Somadeva: Kathasaritsagara 18.2

गते च काले हतयोः सिताहरणमन्युना । रामलक्ष्मणवीराभ्यां रावणेन्द्रजितोस्तयोः

gate ca kāle hatayoḥ sitāharaṇamanyunā / rāmalakṣmaṇavīrābhyāṃ rāvaṇendrajitostayoḥ

Sanskrit only: no published translation is held for this verse.

लङ्काराज्ये ऽभिषिक्तस्य राक्षसेन्द्रस्य मन्दिरे । विभीषणस्य सो ऽतिष्ठद्रत्नहेममृगो ऽद्भुतः

laṅkārājye 'bhiṣiktasya rākṣasendrasya mandire / vibhīṣaṇasya so 'tiṣṭhadratnahemamṛgo 'dbhutaḥ

Sanskrit only: no published translation is held for this verse.

विभीषणश् च तं मह्यमुत्सवे जातुचिद्गृहान् । नीतायै भर्तृबान्धव्यान्मृगं संमानयन्नदात्

vibhīṣaṇaś ca taṃ mahyamutsave jātucidgṛhān / nītāyai bhartṛbāndhavyānmṛgaṃ saṃmānayannadāt

Sanskrit only: no published translation is held for this verse.

सो ऽयं मृगशिशुर् दिव्यो वर्तते ऽद्य गृहे मम । मया च त्वत्प्रभोरेष कर्तव्यो ऽयम् उपायनम्

so 'yaṃ mṛgaśiśur divyo vartate 'dya gṛhe mama / mayā ca tvatprabhoreṣa kartavyo 'yam upāyanam

Sanskrit only: no published translation is held for this verse.

इति सा यावदाख्याति यक्षिणी मे कथाक्रमम् । तावत्कमलिनीकान्तो रविरस्तम् उपाययौ

iti sā yāvadākhyāti yakṣiṇī me kathākramam / tāvatkamalinīkānto ravirastam upāyayau

Sanskrit only: no published translation is held for this verse.

ततस् तया समादिष्टे धाम्नि संध्याविधेः परम् । सिंहलेश्वरदूतो ऽयमहं च शयितावुभौ

tatas tayā samādiṣṭe dhāmni saṃdhyāvidheḥ param / siṃhaleśvaradūto 'yamahaṃ ca śayitāvubhau

Sanskrit only: no published translation is held for this verse.

प्रातः प्रबुद्धौ संमान्य कुशलं परिपृच्छ्य च । सिंहलेश्वरसंदेशं यावन्नौ प्रष्टुमिच्छति

prātaḥ prabuddhau saṃmānya kuśalaṃ paripṛcchya ca / siṃhaleśvarasaṃdeśaṃ yāvannau praṣṭumicchati

Sanskrit only: no published translation is held for this verse.

ततो विचिन्त्य यक्षिण्यास् तत्प्रभावविजृम्भितम् । पार्श्वं विक्रमशक्तेर् द्राग् गताव् आवां सविस्मयौ

tato vicintya yakṣiṇyās tatprabhāvavijṛmbhitam / pārśvaṃ vikramaśakter drāg gatāv āvāṃ savismayau

Sanskrit only: no published translation is held for this verse.

स च दृष्ट्वैव संमान्य कुशलं परिपृच्छ्य च । सिंहलेश्वरसंदेशं यावन् नौ प्रष्टुम् इच्छति

sa ca dṛṣṭvaiva saṃmānya kuśalaṃ paripṛcchya ca / siṃhaleśvarasaṃdeśaṃ yāvan nau praṣṭum icchati

Sanskrit only: no published translation is held for this verse.

तावत् ते यक्षिणीप्रोक्तस्वरूपे दिव्यकन्यके । मृगपोतश् च संप्राप्तास् तत्र यक्षचमूवृताः

tāvat te yakṣiṇīproktasvarūpe divyakanyake / mṛgapotaś ca saṃprāptās tatra yakṣacamūvṛtāḥ

Sanskrit only: no published translation is held for this verse.

तान् दृष्ट्वा दुष्टभूतादिमायाशङ्की स संशयात् । देव विक्रमशक्तिर्मां किमेतदिति पृष्टवान्

tān dṛṣṭvā duṣṭabhūtādimāyāśaṅkī sa saṃśayāt / deva vikramaśaktirmāṃ kimetaditi pṛṣṭavān

Sanskrit only: no published translation is held for this verse.

ततः ससिंहलाधीशकार्यं तस्मायहं क्रमात् । यक्षिणीकन्यकायुग्ममृगोदन्तमवर्णयम्

tataḥ sasiṃhalādhīśakāryaṃ tasmāyahaṃ kramāt / yakṣiṇīkanyakāyugmamṛgodantamavarṇayam

Sanskrit only: no published translation is held for this verse.

यक्षीमुखाच् छ्रुतं तं च सर्वेषामैकमत्यतः । राजद्विष्टोद्यमं राज्ञां तस्यावोचस्महं ततः

yakṣīmukhāc chrutaṃ taṃ ca sarveṣāmaikamatyataḥ / rājadviṣṭodyamaṃ rājñāṃ tasyāvocasmahaṃ tataḥ

Sanskrit only: no published translation is held for this verse.

ततः स संमान्यावां च दिव्यकन्ये च ते उभे । प्रहृष्टः सैन्यम् अकरोत् सामन्तः सज्जमाहवे

tataḥ sa saṃmānyāvāṃ ca divyakanye ca te ubhe / prahṛṣṭaḥ sainyam akarot sāmantaḥ sajjamāhave

Sanskrit only: no published translation is held for this verse.

क्षणाच्चश्रावि देवात्र सैन्यतूर्यमहारवः । क्षणाच्चादर्शि सम्लेच्छं प्रतिराजबलं महत्

kṣaṇāccaśrāvi devātra sainyatūryamahāravaḥ / kṣaṇāccādarśi samlecchaṃ pratirājabalaṃ mahat

Sanskrit only: no published translation is held for this verse.

अन्योन्यदर्शनक्रोधादभिधावितयोस्तयोः । प्रावर्तत द्वयोर् युद्धमस्मत्सैन्यारिसैन्ययोः

anyonyadarśanakrodhādabhidhāvitayostayoḥ / prāvartata dvayor yuddhamasmatsainyārisainyayoḥ

Sanskrit only: no published translation is held for this verse.

ततो यक्षीविसृष्टैस् तैर् यक्षैर् अस्मद्द्विषद्बलम् । अन्यैर् अस्मद्भटाविष्टैर् अन्यैः सक्यादहन्यत

tato yakṣīvisṛṣṭais tair yakṣair asmaddviṣadbalam / anyair asmadbhaṭāviṣṭair anyaiḥ sakyādahanyata

Sanskrit only: no published translation is held for this verse.

सैन्यरेणुगणाकीर्णं खड्गधारास्निरन्तरम् । सशूरगर्जितं घोरमुदभूद्रणदुर्दिनम्

sainyareṇugaṇākīrṇaṃ khaḍgadhārāsnirantaram / saśūragarjitaṃ ghoramudabhūdraṇadurdinam

Sanskrit only: no published translation is held for this verse.

छेदोच्छलद्भिर् द्विषतां निपतद्भिश् च मूर्धभिः । अशोभत जयश्रीर्नः क्रीडन्ती कन्दुकैर् इव

chedocchaladbhir dviṣatāṃ nipatadbhiś ca mūrdhabhiḥ / aśobhata jayaśrīrnaḥ krīḍantī kandukair iva

Sanskrit only: no published translation is held for this verse.

क्षणाच् च हतशेषास्ते राजानो भग्नसैनिकाः । त्वत्सामन्तस्य कटकं प्रणताः शरणं श्रिताः

kṣaṇāc ca hataśeṣāste rājāno bhagnasainikāḥ / tvatsāmantasya kaṭakaṃ praṇatāḥ śaraṇaṃ śritāḥ

Sanskrit only: no published translation is held for this verse.

ततो चितसु सद्वीपास्वाशासु चतसृष्वपि । उत्सादितेषु म्लेच्छेषु सर्वभूमीश्वर त्वया

tato citasu sadvīpāsvāśāsu catasṛṣvapi / utsāditeṣu mleccheṣu sarvabhūmīśvara tvayā

Sanskrit only: no published translation is held for this verse.

निजेन भर्त्रा सहिता प्रकटीभूय यक्षिणी । देव विक्रमशक्तिं तं मां चैवं वदति स्म सा

nijena bhartrā sahitā prakaṭībhūya yakṣiṇī / deva vikramaśaktiṃ taṃ māṃ caivaṃ vadati sma sā

Sanskrit only: no published translation is held for this verse.

मया यदेतद्विहितं सेवामात्रं भवत्प्रभोः । तदावेद्यं पुनश्चैवं स विज्ञापो गिरा मम

mayā yadetadvihitaṃ sevāmātraṃ bhavatprabhoḥ / tadāvedyaṃ punaścaivaṃ sa vijñāpo girā mama

Sanskrit only: no published translation is held for this verse.

त्वयैते परिणेतव्ये कन्यके देवनिर्मिते । द्रष्टव्ये च प्रसादेन लालनीयो ऽप्य् अयं मृगः

tvayaite pariṇetavye kanyake devanirmite / draṣṭavye ca prasādena lālanīyo 'py ayaṃ mṛgaḥ

Sanskrit only: no published translation is held for this verse.

मदीयं प्राभृतं ह्येतदित्य् उक्त्वा रत्नसंचयम् । दत्त्वा यक्षी तिरो ऽभूत्सा भर्त्रा सह सहानुगा

madīyaṃ prābhṛtaṃ hyetadity uktvā ratnasaṃcayam / dattvā yakṣī tiro 'bhūtsā bhartrā saha sahānugā

Sanskrit only: no published translation is held for this verse.

अन्येद्युः परिवारेण विभवेन च भूयसा । आगान्मदनलेखा सा सिंहलेश्वरकन्यका

anyedyuḥ parivāreṇa vibhavena ca bhūyasā / āgānmadanalekhā sā siṃhaleśvarakanyakā

Sanskrit only: no published translation is held for this verse.

कृत्वा प्रत्युद्गमं साथ तेन विक्रमशक्तिना । प्रावेश्यत स्वकटकं प्रणतेन प्रहर्षतः

kṛtvā pratyudgamaṃ sātha tena vikramaśaktinā / prāveśyata svakaṭakaṃ praṇatena praharṣataḥ

Sanskrit only: no published translation is held for this verse.

द्वितीये ऽह्नि गृहीत्वा तां ते चोभे दिव्यकन्यके । हेमरत्नमृगं तं च त्रिजगन्नेत्रकौतुकम्

dvitīye 'hni gṛhītvā tāṃ te cobhe divyakanyake / hemaratnamṛgaṃ taṃ ca trijagannetrakautukam

Sanskrit only: no published translation is held for this verse.

सिद्धकार्य इहागन्तुं देवपाददिदृक्षया । ततो विक्रमशक्तिः स चलितो राजभिः सह

siddhakārya ihāgantuṃ devapādadidṛkṣayā / tato vikramaśaktiḥ sa calito rājabhiḥ saha

Sanskrit only: no published translation is held for this verse.

स चेह निकटप्राप्तः सामन्तो देव वर्तते । आवेदनाय देवस्य तेनावां प्रेषितौ पुरः

sa ceha nikaṭaprāptaḥ sāmanto deva vartate / āvedanāya devasya tenāvāṃ preṣitau puraḥ

Sanskrit only: no published translation is held for this verse.

तद्देव सिंहलेन्द्रस्य यक्षिण्याश्चानुरोधतः । तत्कन्याहरिणान्देवः प्रत्युद्यातु नृपानपि

taddeva siṃhalendrasya yakṣiṇyāścānurodhataḥ / tatkanyāhariṇāndevaḥ pratyudyātu nṛpānapi

Sanskrit only: no published translation is held for this verse.

इत्य् उक्तो ऽनङ्गदेवेन विक्रमादित्यभूपतिः । कृतं दुःसाध्यम् अपितद्यक्षिणीरक्षणं स्मरन्

ity ukto 'naṅgadevena vikramādityabhūpatiḥ / kṛtaṃ duḥsādhyam apitadyakṣiṇīrakṣaṇaṃ smaran

Sanskrit only: no published translation is held for this verse.

नामन्यत तृणायापि श्रुत्वा तत्प्रत्युपक्रियाम् । बहु कृत्वापि मन्यन्ते स्वल्पम् एव महाशयाः

nāmanyata tṛṇāyāpi śrutvā tatpratyupakriyām / bahu kṛtvāpi manyante svalpam eva mahāśayāḥ

Sanskrit only: no published translation is held for this verse.

हृष्टश् च सिंहलाधीशदूतयुक्तं पुनः स तम् । अनङ्गदेवं हस्त्यश्वग्रामरत्नैर् अपूरयत्

hṛṣṭaś ca siṃhalādhīśadūtayuktaṃ punaḥ sa tam / anaṅgadevaṃ hastyaśvagrāmaratnair apūrayat

Sanskrit only: no published translation is held for this verse.

नीत्वा दिनं तद् अथ सिंहलराजपुत्र्यास् तस्यास् तयोः कमलजोद्भवकन्ययोश् च । प्रत्युद्गमाय स महीपतिरुज्जयिन्याः सैन्यैर् गजाश्ववहनैः सममुच्चचाल

nītvā dinaṃ tad atha siṃhalarājaputryās tasyās tayoḥ kamalajodbhavakanyayoś ca / pratyudgamāya sa mahīpatirujjayinyāḥ sainyair gajāśvavahanaiḥ samamuccacāla

Sanskrit only: no published translation is held for this verse.

सत्कुञ्जरो ऽञ्जनगिरिर्जयवर्धनस्य मत्तद्विपो रणभटस्य च कालमेघः । सङ्ग्रामसिद्धिरपि सिंहपराक्रमस्य वीरस्य विक्रमनिधे रिपुराक्षसश् च

satkuñjaro 'ñjanagirirjayavardhanasya mattadvipo raṇabhaṭasya ca kālameghaḥ / saṅgrāmasiddhirapi siṃhaparākramasya vīrasya vikramanidhe ripurākṣasaś ca

Sanskrit only: no published translation is held for this verse.

पवनजवो जयकेतोर्वल्लभशक्तेः समुद्रकल्लोलः । अश्वौ बाहुसुबाह्वोः शरवेगो गरुडवेगश्च

pavanajavo jayaketorvallabhaśakteḥ samudrakallolaḥ / aśvau bāhusubāhvoḥ śaravego garuḍavegaśca

Sanskrit only: no published translation is held for this verse.

श्यामा कुवलयमाला कोक्काणी कीर्तिवर्मणस्तुरगी । कर्का गङ्गालहरी सुसैन्धवी समरसिंहस्य

śyāmā kuvalayamālā kokkāṇī kīrtivarmaṇasturagī / karkā gaṅgālaharī susaindhavī samarasiṃhasya

Sanskrit only: no published translation is held for this verse.

इति हस्त्यश्वं राजसु तेष्व् अपि चलितेषु विभजतामभितः । शुश्रुविरे ऽत्र च राजनि चलिते दण्डाधिकारिणां वाचः

iti hastyaśvaṃ rājasu teṣv api caliteṣu vibhajatāmabhitaḥ / śuśruvire 'tra ca rājani calite daṇḍādhikāriṇāṃ vācaḥ

Sanskrit only: no published translation is held for this verse.

भूमिः सैन्यमयी तदुत्थितमहाशब्दैकमय्यो दिशः संसर्पद्ध्वजिनीविमर्दविलसद्द्धूलीमयी द्यौरपि । सर्वस्याद्भुततत्प्रभावमहिमव्याहारमय्यो गिरस् तस्मिन् राज्ञि पथि प्रयाति सकलद्वीपाधिनाथे ऽभवन्

bhūmiḥ sainyamayī tadutthitamahāśabdaikamayyo diśaḥ saṃsarpaddhvajinīvimardavilasadddhūlīmayī dyaurapi / sarvasyādbhutatatprabhāvamahimavyāhāramayyo giras tasmin rājñi pathi prayāti sakaladvīpādhināthe 'bhavan

Sanskrit only: no published translation is held for this verse.