Somadeva: Kathasaritsagara 4.2

इति तं चिन्तयन्तं च गरुडं पापशुद्धये । वह्निं विविक्षुं जीमूतवाहनो ऽथ जगाद सः

iti taṃ cintayantaṃ ca garuḍaṃ pāpaśuddhaye / vahniṃ vivikṣuṃ jīmūtavāhano 'tha jagāda saḥ

Sanskrit only: no published translation is held for this verse.

पक्षीन्द्र किं विषण्णो ऽसि सत्यं पापाद् बिभेषि चेत् । तद् इदानीं न भूयस् ते भक्ष्या हीमे भुजंगमाः

pakṣīndra kiṃ viṣaṇṇo 'si satyaṃ pāpād bibheṣi cet / tad idānīṃ na bhūyas te bhakṣyā hīme bhujaṃgamāḥ

Sanskrit only: no published translation is held for this verse.

कार्यश् चानुशयस् तेषु पूर्वभुक्तेषु भोगिषु । एषो ऽत्र हि प्रतीकारो वृथान्यच् चिन्तितं तव

kāryaś cānuśayas teṣu pūrvabhukteṣu bhogiṣu / eṣo 'tra hi pratīkāro vṛthānyac cintitaṃ tava

Sanskrit only: no published translation is held for this verse.

इत्य् उक्तस् तेन स प्रीतस् तार्क्ष्यो भूतानुकम्पिना । तथेति प्रतिपेदे तद्वाक्यं तस्य गुरोर् इव

ity uktas tena sa prītas tārkṣyo bhūtānukampinā / tatheti pratipede tadvākyaṃ tasya guror iva

Sanskrit only: no published translation is held for this verse.

ययौ चामृतम् आनेतुं नाकाज् जीवयितुं जवात् । क्षताङ्गं तत्र तं चान्यान् अस्थिशेषान् अहीन् अपि

yayau cāmṛtam ānetuṃ nākāj jīvayituṃ javāt / kṣatāṅgaṃ tatra taṃ cānyān asthiśeṣān ahīn api

Sanskrit only: no published translation is held for this verse.

ततश् च साक्षाद् आगत्य देव्या सिक्तो ऽमृतेन सः । जीमूतवाहनो गौर्या तद्भार्याभक्तितुष्टया

tataś ca sākṣād āgatya devyā sikto 'mṛtena saḥ / jīmūtavāhano gauryā tadbhāryābhaktituṣṭayā

Sanskrit only: no published translation is held for this verse.

तेनाधिकतरोद्भूतकान्तीन्य् अङ्गानि जज्ञिरे । तस्य सानन्दगीर्वाणदुन्दुभिध्वनिभिः सह

tenādhikatarodbhūtakāntīny aṅgāni jajñire / tasya sānandagīrvāṇadundubhidhvanibhiḥ saha

Sanskrit only: no published translation is held for this verse.

स्वस्थोत्थिते ततस् तस्मिन्न् आनीय गरुडो ऽपि तत् । कृत्स्ने वेलातटे ऽप्य् अत्र ववर्षामृतम् अम्बरात्

svasthotthite tatas tasminn ānīya garuḍo 'pi tat / kṛtsne velātaṭe 'py atra vavarṣāmṛtam ambarāt

Sanskrit only: no published translation is held for this verse.

तेन सर्वे समुत्तस्थुर् जीवन्तस् तत्र पन्नगाः । बभौ तच् च तदा भूरिभुजंगकुलसंकुलम्

tena sarve samuttasthur jīvantas tatra pannagāḥ / babhau tac ca tadā bhūribhujaṃgakulasaṃkulam

Sanskrit only: no published translation is held for this verse.

वेलावनं विनिर्मुक्तवैनतेयभयं ततः । पातालम् इव जीमूतवाहनालोकनागतम्

velāvanaṃ vinirmuktavainateyabhayaṃ tataḥ / pātālam iva jīmūtavāhanālokanāgatam

Sanskrit only: no published translation is held for this verse.

ततो क्षयेण देहेन यशसा च विराजितम् । बुद्ध्वाभ्यनन्दत् तं बन्धुजनो जीमूतवाहनम्

tato kṣayeṇa dehena yaśasā ca virājitam / buddhvābhyanandat taṃ bandhujano jīmūtavāhanam

Sanskrit only: no published translation is held for this verse.

ननन्द तस्य भार्या च सज्ञातिः पितरौ तथा । को न प्रहृष्येद् दूःखेन सुखत्वपरिवर्तिना

nananda tasya bhāryā ca sajñātiḥ pitarau tathā / ko na prahṛṣyed dūḥkhena sukhatvaparivartinā

Sanskrit only: no published translation is held for this verse.

विसृष्टस् तेन च ययौ शङ्खचूडो रसातलम् । स्वच्छन्दम् अविसृष्टं च लोकांस् त्रीन् अपि तद्यशः

visṛṣṭas tena ca yayau śaṅkhacūḍo rasātalam / svacchandam avisṛṣṭaṃ ca lokāṃs trīn api tadyaśaḥ

Sanskrit only: no published translation is held for this verse.

ततः प्रीतिप्रह्वामरनिकरम् आगत्य गरुडं प्रणेमुस् तं विद्याधरतिलकम् अभ्येत्य सभयाः । स्वदायादाः सर्वे हिमगिरिसुतानुग्रहवशान् मतङ्गाख्याद्या ये सुचिरम् अभजन्न् अस्य विकृतिम्

tataḥ prītiprahvāmaranikaram āgatya garuḍaṃ praṇemus taṃ vidyādharatilakam abhyetya sabhayāḥ / svadāyādāḥ sarve himagirisutānugrahavaśān mataṅgākhyādyā ye suciram abhajann asya vikṛtim

Sanskrit only: no published translation is held for this verse.

तैर् एव चार्थ्यमानः सुकृती जीमूतवाहनः स ततः । मलयाचलाद् अगच्छन् निजनिलयं तुहिनशैलतटम्

tair eva cārthyamānaḥ sukṛtī jīmūtavāhanaḥ sa tataḥ / malayācalād agacchan nijanilayaṃ tuhinaśailataṭam

Sanskrit only: no published translation is held for this verse.

तत्र पितृभ्यां सहितो मित्त्रावसुना च मलयवत्या च । धीरश् चिराय बुभुजे विद्याधरचक्रवर्तिपदम्

tatra pitṛbhyāṃ sahito mittrāvasunā ca malayavatyā ca / dhīraś cirāya bubhuje vidyādharacakravartipadam

Sanskrit only: no published translation is held for this verse.

एवं सकलजगत्त्रयहृदयचमत्कारकारिचरितानाम् । स्वयम् अनुधावन्ति सदा कल्याणपरम्पराः पदवीम्

evaṃ sakalajagattrayahṛdayacamatkārakāricaritānām / svayam anudhāvanti sadā kalyāṇaparamparāḥ padavīm

Sanskrit only: no published translation is held for this verse.

इत्य् आकर्ण्य कथां किल देवी यौगन्धरायणस्य मुखात् । मुमुदे वासवदत्ता गर्भभरोदारदोहदिनी

ity ākarṇya kathāṃ kila devī yaugandharāyaṇasya mukhāt / mumude vāsavadattā garbhabharodāradohadinī

Sanskrit only: no published translation is held for this verse.

तदनु तदनुषङ्गप्राप्तया प्रीतिभाजाम् अनवरतनिदेशप्रत्ययाद् देवतानाम् । निजपतिनिकटस्था भाविविद्याधरेन्द्रस्वतनयकथया तं वासरं सा निनाय

tadanu tadanuṣaṅgaprāptayā prītibhājām anavaratanideśapratyayād devatānām / nijapatinikaṭasthā bhāvividyādharendrasvatanayakathayā taṃ vāsaraṃ sā nināya

Sanskrit only: no published translation is held for this verse.