Rupa Gosvamin: Haribhaktirasamrtasindhu 4.7

बीभत्स-भक्ति-रसाख्या सप्तम-लहरी पुष्टिं निज-विभावाद्यैर् जुगुप्सा-रतिर् आगता । असौ भक्ति-रसो धीरैर् बीभत्साख्य इतीर्यते

bībhatsa-bhakti-rasākhyā saptama-laharī puṣṭiṃ nija-vibhāvādyair jugupsā-ratir āgatā | asau bhakti-raso dhīrair bībhatsākhya itīryate

Sanskrit only: no published translation is held for this verse.

अस्मिन्न् आश्रित-शान्ताद्या धीरैर् आलम्बना मताः

asminn āśrita-śāntādyā dhīrair ālambanā matāḥ

Sanskrit only: no published translation is held for this verse.

यथा-- पाण्डित्यं रत-हिण्डकाध्वनि गतो यः काम-दीक्षा-व्रती कुर्वन् पूर्वम् अशेष-षिड्ग-नगरी साम्राज्य-चर्याम् अभूत् । चित्रं सो ऽयम् उदीरयन् हरि-गुणान् उद्बाष्प-दृष्टिर् जनो दृष्टे स्त्री-वदने विकूणित-मुखो विष्टभ्य निष्ठीवति

yathā-- pāṇḍityaṃ rata-hiṇḍakādhvani gato yaḥ kāma-dīkṣā-vratī kurvan pūrvam aśeṣa-ṣiḍga-nagarī sāmrājya-caryām abhūt | citraṃ so 'yam udīrayan hari-guṇān udbāṣpa-dṛṣṭir jano dṛṣṭe strī-vadane vikūṇita-mukho viṣṭabhya niṣṭhīvati

Sanskrit only: no published translation is held for this verse.

अत्र निष्ठीवनं वक्त्र-कूणनं घ्राण-संवृतिः । धावनं कम्प-पुलक-प्रस्वेदाद्याश् च विक्रियाः

atra niṣṭhīvanaṃ vaktra-kūṇanaṃ ghrāṇa-saṃvṛtiḥ | dhāvanaṃ kampa-pulaka-prasvedādyāś ca vikriyāḥ

Sanskrit only: no published translation is held for this verse.

इह ग्लानि-श्रमोन्माद-मोह-निर्वेद-दीनताः । विषाद-चापलावेग-जाड्याद्यो व्यभिचारिणः

iha glāni-śramonmāda-moha-nirveda-dīnatāḥ | viṣāda-cāpalāvega-jāḍyādyo vyabhicāriṇaḥ

Sanskrit only: no published translation is held for this verse.

जुगुप्सा-रतिर् अत्र स्यात् स्थायी सा च विवेकजा । प्रायिकी चेति कथिता जुगुप्सा द्वि-विधा बुधैः

jugupsā-ratir atra syāt sthāyī sā ca vivekajā | prāyikī ceti kathitā jugupsā dvi-vidhā budhaiḥ

Sanskrit only: no published translation is held for this verse.

तत्र विवेकजा-- जात-कृष्ण-रतेर् भक्त-विशेषस्य तु कस्यचित् । विवेकोत्था तु देहादौ जुगुप्सा स्याद् विवेकजा

tatra vivekajā-- jāta-kṛṣṇa-rater bhakta-viśeṣasya tu kasyacit | vivekotthā tu dehādau jugupsā syād vivekajā

Sanskrit only: no published translation is held for this verse.

यथा-- घन-रुधिर-मये त्वचा पिनद्धे पिशित-विमिश्रित-विस्र-गन्ध-भाजि । कथम् इह रमतां बुधः शरीरे भगवति हन्त रतेर् लवे ऽप्य् उदीर्णे

yathā-- ghana-rudhira-maye tvacā pinaddhe piśita-vimiśrita-visra-gandha-bhāji | katham iha ramatāṃ budhaḥ śarīre bhagavati hanta rater lave 'py udīrṇe

Sanskrit only: no published translation is held for this verse.

अथ प्रायिकी-- अमेध्य-पूत्य्-अनुभवात् सर्वेषाम् एव सर्वतः । या प्रायो जायते सेयं जुगुप्सा प्रायिकी मता

atha prāyikī-- amedhya-pūty-anubhavāt sarveṣām eva sarvataḥ | yā prāyo jāyate seyaṃ jugupsā prāyikī matā

Sanskrit only: no published translation is held for this verse.

यथा-- असृङ्-मूत्राकीर्णे घन-शमल-पङ्क-व्यतिकरे वसन्न् एष क्लिन्नो जड-तनुर् अहं मातुर् उदरे । लभे चेतः-क्षोभं तव भजन-कर्माक्षमतया तद् अस्मिन् कंसारे कुरु मयि कृपा-सागर कृपाम्

yathā-- asṛṅ-mūtrākīrṇe ghana-śamala-paṅka-vyatikare vasann eṣa klinno jaḍa-tanur ahaṃ mātur udare | labhe cetaḥ-kṣobhaṃ tava bhajana-karmākṣamatayā tad asmin kaṃsāre kuru mayi kṛpā-sāgara kṛpām

Sanskrit only: no published translation is held for this verse.

यथा वा-- घ्राणोद्घूर्णक-पूत-गन्धि-विकटे कीटाकुले देहली- स्रस्त-व्याधित-यूथ-गूथ-घटना-निर्धूत-नेत्रायुषि । कारा-नामनि हन्त मागध-यमेनामी वयं नारके क्षिप्तास् ते स्मृतिम् आकलय्य नरक-ध्वंसिन्न् इह प्राणिमः

yathā vā-- ghrāṇodghūrṇaka-pūta-gandhi-vikaṭe kīṭākule dehalī- srasta-vyādhita-yūtha-gūtha-ghaṭanā-nirdhūta-netrāyuṣi | kārā-nāmani hanta māgadha-yamenāmī vayaṃ nārake kṣiptās te smṛtim ākalayya naraka-dhvaṃsinn iha prāṇimaḥ

Sanskrit only: no published translation is held for this verse.

लब्ध-कृष्ण-रतेर् एव सुष्ठु पूतं मनः सदा । क्षुभ्यत्य् अहृद्य् अलेशे ऽपि ततो ऽस्यां रत्य्-अनुग्रहः

labdha-kṛṣṇa-rater eva suṣṭhu pūtaṃ manaḥ sadā | kṣubhyaty ahṛdy aleśe 'pi tato 'syāṃ raty-anugrahaḥ

Sanskrit only: no published translation is held for this verse.

हास्यादीनां रसत्वं यद् गौणत्वेनापि कीर्तितम् । प्राचां मतानुसारेण तद् विज्ञेयं मनीषिभिः

hāsyādīnāṃ rasatvaṃ yad gauṇatvenāpi kīrtitam | prācāṃ matānusāreṇa tad vijñeyaṃ manīṣibhiḥ

Sanskrit only: no published translation is held for this verse.

अमी पञ्चैव शान्ताद्या हरेर् भक्ति-रसा मताः । एषु हास्यादयः प्रायो बिभ्रति व्यभिचारिताम्

amī pañcaiva śāntādyā harer bhakti-rasā matāḥ | eṣu hāsyādayaḥ prāyo bibhrati vyabhicāritām

Sanskrit only: no published translation is held for this verse.