Somadeva: Kathasaritsagara 10.9

तावत् स स हिरण्याक्षो भूत्वा विद्याधरेश्वरः । स्मृत्वा शापक्षयाज्जातिं तापसीं ताम् अभाषत

tāvat sa sa hiraṇyākṣo bhūtvā vidyādhareśvaraḥ / smṛtvā śāpakṣayājjātiṃ tāpasīṃ tām abhāṣata

Sanskrit only: no published translation is held for this verse.

हिमाद्रौ वज्रकूटाख्ये पुरे जानीहि मामियम् । विद्याधराणां राजानं नाम्नाप्यमृततेजसम्

himādrau vajrakūṭākhye pure jānīhi māmiyam / vidyādharāṇāṃ rājānaṃ nāmnāpyamṛtatejasam

Sanskrit only: no published translation is held for this verse.

सो ऽहमुल्लङ्घनक्रोधाच्छापं प्राप्य पुरा मुनेः । मर्त्ययोनिम् उपागच्छं त्वत्करस्पर्शनावधिम्

so 'hamullaṅghanakrodhācchāpaṃ prāpya purā muneḥ / martyayonim upāgacchaṃ tvatkarasparśanāvadhim

Sanskrit only: no published translation is held for this verse.

शप्तस्य मे तदा भार्या या दुःखादजहत्तनुम् । सैषा मृगाङ्कलेखाद्य जाता पूर्वप्रिया मम

śaptasya me tadā bhāryā yā duḥkhādajahattanum / saiṣā mṛgāṅkalekhādya jātā pūrvapriyā mama

Sanskrit only: no published translation is held for this verse.

इदानीं च त्वया सार्धं गत्वा प्राप्स्यामि तामहम् । त्वत्करस्पर्शपूतस्य शान्तः शापो हि सो ऽद्य मे

idānīṃ ca tvayā sārdhaṃ gatvā prāpsyāmi tāmaham / tvatkarasparśapūtasya śāntaḥ śāpo hi so 'dya me

Sanskrit only: no published translation is held for this verse.

इति ब्रुवंस्तया साकं तापस्या गगनेन सः । जगामामृततेजास्तं हिमाद्रिं द्युचराधिपः

iti bruvaṃstayā sākaṃ tāpasyā gaganena saḥ / jagāmāmṛtatejāstaṃ himādriṃ dyucarādhipaḥ

Sanskrit only: no published translation is held for this verse.

मृगाङ्कलेखाम् उद्यानस्थितां तत्र ददर्श सः । साप्य् अपश्यत् तम् आयान्तं तापस्यावेदितं तया

mṛgāṅkalekhām udyānasthitāṃ tatra dadarśa saḥ / sāpy apaśyat tam āyāntaṃ tāpasyāveditaṃ tayā

Sanskrit only: no published translation is held for this verse.

चित्रं श्रुतिपथेनादौ प्रविश्यान्योन्यमानसम् । अनिर्गत्याप्यविशतां दृष्टिमार्गेण तौ पुनः

citraṃ śrutipathenādau praviśyānyonyamānasam / anirgatyāpyaviśatāṃ dṛṣṭimārgeṇa tau punaḥ

Sanskrit only: no published translation is held for this verse.

विवाहसिद्धये पित्रे त्वयेदं कथ्यतामिति । ऊचे मृगाङ्कलेखात्र तापस्या प्रौढया तया

vivāhasiddhaye pitre tvayedaṃ kathyatāmiti / ūce mṛgāṅkalekhātra tāpasyā prauḍhayā tayā

Sanskrit only: no published translation is held for this verse.

ततो लज्जानतमुखी सा गत्वा पितरं निजम् । सखीमुखेन तत्सर्वं बोधयाम् आस तत्क्षणम्

tato lajjānatamukhī sā gatvā pitaraṃ nijam / sakhīmukhena tatsarvaṃ bodhayām āsa tatkṣaṇam

Sanskrit only: no published translation is held for this verse.

सो ऽपि स्वप्ने ऽम्बिकादिष्टस्तत्पिता खेचरेश्वरः । तमनैषीत्स्वभवनं संमान्यामृततेजसम्

so 'pi svapne 'mbikādiṣṭastatpitā khecareśvaraḥ / tamanaiṣītsvabhavanaṃ saṃmānyāmṛtatejasam

Sanskrit only: no published translation is held for this verse.

ददौ मृगाङ्कलेखां च तस्मै तां स यथाविधि । कृतोद्वाहश् च तं वज्रकूटं स्वं प्रययौ पुरम्

dadau mṛgāṅkalekhāṃ ca tasmai tāṃ sa yathāvidhi / kṛtodvāhaś ca taṃ vajrakūṭaṃ svaṃ prayayau puram

Sanskrit only: no published translation is held for this verse.

तत्र सो ऽमृततेजाः स्वं राज्यं प्राप्य सभार्यकम् । आनीतं सिद्धतापस्या मर्त्यत्वात्पितरं निजम्

tatra so 'mṛtatejāḥ svaṃ rājyaṃ prāpya sabhāryakam / ānītaṃ siddhatāpasyā martyatvātpitaraṃ nijam

Sanskrit only: no published translation is held for this verse.

कनकाक्षं तमभ्यर्च्य भोगैः प्रापय्य भूतलम् । मृगाङ्कलेखया साकं तामृद्धिं बुभुजे चिरम्

kanakākṣaṃ tamabhyarcya bhogaiḥ prāpayya bhūtalam / mṛgāṅkalekhayā sākaṃ tāmṛddhiṃ bubhuje ciram

Sanskrit only: no published translation is held for this verse.

इति पूर्वकर्मविहितं भवितव्यं जगति यस्य जन्तोर्यत् । तदयत्नेन स पुरतः पतितं प्राप्नोत्यसाध्यमपि

iti pūrvakarmavihitaṃ bhavitavyaṃ jagati yasya jantoryat / tadayatnena sa purataḥ patitaṃ prāpnotyasādhyamapi

Sanskrit only: no published translation is held for this verse.

एवं गोमुखकथितां शक्तियशस्युत्सुको निशम्य कथाम् । शयने निशि नरवाहनदत्तो निद्रामसौ भेजे

evaṃ gomukhakathitāṃ śaktiyaśasyutsuko niśamya kathām / śayane niśi naravāhanadatto nidrāmasau bheje

Sanskrit only: no published translation is held for this verse.