Asvaghosa: Saundarananda 5

सौन्दरनन्द महाकाव्ये "भार्यायाचितक" नाम चतुर्थ सर्ग समाप्त । पञ्चमः सर्गः नन्ददीक्षा अथावतीर्याश्वरथद्विपेभ्यः शाक्या यथास्वर्द्धिगृहीतवेषाः । महापणेभ्यो व्यवहारिणश्च महामुनौ भक्तिवशात् प्रणेमुः

saundarananda mahākāvye "bhāryāyācitaka" nāma caturtha sarga samāpta / pañcamaḥ sargaḥ nandadīkṣā athāvatīryāśvarathadvipebhyaḥ śākyā yathāsvarddhigṛhītaveṣāḥ / mahāpaṇebhyo vyavahāriṇaśca mahāmunau bhaktivaśāt praṇemuḥ

Sanskrit only: no published translation is held for this verse.

केचित् प्रणम्यानुययुर्मुहूर्त्तं केचित् प्रणम्यार्थवशेन जग्मुः । केचित् स्वकेष्वावसथेषु तस्थुः कृत्वाञ्जलीन् वीक्षणतत्पराक्षाः

kecit praṇamyānuyayurmuhūrttaṃ kecit praṇamyārthavaśena jagmuḥ / kecit svakeṣvāvasatheṣu tasthuḥ kṛtvāñjalīn vīkṣaṇatatparākṣāḥ

Sanskrit only: no published translation is held for this verse.

बुद्धस्ततस्तत्र नरेन्द्रमार्गे स्रोतो महद्भक्तिमतो जनस्य । जगाम दुःखेन विगाहमानो जलागमे स्त्रोत इवापगायाः

buddhastatastatra narendramārge sroto mahadbhaktimato janasya / jagāma duḥkhena vigāhamāno jalāgame strota ivāpagāyāḥ

Sanskrit only: no published translation is held for this verse.

अथो महद्भिः पति संपतद्भिः संपूज्यमानाय तथागताय । कर्त्तुं प्रणामं न शशाक नन्दस्तेनाभिरेमे तु गुरोर्महिम्ना

atho mahadbhiḥ pati saṃpatadbhiḥ saṃpūjyamānāya tathāgatāya / karttuṃ praṇāmaṃ na śaśāka nandastenābhireme tu gurormahimnā

Sanskrit only: no published translation is held for this verse.

स्वं चावसङ्गं पथि निर्मुमुक्षुर्भक्तिं जनस्यान्यमतेश्व रक्षन् । नन्दं च गेहाभिमुखं जिघृक्षन् मार्गं ततो ऽन्यं सुगतः प्रपेदे

svaṃ cāvasaṅgaṃ pathi nirmumukṣurbhaktiṃ janasyānyamateśva rakṣan / nandaṃ ca gehābhimukhaṃ jighṛkṣan mārgaṃ tato 'nyaṃ sugataḥ prapede

Sanskrit only: no published translation is held for this verse.

ततो विविक्तं च विविक्तचेताः सन्मार्गविन् मार्गमभिप्रतस्थे । गत्वाग्रतश्चाग्र्यतमाय तस्मै नान्दीविमुक्ताय ननाम नन्दः

tato viviktaṃ ca viviktacetāḥ sanmārgavin mārgamabhipratasthe / gatvāgrataścāgryatamāya tasmai nāndīvimuktāya nanāma nandaḥ

Sanskrit only: no published translation is held for this verse.

शनैर्व्रजन्नेव स गौरवेण पटावृतांसो विनतार्धकायः । अधोनिबद्धाञ्जलिरूर्ध्वनेत्रः सगद्गदं वाक्यमिदं बभाषे

śanairvrajanneva sa gauraveṇa paṭāvṛtāṃso vinatārdhakāyaḥ / adhonibaddhāñjalirūrdhvanetraḥ sagadgadaṃ vākyamidaṃ babhāṣe

Sanskrit only: no published translation is held for this verse.

प्रासादसंस्थो भगवन्तमन्तःप्रविष्टमश्रौषमनुग्रहाय । अतस्त्वरावानहमभ्युपेतो गृहस्य कक्ष्यामहतो ऽभ्यसूयन्

prāsādasaṃstho bhagavantamantaḥpraviṣṭamaśrauṣamanugrahāya / atastvarāvānahamabhyupeto gṛhasya kakṣyāmahato 'bhyasūyan

Sanskrit only: no published translation is held for this verse.

तत्साधु साहुप्रिय मत्त्प्रियार्थम् तत्रास्तु भिक्षूत्तम भैक्षकालः । असौ हि मध्यं नभसो यियासुः कालं प्रतिस्मारयतीव सूर्यः

tatsādhu sāhupriya mattpriyārtham tatrāstu bhikṣūttama bhaikṣakālaḥ / asau hi madhyaṃ nabhaso yiyāsuḥ kālaṃ pratismārayatīva sūryaḥ

Sanskrit only: no published translation is held for this verse.

इत्येवमुक्तः प्रणतेन तेन स्नेहाभिमानोन्मुखलोचनेन । तादृङ् निमित्तं सुगतश्चकार नाहारकृत्यं स यथा विवेद

ityevamuktaḥ praṇatena tena snehābhimānonmukhalocanena / tādṛṅ nimittaṃ sugataścakāra nāhārakṛtyaṃ sa yathā viveda

Sanskrit only: no published translation is held for this verse.

ततः स कृत्वा मुनये प्रणामं गृहप्रयाणाय मतिं चकार । अनुग्रहार्थं सुगतस्तु तस्मै पात्रं ददौ पुरष्करपत्रनेत्रः

tataḥ sa kṛtvā munaye praṇāmaṃ gṛhaprayāṇāya matiṃ cakāra / anugrahārthaṃ sugatastu tasmai pātraṃ dadau puraṣkarapatranetraḥ

Sanskrit only: no published translation is held for this verse.

ततः स लोके ददतः फलार्थं पात्रस्य तस्याप्रतिमस्य पात्रम् । जग्राह चापग्रहणक्षमाभ्यां पद्मोपमाभ्यां प्रयतः कराभ्याम्

tataḥ sa loke dadataḥ phalārthaṃ pātrasya tasyāpratimasya pātram / jagrāha cāpagrahaṇakṣamābhyāṃ padmopamābhyāṃ prayataḥ karābhyām

Sanskrit only: no published translation is held for this verse.

पराङ्मुखन्त्वन्यमनस्कमाराद् विज्ञाय नन्दः सुगतं गतास्थम् । हस्तस्थपात्रो ऽपि गृहं यियासुः ससार मार्गान्मुनिमीक्षमाणः

parāṅmukhantvanyamanaskamārād vijñāya nandaḥ sugataṃ gatāstham / hastasthapātro 'pi gṛhaṃ yiyāsuḥ sasāra mārgānmunimīkṣamāṇaḥ

Sanskrit only: no published translation is held for this verse.

भार्यानुरागेण यदा गृहं स पात्रं गृहीत्वापि यियासुरेव । विमोहयामास मुनिस्ततस्तं रथ्यामुखस्यावरणेन तस्य

bhāryānurāgeṇa yadā gṛhaṃ sa pātraṃ gṛhītvāpi yiyāsureva / vimohayāmāsa munistatastaṃ rathyāmukhasyāvaraṇena tasya

Sanskrit only: no published translation is held for this verse.

निर्मोक्षबीजं हि ददर्श तस्य ज्ञानं मृदु क्लेशरजश्च तीव्रम् । क्लेशानुकूलं विषयात्मकं च नन्दं यतस्तं मुनिराचकर्ष

nirmokṣabījaṃ hi dadarśa tasya jñānaṃ mṛdu kleśarajaśca tīvram / kleśānukūlaṃ viṣayātmakaṃ ca nandaṃ yatastaṃ munirācakarṣa

Sanskrit only: no published translation is held for this verse.

संक्लेशपक्षो द्विविधश्च दृष्टस्तथा द्विकल्पो व्यवदानपक्षः । आत्माश्रयो हेतुबलाधिकस्य बाह्याश्रयः प्रत्ययगौरवस्य

saṃkleśapakṣo dvividhaśca dṛṣṭastathā dvikalpo vyavadānapakṣaḥ / ātmāśrayo hetubalādhikasya bāhyāśrayaḥ pratyayagauravasya

Sanskrit only: no published translation is held for this verse.

अयत्नतो हेतुबलाधिकस्तु निर्मुच्यते घट्टितमात्र एव । यत्नेन तु प्रत्ययनेयबुद्धिर्विमोक्षमाप्नोति पराश्रयेण

ayatnato hetubalādhikastu nirmucyate ghaṭṭitamātra eva / yatnena tu pratyayaneyabuddhirvimokṣamāpnoti parāśrayeṇa

Sanskrit only: no published translation is held for this verse.

नन्दः स च प्रत्ययनेयचेता यं शिश्रिये तन्मयतामवाप । यस्मादिमं तत्र चकार यन्नं तं स्नेहपङ्कान् मुनिरुज्जिहीर्षन्

nandaḥ sa ca pratyayaneyacetā yaṃ śiśriye tanmayatāmavāpa / yasmādimaṃ tatra cakāra yannaṃ taṃ snehapaṅkān munirujjihīrṣan

Sanskrit only: no published translation is held for this verse.

नन्दस्तु दुःखेन विचेष्टमानः शनैरगत्या गुरुमन्वगच्छत् । भार्यामुखं वीक्षणलोलनेत्रं विचिन्तयन्नार्द्रविशेषकं तत्

nandastu duḥkhena viceṣṭamānaḥ śanairagatyā gurumanvagacchat / bhāryāmukhaṃ vīkṣaṇalolanetraṃ vicintayannārdraviśeṣakaṃ tat

Sanskrit only: no published translation is held for this verse.

ततो मुनिस्तं प्रियमाल्यहारं वसन्तमासेन कृताभिहारम् । निनाय भग्नप्रमदाविहारं विद्याविहाराभिमतं विहारम्

tato munistaṃ priyamālyahāraṃ vasantamāsena kṛtābhihāram / nināya bhagnapramadāvihāraṃ vidyāvihārābhimataṃ vihāram

Sanskrit only: no published translation is held for this verse.

दीनं महाकारुणिकस्ततस्तं दृष्ट्वा मुहूर्त करुणायमानः । करेण चक्राङ्कतलेन मूर्ध्नि पस्पर्श चैवेदमुवाच चैनम्

dīnaṃ mahākāruṇikastatastaṃ dṛṣṭvā muhūrta karuṇāyamānaḥ / kareṇa cakrāṅkatalena mūrdhni pasparśa caivedamuvāca cainam

Sanskrit only: no published translation is held for this verse.

यावन्न हिंस्रः समुपैति कालः शमाय तावत् कुरु सौम्य बुद्धिम् । सर्वास्ववस्थास्विह वर्तमानं सर्वाभिसारेण निहन्ति मृत्युः

yāvanna hiṃsraḥ samupaiti kālaḥ śamāya tāvat kuru saumya buddhim / sarvāsvavasthāsviha vartamānaṃ sarvābhisāreṇa nihanti mṛtyuḥ

Sanskrit only: no published translation is held for this verse.

साधारणात् स्वप्ननिभादसाराल्लोलं मनः कामसुखान्नियच्छ । हव्यैरिवाग्नेः पवनेरितस्य लोकस्य कामैर्न हि तृप्तिरस्ति

sādhāraṇāt svapnanibhādasārāllolaṃ manaḥ kāmasukhānniyaccha / havyairivāgneḥ pavaneritasya lokasya kāmairna hi tṛptirasti

Sanskrit only: no published translation is held for this verse.

श्रद्धाधनं श्रेष्ठतमं धनेभ्यः प्रज्ञारससृप्तिकरो रसेभ्यः । प्रधानमध्यात्मसुखं सुखेभ्यो ऽविद्यारतिर्दुःखतमारतिभ्यः

śraddhādhanaṃ śreṣṭhatamaṃ dhanebhyaḥ prajñārasasṛptikaro rasebhyaḥ / pradhānamadhyātmasukhaṃ sukhebhyo 'vidyāratirduḥkhatamāratibhyaḥ

Sanskrit only: no published translation is held for this verse.

हितस्य वक्ता प्रवरः सुहृद्भ्यो धर्माय खेदो गुणवान् श्रमेभ्यः । ज्ञानाय कृत्यं परमं क्रियाभ्यः किमिन्द्रियाणामुपगम्य दास्यम्

hitasya vaktā pravaraḥ suhṛdbhyo dharmāya khedo guṇavān śramebhyaḥ / jñānāya kṛtyaṃ paramaṃ kriyābhyaḥ kimindriyāṇāmupagamya dāsyam

Sanskrit only: no published translation is held for this verse.

तन्निश्चितं भील्कमशुग्वियुक्तं परेष्वनायत्तमहार्यमन्यैः । नित्यं शिवं शान्तिसुखं वृणीष्व किमिन्द्रियार्थार्थमनर्थमूढ्वा

tanniścitaṃ bhīlkamaśugviyuktaṃ pareṣvanāyattamahāryamanyaiḥ / nityaṃ śivaṃ śāntisukhaṃ vṛṇīṣva kimindriyārthārthamanarthamūḍhvā

Sanskrit only: no published translation is held for this verse.

जरासमा नास्त्यमृजा प्रजानां व्याधेः समो नास्ति जगत्यनर्थः । मृत्योः समं नास्ति भयं पृथिव्यामेतत्त्रयं खल्ववशेन सेव्यम्

jarāsamā nāstyamṛjā prajānāṃ vyādheḥ samo nāsti jagatyanarthaḥ / mṛtyoḥ samaṃ nāsti bhayaṃ pṛthivyāmetattrayaṃ khalvavaśena sevyam

Sanskrit only: no published translation is held for this verse.

स्नेहेन कश्चिन्न समो ऽस्ति पाशः स्रोतो न तृष्णासममस्ति हारि । रागाग्निना नास्ति समस्तथाग्निस्तच्चेत् त्रयं नास्ति सुखं च ते ऽस्ति

snehena kaścinna samo 'sti pāśaḥ sroto na tṛṣṇāsamamasti hāri / rāgāgninā nāsti samastathāgnistaccet trayaṃ nāsti sukhaṃ ca te 'sti

Sanskrit only: no published translation is held for this verse.

अवश्यभावी प्रियविप्रयोगस्तस्माञ्च शोको नियतं निषेव्यः । शोकेन चोन्मादमुपेयिवांसो राजर्षयो ऽन्ये ऽप्यवशा विचेलु

avaśyabhāvī priyaviprayogastasmāñca śoko niyataṃ niṣevyaḥ / śokena conmādamupeyivāṃso rājarṣayo 'nye 'pyavaśā vicelu

Sanskrit only: no published translation is held for this verse.

प्रज्ञामयं वर्म बधान तस्मान्नो क्षान्तिनिघ्नस्य हि शोकबाणाः । महच्च दग्धुं भवकक्षजालं संघुक्षयाल्पाग्निमिवात्मतेजः

prajñāmayaṃ varma badhāna tasmānno kṣāntinighnasya hi śokabāṇāḥ / mahacca dagdhuṃ bhavakakṣajālaṃ saṃghukṣayālpāgnimivātmatejaḥ

Sanskrit only: no published translation is held for this verse.

यथौषधैर्हस्तगतैः सविद्यो न दश्यते कश्चन पन्नगेन । तथानपेक्षो जितलोकमोहो न दश्यते शोकभुजंगमेन

yathauṣadhairhastagataiḥ savidyo na daśyate kaścana pannagena / tathānapekṣo jitalokamoho na daśyate śokabhujaṃgamena

Sanskrit only: no published translation is held for this verse.

आस्थाय योगं परिगम्य तत्त्वं न त्रासमागच्छति मृत्युकाले । आबद्धवर्मा सुधनुः कृतास्रो जिगीषया शूर इवाहवस्थः

āsthāya yogaṃ parigamya tattvaṃ na trāsamāgacchati mṛtyukāle / ābaddhavarmā sudhanuḥ kṛtāsro jigīṣayā śūra ivāhavasthaḥ

Sanskrit only: no published translation is held for this verse.

इत्येवमुक्तः स तथागतेन सर्वेषु भूतेष्वनुकम्पकेन । धृष्टं गिरान्तर्हृदयेन सीदंस्तथेति नन्दः सुगतं बभाषे

ityevamuktaḥ sa tathāgatena sarveṣu bhūteṣvanukampakena / dhṛṣṭaṃ girāntarhṛdayena sīdaṃstatheti nandaḥ sugataṃ babhāṣe

Sanskrit only: no published translation is held for this verse.

अथ प्रमादाच्च तमुज्जिहीर्षन् मत्वागमस्यैव च पात्रभूतम् । प्रब्राजयानन्द शमाय नन्दमित्यब्रवीन्मैत्रमना महर्षिः

atha pramādācca tamujjihīrṣan matvāgamasyaiva ca pātrabhūtam / prabrājayānanda śamāya nandamityabravīnmaitramanā maharṣiḥ

Sanskrit only: no published translation is held for this verse.

नन्दं ततो ऽन्तर्मनसा रुदन्तमेहीति वैदेहमुनिर्जगाद । शनैस्ततस्तं समुपेत्य नन्दो न प्रव्रजिष्याम्यहमित्युवाच

nandaṃ tato 'ntarmanasā rudantamehīti vaidehamunirjagāda / śanaistatastaṃ samupetya nando na pravrajiṣyāmyahamityuvāca

Sanskrit only: no published translation is held for this verse.

श्रुत्वाथ नन्दस्य मनीषितं तद् बुद्धाय वैदेहमुनिः शशंस । संश्रुत्य तस्मादपि तस्य भावं महामुनिर्नन्दमुवाच भूयः

śrutvātha nandasya manīṣitaṃ tad buddhāya vaidehamuniḥ śaśaṃsa / saṃśrutya tasmādapi tasya bhāvaṃ mahāmunirnandamuvāca bhūyaḥ

Sanskrit only: no published translation is held for this verse.

मय्यग्रजे प्रव्रजिते ऽजितात्मन् भ्रातृष्वनुप्रव्रजितेषु चास्मान् । ज्ञातींश्च दृष्ट्वा व्रतिनो गृहस्थान् संविन्न किं ते ऽस्ति न वास्ति चेतः

mayyagraje pravrajite 'jitātman bhrātṛṣvanupravrajiteṣu cāsmān / jñātīṃśca dṛṣṭvā vratino gṛhasthān saṃvinna kiṃ te 'sti na vāsti cetaḥ

Sanskrit only: no published translation is held for this verse.

राजर्षयस्ते विदिता न नूनं वनानि ये शिश्रियिरे हसन्तः । निष्ठीव्य कामानुपशान्तिकामाः कामेषु नैवं कृपणेषु सक्ताः

rājarṣayaste viditā na nūnaṃ vanāni ye śiśriyire hasantaḥ / niṣṭhīvya kāmānupaśāntikāmāḥ kāmeṣu naivaṃ kṛpaṇeṣu saktāḥ

Sanskrit only: no published translation is held for this verse.

भूयः समालोक्य गृहेषु दोषान् निशाम्य तत्त्यागकृतं च शर्म । नैवास्ति मोक्तुं मतिरालयं ते देशं मुमूर्षोरिव सोपसर्गम्

bhūyaḥ samālokya gṛheṣu doṣān niśāmya tattyāgakṛtaṃ ca śarma / naivāsti moktuṃ matirālayaṃ te deśaṃ mumūrṣoriva sopasargam

Sanskrit only: no published translation is held for this verse.

संसारकान्तारपरायणस्य शिवे कथं ते पथि नारुरुक्षा । आरोप्यमाणस्य तमेव मार्गं भ्रष्टस्य सार्थादिव सार्थिकस्य

saṃsārakāntāraparāyaṇasya śive kathaṃ te pathi nārurukṣā / āropyamāṇasya tameva mārgaṃ bhraṣṭasya sārthādiva sārthikasya

Sanskrit only: no published translation is held for this verse.

यः सर्वतो वेश्मनि दह्यमाने शयीत मोहान्न ततो व्यपेयात् । कालाग्निना व्याधिजराशिखेन लोके प्रदीप्ते स भवेत् प्रमत्तः

yaḥ sarvato veśmani dahyamāne śayīta mohānna tato vyapeyāt / kālāgninā vyādhijarāśikhena loke pradīpte sa bhavet pramattaḥ

Sanskrit only: no published translation is held for this verse.

प्रणीयमानश्च यथा वधाय मत्तो हसेच्च प्रलपेच्च वध्यः । मृत्यौ तथा तिष्ठति पाशहस्ते शोच्यः प्रमाद्यन् विपरितचेताः

praṇīyamānaśca yathā vadhāya matto hasecca pralapecca vadhyaḥ / mṛtyau tathā tiṣṭhati pāśahaste śocyaḥ pramādyan viparitacetāḥ

Sanskrit only: no published translation is held for this verse.

यदा नरेन्द्राश्च कुटुम्बिनश्च विहाय बन्धूंश्च परिग्रहांश्च । ययुश्च यास्यन्ति च यान्ति चैव प्रियेष्वनित्येषु कुतो ऽनुरोधः

yadā narendrāśca kuṭumbinaśca vihāya bandhūṃśca parigrahāṃśca / yayuśca yāsyanti ca yānti caiva priyeṣvanityeṣu kuto 'nurodhaḥ

Sanskrit only: no published translation is held for this verse.

किञ्चिन्न पश्यामि रतस्य यत्र तदन्यभावेन भवेन्न दुःखम् । तस्मात् क्वचिन्न क्षमते प्रसक्तिर्यदि क्षमस्तद्विगमान्न शोकः

kiñcinna paśyāmi ratasya yatra tadanyabhāvena bhavenna duḥkham / tasmāt kvacinna kṣamate prasaktiryadi kṣamastadvigamānna śokaḥ

Sanskrit only: no published translation is held for this verse.

तत्सौम्य लोलं परिगम्य लोकं मायोपमं चित्रमिवेन्द्रजालम् । प्रियाभिधानं त्यज मोहजालं छेत्तुं मतिस्ते यदि दुःखजालम्

tatsaumya lolaṃ parigamya lokaṃ māyopamaṃ citramivendrajālam / priyābhidhānaṃ tyaja mohajālaṃ chettuṃ matiste yadi duḥkhajālam

Sanskrit only: no published translation is held for this verse.

वरं हितोदर्कमानिष्टमन्नं न स्वादु यत् स्यादहितानुबद्धम् । यस्मादहं त्वां विनियोजयामि शिवे शुचौ वर्त्मनि विप्रिये ऽपि

varaṃ hitodarkamāniṣṭamannaṃ na svādu yat syādahitānubaddham / yasmādahaṃ tvāṃ viniyojayāmi śive śucau vartmani vipriye 'pi

Sanskrit only: no published translation is held for this verse.

बालस्य धात्री विनिगृह्य लोष्ठं यथोद्धरत्यास्यपुटप्रविष्टम् । तथोज्जिहीर्षुः खलु रागशल्यं तत्त्वामवोचं परुषं हिताय

bālasya dhātrī vinigṛhya loṣṭhaṃ yathoddharatyāsyapuṭapraviṣṭam / tathojjihīrṣuḥ khalu rāgaśalyaṃ tattvāmavocaṃ paruṣaṃ hitāya

Sanskrit only: no published translation is held for this verse.

अनिष्टमप्यौषधमातुराय ददाति वैद्यश्च यथा निगृह्य । तद्वन्मयोक्तं प्रतिकूलमेतत्तुभ्यं हितोदर्कमनुग्रहाय

aniṣṭamapyauṣadhamāturāya dadāti vaidyaśca yathā nigṛhya / tadvanmayoktaṃ pratikūlametattubhyaṃ hitodarkamanugrahāya

Sanskrit only: no published translation is held for this verse.

तद्यावदेव क्षणसंनिपातो न मृत्युरागच्छति यावदेव । यावद्वयो योगविधौ समर्थं बुद्धिं कुरु श्रेयसि तावदेव

tadyāvadeva kṣaṇasaṃnipāto na mṛtyurāgacchati yāvadeva / yāvadvayo yogavidhau samarthaṃ buddhiṃ kuru śreyasi tāvadeva

Sanskrit only: no published translation is held for this verse.

इत्येवमुक्तः स विनायकेन हितैषिणा कारुणिकेन नन्दः । कर्तास्मि सर्वं भगवन् वचस्ते तथा यथाज्ञापयसीत्युवाच

ityevamuktaḥ sa vināyakena hitaiṣiṇā kāruṇikena nandaḥ / kartāsmi sarvaṃ bhagavan vacaste tathā yathājñāpayasītyuvāca

Sanskrit only: no published translation is held for this verse.

आदाय वैदेहमुनिस्ततस्तं निनाय संश्लिष्य विचेष्टमानम् । व्ययोजयच्चाश्रुपरिप्लुताक्षं केशश्रियं छत्रनिभस्य मूर्ध्नः

ādāya vaidehamunistatastaṃ nināya saṃśliṣya viceṣṭamānam / vyayojayaccāśrupariplutākṣaṃ keśaśriyaṃ chatranibhasya mūrdhnaḥ

Sanskrit only: no published translation is held for this verse.

अथो नतं तस्य मुखं सबाष्पं प्रवास्यमानेषु शिरोरुहेषु । वक्राग्रनालं नलिनं तडागे वर्षोदकक्लिन्नमिवाबभासे

atho nataṃ tasya mukhaṃ sabāṣpaṃ pravāsyamāneṣu śiroruheṣu / vakrāgranālaṃ nalinaṃ taḍāge varṣodakaklinnamivābabhāse

Sanskrit only: no published translation is held for this verse.

नन्दस्ततस्तरुकषायविरक्तवासाश्चिन्तावशो नवगृहीत इव द्विपेन्द्रः । पूर्णः शशी बहुलपक्षगतः क्षपान्ते बालातपेन परिषिक्त इवावभासे

nandastatastarukaṣāyaviraktavāsāścintāvaśo navagṛhīta iva dvipendraḥ / pūrṇaḥ śaśī bahulapakṣagataḥ kṣapānte bālātapena pariṣikta ivāvabhāse

Sanskrit only: no published translation is held for this verse.