Somadeva: Kathasaritsagara 18.5

इति संयोगवियोगैर् निचितामाख्याय विषमशीलकथाम् । कण्वमुनिः पुनरवदत्तस्मिन्मां मदनमञ्चुकाविरहे

iti saṃyogaviyogair nicitāmākhyāya viṣamaśīlakathām / kaṇvamuniḥ punaravadattasminmāṃ madanamañcukāvirahe

Sanskrit only: no published translation is held for this verse.

एवं भवन्त्यचिन्त्या विरहाश् च समागमाश् च जन्तूनाम् । तत्स्यात्तवापि नचिरान्नरवाहनदत्त संगमः प्रियया

evaṃ bhavantyacintyā virahāś ca samāgamāś ca jantūnām / tatsyāttavāpi nacirānnaravāhanadatta saṃgamaḥ priyayā

Sanskrit only: no published translation is held for this verse.

अवलम्बस्व धृतिं तत्सुचिरं भोक्तासि वत्सराजसुत । भार्यासचिवसमेतो विद्याधरचारुचक्रवर्तिपदम्

avalambasva dhṛtiṃ tatsuciraṃ bhoktāsi vatsarājasuta / bhāryāsacivasameto vidyādharacārucakravartipadam

Sanskrit only: no published translation is held for this verse.

एवं कण्वर्षिगिरा लब्धधृतिः क्षपितविरहकालो ऽथ । भार्या विद्याः खेचरसाम्राज्यं च क्रमादहं प्राप्तः

evaṃ kaṇvarṣigirā labdhadhṛtiḥ kṣapitavirahakālo 'tha / bhāryā vidyāḥ khecarasāmrājyaṃ ca kramādahaṃ prāptaḥ

Sanskrit only: no published translation is held for this verse.

तच् च यथा संप्राप्तं वरदस्यानुग्रहान्मया शंभोः । आदावेव तदखिलं वर्णितवानेव वो महामुनयः

tac ca yathā saṃprāptaṃ varadasyānugrahānmayā śaṃbhoḥ / ādāveva tadakhilaṃ varṇitavāneva vo mahāmunayaḥ

Sanskrit only: no published translation is held for this verse.

इति नरवाहनदत्तः स्वकथामाख्याय मुनिजनं निखिलम् । गो ऽपालकं च मातुलमहर्षयत्कश्यपाश्रमे तस्मिन्

iti naravāhanadattaḥ svakathāmākhyāya munijanaṃ nikhilam / go 'pālakaṃ ca mātulamaharṣayatkaśyapāśrame tasmin

Sanskrit only: no published translation is held for this verse.

नीत्वा च तत्र जलदागमवासरांस् तान् आमन्त्र्य मातुलमृषींश्च तपो ऽवनस्थान् । प्रायात् सदारसचिवः स ततो विमानम् आरुह्य खेचरचमूपिहितान्तरिक्षः

nītvā ca tatra jaladāgamavāsarāṃs tān āmantrya mātulamṛṣīṃśca tapo 'vanasthān / prāyāt sadārasacivaḥ sa tato vimānam āruhya khecaracamūpihitāntarikṣaḥ

Sanskrit only: no published translation is held for this verse.

प्राप्य क्षनादृषभकं स्वनिवासमर्द्रिं सम्राज्यभोगसुखितो द्युचरेन्द्रमध्ये । देव्या समं मदनमञ्चुकया स्थितो ऽथ रत्नप्रभाप्रभृतिभिश् च स कल्पजीवी

prāpya kṣanādṛṣabhakaṃ svanivāsamardriṃ samrājyabhogasukhito dyucarendramadhye / devyā samaṃ madanamañcukayā sthito 'tha ratnaprabhāprabhṛtibhiś ca sa kalpajīvī

Sanskrit only: no published translation is held for this verse.

इत्येषा शशिशेखरेण तुहिनक्ष्माभृत्सुताभ्यर्थनात् सोत्साहेन बृहत्कथा निगदिता कैलासपृष्ठे पुरा । उत्पन्नैर् अथ शापतः क्षितितले कात्यायनाद्याकृतीर् बिभ्रद्भिर् गमिता प्रसिद्धिमतुलां तैः पुष्पदन्तादिभिः

ityeṣā śaśiśekhareṇa tuhinakṣmābhṛtsutābhyarthanāt sotsāhena bṛhatkathā nigaditā kailāsapṛṣṭhe purā / utpannair atha śāpataḥ kṣititale kātyāyanādyākṛtīr bibhradbhir gamitā prasiddhimatulāṃ taiḥ puṣpadantādibhiḥ

Sanskrit only: no published translation is held for this verse.

एतां मद्वदनोद्गतां पठति यो यो वा शृणोत्य् आदराद् यश् चैतां सुकथां बिभर्ति नचिरात्स ध्वस्तपापः कृती । सद्विद्याधरतास्मवाप्य नियतं लोकं मम प्राप्नुयाद् इत्य् अस्याश् च तदा वरं गिरिसुताकान्तः कथाया ददौ

etāṃ madvadanodgatāṃ paṭhati yo yo vā śṛṇoty ādarād yaś caitāṃ sukathāṃ bibharti nacirātsa dhvastapāpaḥ kṛtī / sadvidyādharatāsmavāpya niyataṃ lokaṃ mama prāpnuyād ity asyāś ca tadā varaṃ girisutākāntaḥ kathāyā dadau

Sanskrit only: no published translation is held for this verse.