Somadeva: Kathasaritsagara 12.3

मृगाङ्कदत्तभाव्यर्थप्रदर्शनमिदं जले । प्रतिबिम्बमिवोत्पाद्य कृतं भगवता तव

mṛgāṅkadattabhāvyarthapradarśanamidaṃ jale / pratibimbamivotpādya kṛtaṃ bhagavatā tava

Sanskrit only: no published translation is held for this verse.

स हि बालमृगारातिपोततुल्यो भुजोपमैः । सचिवैर् दशभिर् युक्तो वर्धितो वनसंनिभात्

sa hi bālamṛgārātipotatulyo bhujopamaiḥ / sacivair daśabhir yukto vardhito vanasaṃnibhāt

Sanskrit only: no published translation is held for this verse.

देशाल्लुब्धकतुल्येन पित्रा कोपात्प्रवासितः । अवन्तिदेशाद् उद्भूतां ख्यातिमन्यवनोपमात्

deśāllubdhakatulyena pitrā kopātpravāsitaḥ / avantideśād udbhūtāṃ khyātimanyavanopamāt

Sanskrit only: no published translation is held for this verse.

शशाङ्कवत्यास् तत्सिंह्या इव श्रुत्वा प्रधावितः । नागशापेन वातेन भ्रष्टमन्त्रिभुजः कृतः

śaśāṅkavatyās tatsiṃhyā iva śrutvā pradhāvitaḥ / nāgaśāpena vātena bhraṣṭamantribhujaḥ kṛtaḥ

Sanskrit only: no published translation is held for this verse.

ततो विनायकेनात्र स लम्बोदररूपिणा । संघाटितामात्यभुजः प्रकृतिस्थः पुनः कृतः

tato vināyakenātra sa lambodararūpiṇā / saṃghāṭitāmātyabhujaḥ prakṛtisthaḥ punaḥ kṛtaḥ

Sanskrit only: no published translation is held for this verse.

ततो गत्वानुभूयातिक्लेशं प्राप्तां ततो ऽन्यतः । तां शशाङ्कवतीं सिंहीमादायात्रागतश् च सः

tato gatvānubhūyātikleśaṃ prāptāṃ tato 'nyataḥ / tāṃ śaśāṅkavatīṃ siṃhīmādāyātrāgataś ca saḥ

Sanskrit only: no published translation is held for this verse.

ततश् च निकटं प्राप्तं विद्युतारातिवारणम् । मृगाङ्कदत्तसिंहं तं दृष्ट्वा भार्यासमन्वितम्

tataś ca nikaṭaṃ prāptaṃ vidyutārātivāraṇam / mṛgāṅkadattasiṃhaṃ taṃ dṛṣṭvā bhāryāsamanvitam

Sanskrit only: no published translation is held for this verse.

तत्स्वदेशवनं तस्मै समर्प्य सकलं स्वतः । तत्पिता लुब्धकनिभः स प्रयातस्तपोवनम्

tatsvadeśavanaṃ tasmai samarpya sakalaṃ svataḥ / tatpitā lubdhakanibhaḥ sa prayātastapovanam

Sanskrit only: no published translation is held for this verse.

इति संपन्नवद्भावि दर्शितं विभुना तव । तद्युष्मान्मन्त्रिणो भार्यां राज्यं चाप्स्यति वः प्रभुः

iti saṃpannavadbhāvi darśitaṃ vibhunā tava / tadyuṣmānmantriṇo bhāryāṃ rājyaṃ cāpsyati vaḥ prabhuḥ

Sanskrit only: no published translation is held for this verse.

इत्य् अहं मुनिवरेण बोधितस् तेन लब्धधृतिराश्रमात्ततः । निर्गतो ऽथ शनकैर् उपाव्रजन्न् अद्य देव मिलितास्त्वया सह

ity ahaṃ munivareṇa bodhitas tena labdhadhṛtirāśramāttataḥ / nirgato 'tha śanakair upāvrajann adya deva militāstvayā saha

Sanskrit only: no published translation is held for this verse.

तस्मादभिमतमाप्स्यसि सचिवांल्लब्ध्वा प्रचण्डशक्तिमुखान् । प्रस्थानकालपूजाप्रसन्नविघ्नेश्वरो नियतम्

tasmādabhimatamāpsyasi sacivāṃllabdhvā pracaṇḍaśaktimukhān / prasthānakālapūjāprasannavighneśvaro niyatam

Sanskrit only: no published translation is held for this verse.

इति स्वसचिवात् क्षणं विमलबुद्धितः सो ऽद्भुतं निशम्य परितोषवान् अपि मृगाङ्कदत्तः पुनः । विचार्य सह तेन ताम् अपरमन्त्र्यवाप्त्यै क्रमाद् अवन्तिनगरीं प्रति व्रजितवान्स्वकार्याय च

iti svasacivāt kṣaṇaṃ vimalabuddhitaḥ so 'dbhutaṃ niśamya paritoṣavān api mṛgāṅkadattaḥ punaḥ / vicārya saha tena tām aparamantryavāptyai kramād avantinagarīṃ prati vrajitavānsvakāryāya ca

Sanskrit only: no published translation is held for this verse.