ईश्वर उवाच-। तदेकाग्रमना भूत्वा शृणु देवि वरानने । आसीदुग्रतपा नाम मुनिरेको दृढव्रतः
īśvara uvāca-| tadekāgramanā bhūtvā śṛṇu devi varānane | āsīdugratapā nāma munireko dṛḍhavrataḥ
Sanskrit only: no published translation is held for this verse.
Library·Padma Purāṇa·5·5.72
Padma Purāṇa 5.72
साग्निको ह्यग्निभक्षश्च चचारात्यद्भुतं तपः । जजाप परमं जाप्यं मंत्रं पंचदशाक्षरम्
sāgniko hyagnibhakṣaśca cacārātyadbhutaṃ tapaḥ | jajāpa paramaṃ jāpyaṃ maṃtraṃ paṃcadaśākṣaram
Sanskrit only: no published translation is held for this verse.
काममंत्रेण पुटितं कामं कामवरप्रदात् । कृष्णायेति पदं स्वाहा सहितं सिद्धिदं परम्
kāmamaṃtreṇa puṭitaṃ kāmaṃ kāmavarapradāt | kṛṣṇāyeti padaṃ svāhā sahitaṃ siddhidaṃ param
Sanskrit only: no published translation is held for this verse.
दध्यौ च श्यामलं कृष्णं रासोन्मत्तं वरोत्सुकम् । पीतपट्टधरं वेणुं करेणाधरमर्पितम्
dadhyau ca śyāmalaṃ kṛṣṇaṃ rāsonmattaṃ varotsukam | pītapaṭṭadharaṃ veṇuṃ kareṇādharamarpitam
Sanskrit only: no published translation is held for this verse.
नवयौवनसंपन्नं कर्षंतं पाणिना प्रियाम् । एवं ध्यानपरः कल्पशतांते देहमुत्सृजन्
navayauvanasaṃpannaṃ karṣaṃtaṃ pāṇinā priyām | evaṃ dhyānaparaḥ kalpaśatāṃte dehamutsṛjan
Sanskrit only: no published translation is held for this verse.
सुनंद नाम गोपस्य कन्याभूत्स महामुनिः । सुनंदेति समाख्याता या वीणां बिभ्रती करे
sunaṃda nāma gopasya kanyābhūtsa mahāmuniḥ | sunaṃdeti samākhyātā yā vīṇāṃ bibhratī kare
Sanskrit only: no published translation is held for this verse.
मुनिरन्यः सत्यतपा इति ख्यातो महाव्रतः । सशुष्कपत्रं भुंक्ते यः प्रजजाप परं मनुम्
muniranyaḥ satyatapā iti khyāto mahāvrataḥ | saśuṣkapatraṃ bhuṃkte yaḥ prajajāpa paraṃ manum
Sanskrit only: no published translation is held for this verse.
रत्यंतं कामबीजेन पुटितं च दशाक्षरम् । स प्रदध्यौ मुनिवरश्चित्रवेषधरं हरिम्
ratyaṃtaṃ kāmabījena puṭitaṃ ca daśākṣaram | sa pradadhyau munivaraścitraveṣadharaṃ harim
Sanskrit only: no published translation is held for this verse.
धृत्वा रमाया दोर्वल्लीद्वितयं कंकणोज्ज्वलम् । नृत्यंतमुन्मदंतं च संश्लिष्यं तं मुहुर्मुहुः
dhṛtvā ramāyā dorvallīdvitayaṃ kaṃkaṇojjvalam | nṛtyaṃtamunmadaṃtaṃ ca saṃśliṣyaṃ taṃ muhurmuhuḥ
Sanskrit only: no published translation is held for this verse.
हसंतमुच्चैरानंदतरंगं जठरांबरे । दधतं वेणुमाजानु वैजयंत्या विराजितम्
hasaṃtamuccairānaṃdataraṃgaṃ jaṭharāṃbare | dadhataṃ veṇumājānu vaijayaṃtyā virājitam
Sanskrit only: no published translation is held for this verse.
स्वेदांभः कणसंसिक्त ललाटवलिताननम् । त्यक्त्वा त्यक्त्वा स वै देहं तपसा च महामुनिः
svedāṃbhaḥ kaṇasaṃsikta lalāṭavalitānanam | tyaktvā tyaktvā sa vai dehaṃ tapasā ca mahāmuniḥ
Sanskrit only: no published translation is held for this verse.
दशकल्पांतरे जातो ह्ययं नंदवनादिह । सुभद्र नाम्नो गोपस्य कन्या भद्रेति विश्रुता
daśakalpāṃtare jāto hyayaṃ naṃdavanādiha | subhadra nāmno gopasya kanyā bhadreti viśrutā
Sanskrit only: no published translation is held for this verse.
यस्याः पृष्ठतले दिव्यं व्यजनं परिदृश्यते । हरिधामाभिधानस्तु कश्चिदासीन्महामुनिः
yasyāḥ pṛṣṭhatale divyaṃ vyajanaṃ paridṛśyate | haridhāmābhidhānastu kaścidāsīnmahāmuniḥ
Sanskrit only: no published translation is held for this verse.
सोऽप्यतप्यत्तपः कृच्छ्रं नित्यं पत्रैकभोजनम् । आशुसिद्धिकरं मंत्रं विंशत्यर्णं प्रजप्तवान्
so'pyatapyattapaḥ kṛcchraṃ nityaṃ patraikabhojanam | āśusiddhikaraṃ maṃtraṃ viṃśatyarṇaṃ prajaptavān
Sanskrit only: no published translation is held for this verse.
अनंतरं कामबीजादध्यारूढं तदेव तु । माया तत्पुरतो व्योम हंसासृग्द्युतिचंद्रकम्
anaṃtaraṃ kāmabījādadhyārūḍhaṃ tadeva tu | māyā tatpurato vyoma haṃsāsṛgdyuticaṃdrakam
Sanskrit only: no published translation is held for this verse.
ततो दशाक्षरं पश्चान्नमोयुक्तं स्मरादिकम् । दध्यौ वृंदावने रम्ये माधवीमंडपे प्रभुम्
tato daśākṣaraṃ paścānnamoyuktaṃ smarādikam | dadhyau vṛṃdāvane ramye mādhavīmaṃḍape prabhum
Sanskrit only: no published translation is held for this verse.
उत्तानशायिनं चारुपल्लवास्तरणोपरि । कयाचिदतिकामार्त्त बल्लव्या रक्तनेत्रया
uttānaśāyinaṃ cārupallavāstaraṇopari | kayācidatikāmārtta ballavyā raktanetrayā
Sanskrit only: no published translation is held for this verse.
वक्षोजयुगमाच्छाद्य विपुलोरः स्थलं मुहुः । संचुंब्यमानगंडांतं तृप्यमानरदच्छदम्
vakṣojayugamācchādya vipuloraḥ sthalaṃ muhuḥ | saṃcuṃbyamānagaṃḍāṃtaṃ tṛpyamānaradacchadam
Sanskrit only: no published translation is held for this verse.
कलयंतं प्रियां दोर्भ्यां सहासं समुदाद्भुतम् । स मुनिश्च बहून्देहां स्त्यक्त्वा कल्पत्रयांतरे
kalayaṃtaṃ priyāṃ dorbhyāṃ sahāsaṃ samudādbhutam | sa muniśca bahūndehāṃ styaktvā kalpatrayāṃtare
Sanskrit only: no published translation is held for this verse.
सारंगनाम्नो गोपस्य कन्याभूच्छुभलक्षणा । रंगवेणीति विख्याता निपुणा चित्रकर्मणि
sāraṃganāmno gopasya kanyābhūcchubhalakṣaṇā | raṃgaveṇīti vikhyātā nipuṇā citrakarmaṇi
Sanskrit only: no published translation is held for this verse.
यस्या दंतेषु दृश्यंते चित्रिताः शोणबिंदवः । ब्रह्मवादी मुनिः कश्चिज्जाबालिरिति विश्रुतः
yasyā daṃteṣu dṛśyaṃte citritāḥ śoṇabiṃdavaḥ | brahmavādī muniḥ kaścijjābāliriti viśrutaḥ
Sanskrit only: no published translation is held for this verse.
सतपः सुरतो योगी विचरन्पृथिवीमिमाम् । स एकस्मिन्महारण्ये योजनायुतविस्तृते
satapaḥ surato yogī vicaranpṛthivīmimām | sa ekasminmahāraṇye yojanāyutavistṛte
Sanskrit only: no published translation is held for this verse.
यदृच्छयागतोऽपश्यदेकां वापीं सुशोभनाम् । सर्वतः स्फाटिकाबंधतटां स्वादुजलान्विताम्
yadṛcchayāgato'paśyadekāṃ vāpīṃ suśobhanām | sarvataḥ sphāṭikābaṃdhataṭāṃ svādujalānvitām
Sanskrit only: no published translation is held for this verse.
विकासिकमलामोदवायुना परिशीलिताम् । तस्याः पश्चिमदिग्भागे मूले वटमहीरुहः
vikāsikamalāmodavāyunā pariśīlitām | tasyāḥ paścimadigbhāge mūle vaṭamahīruhaḥ
Sanskrit only: no published translation is held for this verse.
अपश्यत्तापसीं कांचित्कुर्वंतीं दारुणं तपः । तारुण्यवयसायुक्तां रूपेणाति मनोहराम्
apaśyattāpasīṃ kāṃcitkurvaṃtīṃ dāruṇaṃ tapaḥ | tāruṇyavayasāyuktāṃ rūpeṇāti manoharām
Sanskrit only: no published translation is held for this verse.
चंद्रांशुं सदृशाभासां सर्वावयवशोभनाम् । कृत्वा कटितटे वामपाणिं दक्षिणतस्तदा
caṃdrāṃśuṃ sadṛśābhāsāṃ sarvāvayavaśobhanām | kṛtvā kaṭitaṭe vāmapāṇiṃ dakṣiṇatastadā
Sanskrit only: no published translation is held for this verse.
ज्ञानमुद्रां च बिभ्राणामनिमेषविलोचनाम् । त्यक्ताहारविहारां च सुनिश्चलतयास्थिताम्
jñānamudrāṃ ca bibhrāṇāmanimeṣavilocanām | tyaktāhāravihārāṃ ca suniścalatayāsthitām
Sanskrit only: no published translation is held for this verse.
जिज्ञासुस्तां मुनिवरस्तस्थौ तत्र शतं समाः । तदंते तां समुत्थाप्य चलितां विनयान्मुनिः
jijñāsustāṃ munivarastasthau tatra śataṃ samāḥ | tadaṃte tāṃ samutthāpya calitāṃ vinayānmuniḥ
Sanskrit only: no published translation is held for this verse.
अपृच्छत्का त्वमाश्चर्यरूपे किं वा चरिष्यसि । यदि योग्यं भवेत्तर्हि कृपया वक्तुमर्हसि
apṛcchatkā tvamāścaryarūpe kiṃ vā cariṣyasi | yadi yogyaṃ bhavettarhi kṛpayā vaktumarhasi
Sanskrit only: no published translation is held for this verse.
अथाब्रवीच्छनैर्बाला तपसातीव कर्शिता । ब्रह्मविद्याहमतुला योगींद्रैर्या विमृग्यते
athābravīcchanairbālā tapasātīva karśitā | brahmavidyāhamatulā yogīṃdrairyā vimṛgyate
Sanskrit only: no published translation is held for this verse.
साहं हरिपदाम्भोजकाम्यया सुचिरं तपः । चराम्यस्मिन्वने घोरे ध्यायंती पुरुषोत्तमम्
sāhaṃ haripadāmbhojakāmyayā suciraṃ tapaḥ | carāmyasminvane ghore dhyāyaṃtī puruṣottamam
Sanskrit only: no published translation is held for this verse.
ब्रह्मानंदेन पूर्णाहं तेनानंदेन तृप्तधीः । तथापि शून्यमात्मानं मन्ये कृष्णरतिं विना
brahmānaṃdena pūrṇāhaṃ tenānaṃdena tṛptadhīḥ | tathāpi śūnyamātmānaṃ manye kṛṣṇaratiṃ vinā
Sanskrit only: no published translation is held for this verse.
इदानीमतिनिर्विण्णा देहस्यास्य विसर्ज्जनम् । कर्त्तुमिच्छामि पुण्यायां वापिकायामिहैव तु
idānīmatinirviṇṇā dehasyāsya visarjjanam | karttumicchāmi puṇyāyāṃ vāpikāyāmihaiva tu
Sanskrit only: no published translation is held for this verse.
तच्छ्रुत्वा वचनं तस्या मुनिरत्यंतविस्मितः । पतित्वा चरणे तस्याः कृष्णोपासाविधिं शुभम्
tacchrutvā vacanaṃ tasyā muniratyaṃtavismitaḥ | patitvā caraṇe tasyāḥ kṛṣṇopāsāvidhiṃ śubham
Sanskrit only: no published translation is held for this verse.
पप्रच्छ परमप्रीतस्त्यक्त्वाध्यात्मविरोचनम् । तयोक्तं मंत्रमाज्ञाय जगाम मानसं सरः
papraccha paramaprītastyaktvādhyātmavirocanam | tayoktaṃ maṃtramājñāya jagāma mānasaṃ saraḥ
Sanskrit only: no published translation is held for this verse.
ततोऽतिदुश्चरं चक्रे तपो विस्मयकारकम् । एकपादस्थितः सूर्यं निर्निमेषं विलोकयन्
tato'tiduścaraṃ cakre tapo vismayakārakam | ekapādasthitaḥ sūryaṃ nirnimeṣaṃ vilokayan
Sanskrit only: no published translation is held for this verse.
मंत्रं जजाप परमं पंचविंशतिवर्णकम् । दध्यौ परमभावेन कृष्णमानंदरूपिणम्
maṃtraṃ jajāpa paramaṃ paṃcaviṃśativarṇakam | dadhyau paramabhāvena kṛṣṇamānaṃdarūpiṇam
Sanskrit only: no published translation is held for this verse.
चरंतं व्रजवीथीषु विचित्रगतिलीलया । ललितैः पादविन्यासैः क्वणयंतं च नूपुरम्
caraṃtaṃ vrajavīthīṣu vicitragatilīlayā | lalitaiḥ pādavinyāsaiḥ kvaṇayaṃtaṃ ca nūpuram
Sanskrit only: no published translation is held for this verse.
चित्रकंदर्पचेष्टाभिः सस्मितापांगवीक्षितैः । संमोहनाख्यया वंश्या पंचमारुणचित्रया
citrakaṃdarpaceṣṭābhiḥ sasmitāpāṃgavīkṣitaiḥ | saṃmohanākhyayā vaṃśyā paṃcamāruṇacitrayā
Sanskrit only: no published translation is held for this verse.
बिंबौष्ठपुटचुंबिन्या कलालापैर्मनोज्ञया । हरंतं व्रजरामाणां मनांसि च वपूंषि च
biṃbauṣṭhapuṭacuṃbinyā kalālāpairmanojñayā | haraṃtaṃ vrajarāmāṇāṃ manāṃsi ca vapūṃṣi ca
Sanskrit only: no published translation is held for this verse.
श्लथन्नीवीभिरागत्य सहसालिंगितांगकम् । दिव्यमाल्यांबरधरं दिव्यगंधानुलेपनम्
ślathannīvībhirāgatya sahasāliṃgitāṃgakam | divyamālyāṃbaradharaṃ divyagaṃdhānulepanam
Sanskrit only: no published translation is held for this verse.
श्यामलांगप्रभापूर्णैर्मोहयंतं जगत्त्रयम् । स एवं बहुदेवेन समुपास्य जगत्पतिम्
śyāmalāṃgaprabhāpūrṇairmohayaṃtaṃ jagattrayam | sa evaṃ bahudevena samupāsya jagatpatim
Sanskrit only: no published translation is held for this verse.
नवकल्पांतरे जाता गोकुले दिव्यरूपिणी । कन्या प्रचंडनाम्नस्तु गोपस्याति यशस्विनः
navakalpāṃtare jātā gokule divyarūpiṇī | kanyā pracaṃḍanāmnastu gopasyāti yaśasvinaḥ
Sanskrit only: no published translation is held for this verse.
चित्रगंधेति विख्याता कुमारी च शुभानना । निजांगगंधैर्विविधैर्मोदयंती दिशो दश
citragaṃdheti vikhyātā kumārī ca śubhānanā | nijāṃgagaṃdhairvividhairmodayaṃtī diśo daśa
Sanskrit only: no published translation is held for this verse.
तामेनां पश्य कल्याणीं वृंदशो मधुपायिनीम् । अंगेषु स्वपतिं कृत्वा रसावेशसमाकुलाम्
tāmenāṃ paśya kalyāṇīṃ vṛṃdaśo madhupāyinīm | aṃgeṣu svapatiṃ kṛtvā rasāveśasamākulām
Sanskrit only: no published translation is held for this verse.
अस्याः स्तनपरिष्वंगे हारैः सर्वैर्विहन्यते । वक्षःस्थलात्प्रच्यवद्भिश्चित्रगंधादिसौरभैः
asyāḥ stanapariṣvaṃge hāraiḥ sarvairvihanyate | vakṣaḥsthalātpracyavadbhiścitragaṃdhādisaurabhaiḥ
Sanskrit only: no published translation is held for this verse.
अपरे मुनिवर्यास्तु सततं पूतमानसाः । वायुभक्षास्तपस्तेपुर्जपंतः परमं मनुम्
apare munivaryāstu satataṃ pūtamānasāḥ | vāyubhakṣāstapastepurjapaṃtaḥ paramaṃ manum
Sanskrit only: no published translation is held for this verse.
स्मरः कृष्णाय कामार्ति कलादिवृत्तिशालिने । आग्नेयीसहितं कृत्वा मंत्रं पंचदशाक्षरम्
smaraḥ kṛṣṇāya kāmārti kalādivṛttiśāline | āgneyīsahitaṃ kṛtvā maṃtraṃ paṃcadaśākṣaram
Sanskrit only: no published translation is held for this verse.
दध्युर्मुनिवराः कष्णमूर्तिं दिव्यविभूषणाम् । दिव्यचित्रदुकूलेन पूर्णपीनकटिस्थलाम्
dadhyurmunivarāḥ kaṣṇamūrtiṃ divyavibhūṣaṇām | divyacitradukūlena pūrṇapīnakaṭisthalām
Sanskrit only: no published translation is held for this verse.
मयूरपिच्छकैः कॢप्तचूडामुज्ज्वलकुंडलाम् । सव्यजंघांत आदाय दक्षिणं चरणांबुजम्
mayūrapicchakaiḥ kḷptacūḍāmujjvalakuṃḍalām | savyajaṃghāṃta ādāya dakṣiṇaṃ caraṇāṃbujam
Sanskrit only: no published translation is held for this verse.
भ्रमंतीं संपुटीकृत्य चारुहस्तांबुजद्वयम् । कक्षदेशविनिक्षिप्तवेणुं परिचलत्पुटीम्
bhramaṃtīṃ saṃpuṭīkṛtya cāruhastāṃbujadvayam | kakṣadeśavinikṣiptaveṇuṃ paricalatpuṭīm
Sanskrit only: no published translation is held for this verse.
आनंदयंतीं गोपीनां नयनानि मनांसि च । परमाश्चर्यरूपेण प्रविष्टां रंगमंडपे
ānaṃdayaṃtīṃ gopīnāṃ nayanāni manāṃsi ca | paramāścaryarūpeṇa praviṣṭāṃ raṃgamaṃḍape
Sanskrit only: no published translation is held for this verse.
प्रसूनवर्षर्गोपीभिः पूर्यमाणां च सर्वतः । अथ कल्पांतरे देहं त्यक्त्वा जाता इहाधुना
prasūnavarṣargopībhiḥ pūryamāṇāṃ ca sarvataḥ | atha kalpāṃtare dehaṃ tyaktvā jātā ihādhunā
Sanskrit only: no published translation is held for this verse.
यासां कर्णेषु दृश्यंते ताटंका रश्मिदीपिताः । रत्नमाल्यानि कंठेषु रत्नपुष्पाणि वेणिषु
yāsāṃ karṇeṣu dṛśyaṃte tāṭaṃkā raśmidīpitāḥ | ratnamālyāni kaṃṭheṣu ratnapuṣpāṇi veṇiṣu
Sanskrit only: no published translation is held for this verse.
मुनिः शुचिश्रवा नाम सुवर्णो नाम चापरः । कुशध्वजस्य ब्रह्मर्षेः पुत्रौ तौ वेदपारगौ
muniḥ śuciśravā nāma suvarṇo nāma cāparaḥ | kuśadhvajasya brahmarṣeḥ putrau tau vedapāragau
Sanskrit only: no published translation is held for this verse.
ऊर्ध्वपादौ तपो घोरं तेपतुस्त्र्यक्षरं मनुम् । ह्रीं हंस इति कृत्वैव जपंतौ यतमानसौ
ūrdhvapādau tapo ghoraṃ tepatustryakṣaraṃ manum | hrīṃ haṃsa iti kṛtvaiva japaṃtau yatamānasau
Sanskrit only: no published translation is held for this verse.
ध्यायंतौ गोकुले कृष्णं बालकं दशवार्षिकम् । कंदर्पसमरूपेण तारुण्यललितेन च
dhyāyaṃtau gokule kṛṣṇaṃ bālakaṃ daśavārṣikam | kaṃdarpasamarūpeṇa tāruṇyalalitena ca
Sanskrit only: no published translation is held for this verse.
पश्यंतीर्व्रजबिंबोष्ठीर्मोहयंतमनारतम् । तौ कल्पांते तनूं त्यक्त्वा लब्धवंतौ जनिं व्रजे
paśyaṃtīrvrajabiṃboṣṭhīrmohayaṃtamanāratam | tau kalpāṃte tanūṃ tyaktvā labdhavaṃtau janiṃ vraje
Sanskrit only: no published translation is held for this verse.
सुवीरनाम गोपस्य सुते परमशोभने । ययोर्हस्ते प्रदृश्येते सारिके शुभराविणी
suvīranāma gopasya sute paramaśobhane | yayorhaste pradṛśyete sārike śubharāviṇī
Sanskrit only: no published translation is held for this verse.
जटिलो जंघपूतश्च घृताशी कर्बुरेव च । चत्वारो मुनयो धन्या इहामुत्र च निःस्पृहाः
jaṭilo jaṃghapūtaśca ghṛtāśī karbureva ca | catvāro munayo dhanyā ihāmutra ca niḥspṛhāḥ
Sanskrit only: no published translation is held for this verse.
केवलेनैकभावेन प्रपन्ना बल्लवीपतिम् । तेपुस्ते सलिले मग्ना जपंतो मनुमेव च
kevalenaikabhāvena prapannā ballavīpatim | tepuste salile magnā japaṃto manumeva ca
Sanskrit only: no published translation is held for this verse.
रमात्रयेण पुटितं स्मराद्यं तदशाक्षरम् । दध्युश्च गाढभावेन बल्लवीभिर्वने वने
ramātrayeṇa puṭitaṃ smarādyaṃ tadaśākṣaram | dadhyuśca gāḍhabhāvena ballavībhirvane vane
Sanskrit only: no published translation is held for this verse.
भ्रमंतं नृत्यगीताद्यैर्मानयंतं मनोहरम् । चंदनालिप्तसर्वांगं जपापुष्पावतंसकम्
bhramaṃtaṃ nṛtyagītādyairmānayaṃtaṃ manoharam | caṃdanāliptasarvāṃgaṃ japāpuṣpāvataṃsakam
Sanskrit only: no published translation is held for this verse.
कल्हारमालयावीतं नीलपीतपटावृतम् । कल्पत्रयांते जातास्ते गोकुले शुभलक्षणाः
kalhāramālayāvītaṃ nīlapītapaṭāvṛtam | kalpatrayāṃte jātāste gokule śubhalakṣaṇāḥ
Sanskrit only: no published translation is held for this verse.
इमास्ताः पुरतो रम्या उपविष्टा नतभ्रुवः । यासां धर्मकृतान्येव वलयानि प्रकोष्ठके
imāstāḥ purato ramyā upaviṣṭā natabhruvaḥ | yāsāṃ dharmakṛtānyeva valayāni prakoṣṭhake
Sanskrit only: no published translation is held for this verse.
विचित्राणि च रत्नाद्यैर्दिव्यमुक्ताफलादिभिः । मुनिर्दीर्घतपा नाम व्यासोऽभूत्पूर्वकल्पके
vicitrāṇi ca ratnādyairdivyamuktāphalādibhiḥ | munirdīrghatapā nāma vyāso'bhūtpūrvakalpake
Sanskrit only: no published translation is held for this verse.
तत्पुत्रः शुक इत्येव मुनिः ख्यातो वरः सुधीः । सोऽपि बालो महाप्राज्ञः सदैवानुस्मरन्पदम्
tatputraḥ śuka ityeva muniḥ khyāto varaḥ sudhīḥ | so'pi bālo mahāprājñaḥ sadaivānusmaranpadam
Sanskrit only: no published translation is held for this verse.
विहाय पितृमात्रादि कृष्णं ध्यात्वा वनं गतः । स तत्र मानसैर्दिव्यैरुपचारैरहर्निशम्
vihāya pitṛmātrādi kṛṣṇaṃ dhyātvā vanaṃ gataḥ | sa tatra mānasairdivyairupacārairaharniśam
Sanskrit only: no published translation is held for this verse.
अनाहारोऽर्चयद्विष्णुं गोपरूपिणमीश्वरम् । रमया पुटितं मंत्रं जपन्नष्टादशाक्षरम्
anāhāro'rcayadviṣṇuṃ goparūpiṇamīśvaram | ramayā puṭitaṃ maṃtraṃ japannaṣṭādaśākṣaram
Sanskrit only: no published translation is held for this verse.
दध्यौ परमभावेन हरिं हैमतरोरधः । हैममंडपिकायां च हेमसिंहासनोपरि
dadhyau paramabhāvena hariṃ haimataroradhaḥ | haimamaṃḍapikāyāṃ ca hemasiṃhāsanopari
Sanskrit only: no published translation is held for this verse.
आसीनं हेमहस्ताग्रैर्दधानं हेमवंशिकाम् । दक्षिणेन भ्रामयंतं पाणिना हेमपंकजम्
āsīnaṃ hemahastāgrairdadhānaṃ hemavaṃśikām | dakṣiṇena bhrāmayaṃtaṃ pāṇinā hemapaṃkajam
Sanskrit only: no published translation is held for this verse.
हेमवर्णेष्टप्रियया परिकॢप्तांगचित्रकम् । हसंतमतिहर्षेण पश्यंतं निजमाश्रमम्
hemavarṇeṣṭapriyayā parikḷptāṃgacitrakam | hasaṃtamatiharṣeṇa paśyaṃtaṃ nijamāśramam
Sanskrit only: no published translation is held for this verse.
हर्षाश्रुपूर्णः पुलकाचितांगः प्रसीदनाथेति वदन्नथोच्चैः । दंडप्रणामाय पपात भूमौ संवेपमानस्त्रिजगद्विधातुः
harṣāśrupūrṇaḥ pulakācitāṃgaḥ prasīdanātheti vadannathoccaiḥ | daṃḍapraṇāmāya papāta bhūmau saṃvepamānastrijagadvidhātuḥ
Sanskrit only: no published translation is held for this verse.
तं भक्तिकामं पतितं धरण्यामायासितोस्मीति वदंतमुच्चैः । दंडप्रणामस्य भुजौ गृहीत्वा पस्पर्श हर्षोपचितेक्षणेन
taṃ bhaktikāmaṃ patitaṃ dharaṇyāmāyāsitosmīti vadaṃtamuccaiḥ | daṃḍapraṇāmasya bhujau gṛhītvā pasparśa harṣopacitekṣaṇena
Sanskrit only: no published translation is held for this verse.
उवाच च प्रियारूपं लब्धवंतं शुकं हरिः । त्वं मे प्रियतमा भद्रे सदा तिष्ठ ममांतिके
uvāca ca priyārūpaṃ labdhavaṃtaṃ śukaṃ hariḥ | tvaṃ me priyatamā bhadre sadā tiṣṭha mamāṃtike
Sanskrit only: no published translation is held for this verse.
मद्रूपं चिंतयंती च प्रेमास्पदमुपागता । द्वे च मुख्यतमे गोप्यौ समानवयसी शुभे
madrūpaṃ ciṃtayaṃtī ca premāspadamupāgatā | dve ca mukhyatame gopyau samānavayasī śubhe
Sanskrit only: no published translation is held for this verse.
एकव्रते एकनिष्ठे एकनक्षत्रनामनी । तप्तजांबूनदप्रख्या तत्रैवान्या तडित्प्रभा
ekavrate ekaniṣṭhe ekanakṣatranāmanī | taptajāṃbūnadaprakhyā tatraivānyā taḍitprabhā
Sanskrit only: no published translation is held for this verse.
एकानिद्रा यमाणाक्षी परा सौम्यायतेक्षणा । सोऽर्चयत्परया भक्त्या ते हरेः सव्यदक्षिणे
ekānidrā yamāṇākṣī parā saumyāyatekṣaṇā | so'rcayatparayā bhaktyā te hareḥ savyadakṣiṇe
Sanskrit only: no published translation is held for this verse.
स कल्पांते तनुं त्यक्त्वा गोकुलेऽभून्महात्मनः । उपनंदस्य दुहिता नीलोत्पलदलच्छविः
sa kalpāṃte tanuṃ tyaktvā gokule'bhūnmahātmanaḥ | upanaṃdasya duhitā nīlotpaladalacchaviḥ
Sanskrit only: no published translation is held for this verse.
सेयं श्रीकृष्णवनिता पीतशाटीपरिच्छदा । रक्तचोलिकया पूर्णा शातकुंभघटस्तनी
seyaṃ śrīkṛṣṇavanitā pītaśāṭīparicchadā | raktacolikayā pūrṇā śātakuṃbhaghaṭastanī
Sanskrit only: no published translation is held for this verse.
दधाना रक्तसिंदूरं सर्वांगस्यावगुंठनम् । स्वर्णकुंडलविभ्राजद्गंडदेशां सुशोभनाम्
dadhānā raktasiṃdūraṃ sarvāṃgasyāvaguṃṭhanam | svarṇakuṃḍalavibhrājadgaṃḍadeśāṃ suśobhanām
Sanskrit only: no published translation is held for this verse.
स्वर्णपंकजमालाढ्या कुंकुमालिप्तसुस्तनी । यस्या हस्ते चर्वणीयं दृश्यते हरिणार्पितम्
svarṇapaṃkajamālāḍhyā kuṃkumāliptasustanī | yasyā haste carvaṇīyaṃ dṛśyate hariṇārpitam
Sanskrit only: no published translation is held for this verse.
वेणुवाद्यातिनिपुणा केशवस्य निषेवणी । कृष्णेन परितुष्टेन कदाचिद्गीतकर्मणि
veṇuvādyātinipuṇā keśavasya niṣevaṇī | kṛṣṇena parituṣṭena kadācidgītakarmaṇi
Sanskrit only: no published translation is held for this verse.
विन्यस्ता कंबुकंठेऽस्या भाति गुंजावलि शुभा । परोक्षेपि च कृष्णस्य कांतिभिश्च स्मरार्दिता
vinyastā kaṃbukaṃṭhe'syā bhāti guṃjāvali śubhā | parokṣepi ca kṛṣṇasya kāṃtibhiśca smarārditā
Sanskrit only: no published translation is held for this verse.
सखीभिर्वादयंतीभिर्गायंती सुस्वरं परम् । नर्त्तयेत्प्रियवेषेण वेषयित्वा वधूमिमाम्
sakhībhirvādayaṃtībhirgāyaṃtī susvaraṃ param | narttayetpriyaveṣeṇa veṣayitvā vadhūmimām
Sanskrit only: no published translation is held for this verse.
वारंवारं च गोविंदं भावेनालिंग्य चुंबति । प्रियासौ सर्वगोपीनां कृष्णस्याप्यतिवल्लभा
vāraṃvāraṃ ca goviṃdaṃ bhāvenāliṃgya cuṃbati | priyāsau sarvagopīnāṃ kṛṣṇasyāpyativallabhā
Sanskrit only: no published translation is held for this verse.
श्वेतकेतोः सुतः कश्चिद्वेदवेदांगपारगः । सर्वमेव परित्यज्य प्रचंडं तप आस्थितः
śvetaketoḥ sutaḥ kaścidvedavedāṃgapāragaḥ | sarvameva parityajya pracaṃḍaṃ tapa āsthitaḥ
Sanskrit only: no published translation is held for this verse.
मुरारेः सेवितपदां सुधामधुरनादिनीम् । गोविंदस्य प्रियां शक्तिं ब्रह्मरुद्रादिदुर्गमाम्
murāreḥ sevitapadāṃ sudhāmadhuranādinīm | goviṃdasya priyāṃ śaktiṃ brahmarudrādidurgamām
Sanskrit only: no published translation is held for this verse.
भजंतीमेकभावेन श्रियमेव मनोहराम् । ध्यायञ्जजाप सततं मंत्रमेकादशाक्षरम्
bhajaṃtīmekabhāvena śriyameva manoharām | dhyāyañjajāpa satataṃ maṃtramekādaśākṣaram
Sanskrit only: no published translation is held for this verse.
हसितं सकलं कृत्वा बतमायेषु योजयन् । कांत्यादिभिर्हसंतीभिर्वासयंत्यभितो जगत्
hasitaṃ sakalaṃ kṛtvā batamāyeṣu yojayan | kāṃtyādibhirhasaṃtībhirvāsayaṃtyabhito jagat
Sanskrit only: no published translation is held for this verse.
वसंते वसतेत्येवं मंत्रार्थं चिंतयन्सदा । सोऽपि कल्पद्वयेनैव सिद्धोऽत्र जनिमाप्तवान्
vasaṃte vasatetyevaṃ maṃtrārthaṃ ciṃtayansadā | so'pi kalpadvayenaiva siddho'tra janimāptavān
Sanskrit only: no published translation is held for this verse.
सेयं बालायते पुत्री कृशांगी कुड्मलस्तनी । मुक्तावलिलसत्कंठी शुद्धकौशेयवासिनी
seyaṃ bālāyate putrī kṛśāṃgī kuḍmalastanī | muktāvalilasatkaṃṭhī śuddhakauśeyavāsinī
Sanskrit only: no published translation is held for this verse.
मुक्ताच्छुरितमंजीरकंकणांगदमुद्रिका । बिभ्रती कुंडले दिव्ये अमृतस्राविणी शुभे
muktācchuritamaṃjīrakaṃkaṇāṃgadamudrikā | bibhratī kuṃḍale divye amṛtasrāviṇī śubhe
Sanskrit only: no published translation is held for this verse.
वृत्तकस्तूरिकावेणी मध्ये सिंदूरबिंदुवत् । दधाना चित्रकं भाले सार्द्धं चंदनचित्रकैः
vṛttakastūrikāveṇī madhye siṃdūrabiṃduvat | dadhānā citrakaṃ bhāle sārddhaṃ caṃdanacitrakaiḥ
Sanskrit only: no published translation is held for this verse.
या सैव दृश्यते शांता जपंती परमं पदम् । आसीच्चंद्रप्रभो नाम राजर्षिः प्रियदर्शनः
yā saiva dṛśyate śāṃtā japaṃtī paramaṃ padam | āsīccaṃdraprabho nāma rājarṣiḥ priyadarśanaḥ
Sanskrit only: no published translation is held for this verse.
तस्य कृष्णप्रसादेन पुत्रोऽभून्मधुराकृतिः । चित्रध्वज इति ख्यातः कौमारावधि वैष्णवः
tasya kṛṣṇaprasādena putro'bhūnmadhurākṛtiḥ | citradhvaja iti khyātaḥ kaumārāvadhi vaiṣṇavaḥ
Sanskrit only: no published translation is held for this verse.
स राजा सुसुतं सौम्यं सुस्थिरं द्वादशाब्दिकम् । आदेशयद्द्विजान्मंत्रं परमष्टादशाक्षरम्
sa rājā susutaṃ saumyaṃ susthiraṃ dvādaśābdikam | ādeśayaddvijānmaṃtraṃ paramaṣṭādaśākṣaram
Sanskrit only: no published translation is held for this verse.
अभिषिच्यमानः स शिशुर्मंत्रामृतमयैर्जलैः । तत्क्षणे भूपतिं प्रेम्णा नत्वोदश्रुप्रकल्पितः
abhiṣicyamānaḥ sa śiśurmaṃtrāmṛtamayairjalaiḥ | tatkṣaṇe bhūpatiṃ premṇā natvodaśruprakalpitaḥ
Sanskrit only: no published translation is held for this verse.
तस्मिन्दिने स वै बालः शुचिवस्त्रधरः शुचिः । हारनूपुरसूत्राद्यैर्ग्रैवेयांगदकंकणैः
tasmindine sa vai bālaḥ śucivastradharaḥ śuciḥ | hāranūpurasūtrādyairgraiveyāṃgadakaṃkaṇaiḥ
Sanskrit only: no published translation is held for this verse.
विभूषितो हरेर्भक्तिमुपस्पृश्यामलाशयः । विष्णोरायतनं गत्वा स्थित्वैकाकी व्यचिंतयत्
vibhūṣito harerbhaktimupaspṛśyāmalāśayaḥ | viṣṇorāyatanaṃ gatvā sthitvaikākī vyaciṃtayat
Sanskrit only: no published translation is held for this verse.
कथं भजामि तं भक्तं मोहनं गोपयोषिताम् । विक्रीडंतं सदा ताभिः कालिंदीपुलिने वने
kathaṃ bhajāmi taṃ bhaktaṃ mohanaṃ gopayoṣitām | vikrīḍaṃtaṃ sadā tābhiḥ kāliṃdīpuline vane
Sanskrit only: no published translation is held for this verse.
इत्थमत्याकुलमतिश्चिंतयन्नेव बालकः । अथापपरमां विद्यां स्वप्नं च समवाप्यत
itthamatyākulamatiściṃtayanneva bālakaḥ | athāpaparamāṃ vidyāṃ svapnaṃ ca samavāpyata
Sanskrit only: no published translation is held for this verse.
आसीत्कृष्णप्रतिकृतिः पुरतस्तस्य शोभना । शिलामयी स्वर्णपीठे सर्वलक्षणलक्षिता
āsītkṛṣṇapratikṛtiḥ puratastasya śobhanā | śilāmayī svarṇapīṭhe sarvalakṣaṇalakṣitā
Sanskrit only: no published translation is held for this verse.
साभूदिंदीवरश्यामा स्निग्धलावण्यशालिनी । त्रिभंगललिताकार शिखंडी पिच्छभूषणा
sābhūdiṃdīvaraśyāmā snigdhalāvaṇyaśālinī | tribhaṃgalalitākāra śikhaṃḍī picchabhūṣaṇā
Sanskrit only: no published translation is held for this verse.
कूजयंती मुदा वेणुं कांचनीमधरेऽर्पिताम् । दक्षसव्यगताभ्यां च सुंदरीभ्यां निषेविताम्
kūjayaṃtī mudā veṇuṃ kāṃcanīmadhare'rpitām | dakṣasavyagatābhyāṃ ca suṃdarībhyāṃ niṣevitām
Sanskrit only: no published translation is held for this verse.
वर्द्धयंतीं तयोः कामं चुंबनाश्लेषणादिभिः । दृष्ट्वा चित्रध्वजः कृष्णं तादृग्वेषविलासिनम्
varddhayaṃtīṃ tayoḥ kāmaṃ cuṃbanāśleṣaṇādibhiḥ | dṛṣṭvā citradhvajaḥ kṛṣṇaṃ tādṛgveṣavilāsinam
Sanskrit only: no published translation is held for this verse.
अवनम्य शिरस्तस्मै पुरो लज्जितमानसः । अथोवाच हरिर्दक्षपार्श्वगां प्रेयसीं हसन्
avanamya śirastasmai puro lajjitamānasaḥ | athovāca harirdakṣapārśvagāṃ preyasīṃ hasan
Sanskrit only: no published translation is held for this verse.
सलज्जं परमं चैनं स्वशरीरासनागतम् । निर्मायात्मसमं दिव्यं युवतीरूपमद्भुतम्
salajjaṃ paramaṃ cainaṃ svaśarīrāsanāgatam | nirmāyātmasamaṃ divyaṃ yuvatīrūpamadbhutam
Sanskrit only: no published translation is held for this verse.
चिंतयस्व शरीरेण ह्यभेदं मृगलोचने । अथो त्वदंगतेजोभिः स्पृष्टस्त्वद्रूपमाप्स्यति
ciṃtayasva śarīreṇa hyabhedaṃ mṛgalocane | atho tvadaṃgatejobhiḥ spṛṣṭastvadrūpamāpsyati
Sanskrit only: no published translation is held for this verse.
ततः सा पद्मपत्राक्षी गत्वा चित्रध्वजांतिकम् । निजांगकैस्तदंगानामभेदं ध्यायती स्थिता
tataḥ sā padmapatrākṣī gatvā citradhvajāṃtikam | nijāṃgakaistadaṃgānāmabhedaṃ dhyāyatī sthitā
Sanskrit only: no published translation is held for this verse.
अथास्यास्त्वंगतेजांसि तदंगं पर्यपूरयन् । स्तनयोर्ज्योतिषा जातौ पीनौ चारुपयोधरौ
athāsyāstvaṃgatejāṃsi tadaṃgaṃ paryapūrayan | stanayorjyotiṣā jātau pīnau cārupayodharau
Sanskrit only: no published translation is held for this verse.
नितंबज्योतिषा जातं श्रोणिबिंबं मनोहरम् । कुंतलज्योतिषा केशपाशोऽभूत्करयोः करौ
nitaṃbajyotiṣā jātaṃ śroṇibiṃbaṃ manoharam | kuṃtalajyotiṣā keśapāśo'bhūtkarayoḥ karau
Sanskrit only: no published translation is held for this verse.
सर्वमेवं सुसंपन्नं भूषावासः स्रगादिकम् । कलासु कुशला जाता सौरभेनांतरात्मनि
sarvamevaṃ susaṃpannaṃ bhūṣāvāsaḥ sragādikam | kalāsu kuśalā jātā saurabhenāṃtarātmani
Sanskrit only: no published translation is held for this verse.
दीपाद्दीपमिवालोक्य सुभगां भुवि कन्यकाम् । चित्रध्वजां त्रपाभंगि स्मितशोभां मनोहराम्
dīpāddīpamivālokya subhagāṃ bhuvi kanyakām | citradhvajāṃ trapābhaṃgi smitaśobhāṃ manoharām
Sanskrit only: no published translation is held for this verse.
प्रेम्णा गृहीत्वा करयोः सा तामपहरन्मुदा । गोविंदवामपार्श्वस्थां प्रेयसीं परिरभ्य च
premṇā gṛhītvā karayoḥ sā tāmapaharanmudā | goviṃdavāmapārśvasthāṃ preyasīṃ parirabhya ca
Sanskrit only: no published translation is held for this verse.
उवाच तव दासीयं नाम चास्याश्चकार य । सेवां चास्यै वद प्रीत्या यथाभिरुचितां प्रियाम्
uvāca tava dāsīyaṃ nāma cāsyāścakāra ya | sevāṃ cāsyai vada prītyā yathābhirucitāṃ priyām
Sanskrit only: no published translation is held for this verse.
अथ चित्रकलेत्येतन्नाम चात्ममतेन सा । चकार चाह सेवार्थं धृत्वा चापि विपंचिकाम्
atha citrakaletyetannāma cātmamatena sā | cakāra cāha sevārthaṃ dhṛtvā cāpi vipaṃcikām
Sanskrit only: no published translation is held for this verse.
सदा त्वं निकटे तिष्ठ गायस्व विविधैः स्वरैः । गुणात्मन्प्राणनाथस्य तवायं विहितो विधिः
sadā tvaṃ nikaṭe tiṣṭha gāyasva vividhaiḥ svaraiḥ | guṇātmanprāṇanāthasya tavāyaṃ vihito vidhiḥ
Sanskrit only: no published translation is held for this verse.
अथ चित्रकला त्वाज्ञां गृहीत्वानम्य माधवम् । तत्प्रेयस्याश्च चरणं गृहीत्वा पादयो रजः
atha citrakalā tvājñāṃ gṛhītvānamya mādhavam | tatpreyasyāśca caraṇaṃ gṛhītvā pādayo rajaḥ
Sanskrit only: no published translation is held for this verse.
जगौ सुमधुरं गीतं तयोरानंदकारणम् । अथ प्रीत्योपगूढा सा कृष्णेनानंदमूर्तिना
jagau sumadhuraṃ gītaṃ tayorānaṃdakāraṇam | atha prītyopagūḍhā sā kṛṣṇenānaṃdamūrtinā
Sanskrit only: no published translation is held for this verse.