यत् तेनेमाः प्रजा असृजत ताः सृष्टा अमहीयन्त यद् अमहीयन्त तस्माद् आमहीयवम्

prajāpatir akāmayata bahu syāṃ prajāyeyeti sa śocann amahīyamāno 'tiṣṭhat sa etad āmahīyavam apaśyat tenemāḥ prajā asṛjata tāḥ sṛṣṭā amahīyanta yad amahīyanta tasmād āmahīyavam

Sanskrit only: no published translation is held for this verse.

PB 7.5.2

ता अस्मात् सृष्टा अपाक्रामंस् तासां दिवि सद् भूम्य् आदद इति प्राणान् आदत्त ता एनं प्राणेष्व् आत्तेषु पुनर् उपावर्तन्त ताभ्य उग्रं शर्म महि श्रव इति पुनः प्राणान् प्रायच्छत् ता अस्माद् उद् एवायोधंस् तासां स्तौष इति मन्यून् अवाशृणात् ततो वै तस्मै ताः श्रैष्ठ्यायातिष्ठन्त

tā asmāt sṛṣṭā apākrāmaṃs tāsāṃ divi sad bhūmy ādada iti prāṇān ādatta tā enaṃ prāṇeṣv ātteṣu punar upāvartanta tābhya ugraṃ śarma mahi śrava iti punaḥ prāṇān prāyacchat tā asmād ud evāyodhaṃs tāsāṃ stauṣa iti manyūn avāśṛṇāt tato vai tasmai tāḥ śraiṣṭhyāyātiṣṭhanta

Sanskrit only: no published translation is held for this verse.

PB 7.5.3

तिष्ठन्ते ऽस्मै समानाः श्रैष्ठ्याय य एवं वेद

tiṣṭhante 'smai samānāḥ śraiṣṭhyāya ya evaṃ veda

Sanskrit only: no published translation is held for this verse.

PB 7.5.4

प्रजानां च वा एषा सृष्टिः पापवसीयसश् च विधृतिर् यद् आमहीयवम्

prajānāṃ ca vā eṣā sṛṣṭiḥ pāpavasīyasaś ca vidhṛtir yad āmahīyavam

Sanskrit only: no published translation is held for this verse.

PB 7.5.5

विधृतिः पापवसीयसो भवति य एवं वेद

vidhṛtiḥ pāpavasīyaso bhavati ya evaṃ veda

Sanskrit only: no published translation is held for this verse.

PB 7.5.6

देवा वै यशस्कामाः सत्त्रम् आसताग्निर् इन्द्रो वायुर् मखस् ते ऽब्रुवन् यन् नो यश ऋछात् तन् नः सहासद् इति तेषां मखं यश आर्छत् तद् आदायापाक्रामत् तद् अस्य प्रासहादित्सन्त तं पर्ययतन्त स्वधनुः प्रतिष्टभ्यातिष्ठत् तस्य धनुरार्त्निर् ऊर्ध्वा पतित्वा शिरो ऽछिनत् स प्रवर्ग्यो ऽभवद् यज्ञो वै मखो यत् प्रवर्ग्यं प्रवृञ्जन्ति यज्ञस्यैव तच्छिरः प्रतिदधति

devā vai yaśaskāmāḥ sattram āsatāgnir indro vāyur makhas te 'bruvan yan no yaśa ṛchāt tan naḥ sahāsad iti teṣāṃ makhaṃ yaśa ārchat tad ādāyāpākrāmat tad asya prāsahāditsanta taṃ paryayatanta svadhanuḥ pratiṣṭabhyātiṣṭhat tasya dhanurārtnir ūrdhvā patitvā śiro 'chinat sa pravargyo 'bhavad yajño vai makho yat pravargyaṃ pravṛñjanti yajñasyaiva tacchiraḥ pratidadhati

Sanskrit only: no published translation is held for this verse.

PB 7.5.7

तद् देवा यशो व्यभजन्त तस्याग्नी रौरवं प्राबृहत

tad devā yaśo vyabhajanta tasyāgnī rauravaṃ prābṛhata

Sanskrit only: no published translation is held for this verse.

PB 7.5.8

तद् वै स पशुवीर्यं प्राबृहत पशवो वै रौरवम्

tad vai sa paśuvīryaṃ prābṛhata paśavo vai rauravam

Sanskrit only: no published translation is held for this verse.

PB 7.5.9

पशुमान् भवति य एवं वेद

paśumān bhavati ya evaṃ veda

Sanskrit only: no published translation is held for this verse.

PB 7.5.10

अग्निर् वै रूरस् तस्यैतद् रौरवम्

agnir vai rūras tasyaitad rauravam

Sanskrit only: no published translation is held for this verse.

PB 7.5.11

असुरा वै देवान् पर्ययतन्त तत एताव् अग्नी रूरौ विष्वञ्चौ स्तोभाव् अपश्यत् ताभ्याम् एनान् प्रत्यौषत् ते प्रत्युष्यमाणा अरवन्त यद् अरवन्त तस्माद् रौरवम्

asurā vai devān paryayatanta tata etāv agnī rūrau viṣvañcau stobhāv apaśyat tābhyām enān pratyauṣat te pratyuṣyamāṇā aravanta yad aravanta tasmād rauravam

Sanskrit only: no published translation is held for this verse.

PB 7.5.12

अथेन्द्रो यौधाजयं प्राबृहत तद् वै स वज्रं प्राबृहत वज्रो वै यौधाजयम्

athendro yaudhājayaṃ prābṛhata tad vai sa vajraṃ prābṛhata vajro vai yaudhājayam

Sanskrit only: no published translation is held for this verse.

PB 7.5.13

वज्रं भ्रातृव्याय प्रहरति य एवं वेद

vajraṃ bhrātṛvyāya praharati ya evaṃ veda

Sanskrit only: no published translation is held for this verse.

PB 7.5.14

इन्द्रो वै युधाजित् तस्यैतद् यौधाजयम्

indro vai yudhājit tasyaitad yaudhājayam