Library·Ṛgveda Saṃhitā·10·10.168
वातस्य नु महिमानं रथस्य रुजन्न् एति स्तनयन्न् अस्य घोषः । दिविस्पृग् यात्य् अरुणानि कृण्वन्न् उतो एति पृथिव्या रेणुम् अस्यन् ॥
vātasya nu mahimānaṃ rathasya rujann eti stanayann asya ghoṣaḥ | divispṛg yāty aruṇāni kṛṇvann uto eti pṛthivyā reṇum asyan ||
O THE Wind's chariot, O its power and glory! Crashing it goes and hath a voice of thunder. It makes the regions red and touches heaven, and as it moves the dust of earth is scattered.
Translated by Ralph T. H. Griffith (1896)
सम् प्रेरते अनु वातस्य विष्ठा ऐनं गच्छन्ति समनं न योषाः । ताभिः सयुक् सरथं देव ईयते ऽस्य विश्वस्य भुवनस्य राजा ॥
sam prerate anu vātasya viṣṭhā ainaṃ gacchanti samanaṃ na yoṣāḥ | tābhiḥ sayuk sarathaṃ deva īyate 'sya viśvasya bhuvanasya rājā ||
Along the traces of the Wind they hurry, they come to him as dames to an assembly. Borne on his car with these for his attendants, the God speeds forth, the universe's Monarch.
Translated by Ralph T. H. Griffith (1896)
अन्तरिक्षे पथिभिर् ईयमानो न नि विशते कतमच् चनाहः । अपां सखा प्रथमजा ऋतावा क्व स्विज् जातः कुत आ बभूव ॥
antarikṣe pathibhir īyamāno na ni viśate katamac canāhaḥ | apāṃ sakhā prathamajā ṛtāvā kva svij jātaḥ kuta ā babhūva ||
Travelling on the paths of air's mid region, no single day doth he take rest or slumber. Holy and earliest-born, Friend of the waters, where did he spring and from what region came he?
Translated by Ralph T. H. Griffith (1896)
आत्मा देवानाम् भुवनस्य गर्भो यथावशं चरति देव एषः । घोषा इद् अस्य शृण्विरे न रूपं तस्मै वाताय हविषा विधेम ॥
ātmā devānām bhuvanasya garbho yathāvaśaṃ carati deva eṣaḥ | ghoṣā id asya śṛṇvire na rūpaṃ tasmai vātāya haviṣā vidhema ||
Germ of the world, the Deities' vital spirit, this God moves ever as his will inclines him. His voice is heard, his shape is ever viewless. Let us adore this Wind with our oblation.
Translated by Ralph T. H. Griffith (1896)