Padma Purāṇa 6.245

ताभिराश्वासिता देवी भवनांतरमाविशत् । ततो देवगणाः सर्वे विमानस्था नभस्तले

tābhirāśvāsitā devī bhavanāṃtaramāviśat | tato devagaṇāḥ sarve vimānasthā nabhastale

Sanskrit only: no published translation is held for this verse.

तुष्टुवुर्जयशब्देन पुंडरीकाक्षमच्युतम् । जहि कंसमिति प्राहुरुच्चैर्देवा मरुद्गणाः

tuṣṭuvurjayaśabdena puṃḍarīkākṣamacyutam | jahi kaṃsamiti prāhuruccairdevā marudgaṇāḥ

Sanskrit only: no published translation is held for this verse.

एतस्मिन्नंतरे तत्र तूर्यघोषनिनादिते । आसेदतुर्महामल्लौ यदुसिंहौ महाबलौ

etasminnaṃtare tatra tūryaghoṣaninādite | āsedaturmahāmallau yadusiṃhau mahābalau

Sanskrit only: no published translation is held for this verse.

चाणूरेण तु गोविंदो मुष्टिकेन हलायुधः । युयुधाते महात्मानौ नीलश्वेताद्रि सन्निभौ

cāṇūreṇa tu goviṃdo muṣṭikena halāyudhaḥ | yuyudhāte mahātmānau nīlaśvetādri sannibhau

Sanskrit only: no published translation is held for this verse.

मल्लयुद्धविधानेन मुष्टिभिः पादताडनैः । बभूव कदनं घोरं देवानां च भयावहम्

mallayuddhavidhānena muṣṭibhiḥ pādatāḍanaiḥ | babhūva kadanaṃ ghoraṃ devānāṃ ca bhayāvaham

Sanskrit only: no published translation is held for this verse.

चाणूरेण चिरं कालं क्रीडित्वाऽथ जनार्दनः । निष्पिष्य गांत्रं मल्लस्य पातयामास लीलया

cāṇūreṇa ciraṃ kālaṃ krīḍitvā'tha janārdanaḥ | niṣpiṣya gāṃtraṃ mallasya pātayāmāsa līlayā

Sanskrit only: no published translation is held for this verse.

स पपात महीपृष्ठे संवमन्रुधिरं बहु । ममार च महामल्लो देवदानवदुःखदः

sa papāta mahīpṛṣṭhe saṃvamanrudhiraṃ bahu | mamāra ca mahāmallo devadānavaduḥkhadaḥ

Sanskrit only: no published translation is held for this verse.

मुष्टिकेन तथा रामश्चिरकालमयुध्यत । मुष्टिभिस्ताडयामास तस्य वक्षसि वीर्यवान्

muṣṭikena tathā rāmaścirakālamayudhyata | muṣṭibhistāḍayāmāsa tasya vakṣasi vīryavān

Sanskrit only: no published translation is held for this verse.

भिन्नास्थि स्नायुबंधोऽसौ पपात धरणीतले । ततस्तु दुद्रुवुः सर्वे मल्ला दृष्ट्वा पराक्रमम्

bhinnāsthi snāyubaṃdho'sau papāta dharaṇītale | tatastu dudruvuḥ sarve mallā dṛṣṭvā parākramam

Sanskrit only: no published translation is held for this verse.

कंसो महद्भयं तीव्रमाविशद्वेदनातुरः । एतस्मिन्नंतरे वीरौ रामकृष्णौ दुरासदौ

kaṃso mahadbhayaṃ tīvramāviśadvedanāturaḥ | etasminnaṃtare vīrau rāmakṛṣṇau durāsadau

Sanskrit only: no published translation is held for this verse.

आरोहतुर्महात्मानौ चैत्यप्रासादमूर्जितम् । ताडयित्वा तलेनैव कंसं मूर्ध्नि जनार्दनः

ārohaturmahātmānau caityaprāsādamūrjitam | tāḍayitvā talenaiva kaṃsaṃ mūrdhni janārdanaḥ

Sanskrit only: no published translation is held for this verse.

अपातयद्धरा पृष्ठे प्रासादशिखराद्धरिः । स तु निर्भिन्नसर्वांगो धरण्यां त्यक्तजीवितः

apātayaddharā pṛṣṭhe prāsādaśikharāddhariḥ | sa tu nirbhinnasarvāṃgo dharaṇyāṃ tyaktajīvitaḥ

Sanskrit only: no published translation is held for this verse.

कृष्णेन निहते कंसे रामोऽपि सुमहाबलः । तस्यानुजं सुनामानं मुष्टिनैव जघान ह

kṛṣṇena nihate kaṃse rāmo'pi sumahābalaḥ | tasyānujaṃ sunāmānaṃ muṣṭinaiva jaghāna ha

Sanskrit only: no published translation is held for this verse.

धरण्यां पातयामासानुजं च धरणीधरः । हत्वा कंसं दुरात्मानं सानुजं रामकेशवौ

dharaṇyāṃ pātayāmāsānujaṃ ca dharaṇīdharaḥ | hatvā kaṃsaṃ durātmānaṃ sānujaṃ rāmakeśavau

Sanskrit only: no published translation is held for this verse.

पित्रोः समीपमागम्य भक्त्या चैव प्रणेमतुः । देवकीवसुदेवश्च परिष्वज्य मुहुर्मुहुः

pitroḥ samīpamāgamya bhaktyā caiva praṇematuḥ | devakīvasudevaśca pariṣvajya muhurmuhuḥ

Sanskrit only: no published translation is held for this verse.

स्नेहेन मूर्ध्न्युपाघ्राणं चक्रतुः पुत्रलालसौ । तयोरुपरि देवक्याः स्तनौ क्षीरं ववर्षतुः

snehena mūrdhnyupāghrāṇaṃ cakratuḥ putralālasau | tayorupari devakyāḥ stanau kṣīraṃ vavarṣatuḥ

Sanskrit only: no published translation is held for this verse.

तत आश्वास्य पितरौ रामकृष्णौ बहिर्गतौ । एतस्मिन्नंतरे देवि देवदुंदुभयो दिवि

tata āśvāsya pitarau rāmakṛṣṇau bahirgatau | etasminnaṃtare devi devaduṃdubhayo divi

Sanskrit only: no published translation is held for this verse.

विनेदुः पुष्पवर्षाणि ववृषुस्त्रिदशेश्वराः । स्तुत्वा मरुद्गणैर्दिव्यैर्नमस्कृत्य जनार्दनम्

vineduḥ puṣpavarṣāṇi vavṛṣustridaśeśvarāḥ | stutvā marudgaṇairdivyairnamaskṛtya janārdanam

Sanskrit only: no published translation is held for this verse.

परं हर्षमनुप्राप्य लोकान्स्वान्स्वान् प्रपेदिरे । नंदगोपं नमस्कृत्य गोपवृद्धांश्च केशवः

paraṃ harṣamanuprāpya lokānsvānsvān prapedire | naṃdagopaṃ namaskṛtya gopavṛddhāṃśca keśavaḥ

Sanskrit only: no published translation is held for this verse.

रामेण सह धर्मात्मा मुदा संपरिषस्वजे । बहुरत्नधनं तस्मै ददौ प्रीत्या जनार्दनः

rāmeṇa saha dharmātmā mudā saṃpariṣasvaje | bahuratnadhanaṃ tasmai dadau prītyā janārdanaḥ

Sanskrit only: no published translation is held for this verse.

सर्वांस्तान्गोपवृद्धांश्च वस्त्रैराभरणादिभिः । बहुभिर्धनधान्यैश्च पूजयामास केशवः

sarvāṃstāngopavṛddhāṃśca vastrairābharaṇādibhiḥ | bahubhirdhanadhānyaiśca pūjayāmāsa keśavaḥ

Sanskrit only: no published translation is held for this verse.

विसृष्टास्तेन कृष्णेन नंदगोपपुरोगमाः । प्रययुर्गोव्रजं दिव्यं हर्षशोकसमन्विताः

visṛṣṭāstena kṛṣṇena naṃdagopapurogamāḥ | prayayurgovrajaṃ divyaṃ harṣaśokasamanvitāḥ

Sanskrit only: no published translation is held for this verse.

मातामहं समासाद्य रामकृष्णौ दुरासदौ । बंधाद्विमोचयित्वाथ समाश्वास्य मुहुर्मुहुः

mātāmahaṃ samāsādya rāmakṛṣṇau durāsadau | baṃdhādvimocayitvātha samāśvāsya muhurmuhuḥ

Sanskrit only: no published translation is held for this verse.

चक्रे तस्याभिषेकं तु तद्राज्ये मधुसूदनः । अकारयद्द्विजश्रेष्ठैः स कंसस्योर्ध्वदैहिकम्

cakre tasyābhiṣekaṃ tu tadrājye madhusūdanaḥ | akārayaddvijaśreṣṭhaiḥ sa kaṃsasyordhvadaihikam

Sanskrit only: no published translation is held for this verse.

अक्रूरप्रमुखान्राज्ये संस्थाप्य यदुपुंगवान् । राजानमुग्रसेनं तु कृत्वा धर्मेण मेदिनीम् । पालयामास धर्मात्मा वसुदेवसुतो हरिः

akrūrapramukhānrājye saṃsthāpya yadupuṃgavān | rājānamugrasenaṃ tu kṛtvā dharmeṇa medinīm | pālayāmāsa dharmātmā vasudevasuto hariḥ

Sanskrit only: no published translation is held for this verse.