Somadeva: Kathasaritsagara 6.8

दिव्यैषा हि न सामान्या ससुतेत्यसकृद्गतम् । मित्त्रेण चैतदुक्तं मे ज्ञानिना ब्रह्मरक्षसा

divyaiṣā hi na sāmānyā sasutetyasakṛdgatam / mittreṇa caitaduktaṃ me jñāninā brahmarakṣasā

Sanskrit only: no published translation is held for this verse.

इत्य् आदि तत्र ते यावद्विमृशन्ति परस्परम् । एवं माहेश्वरी तावद्वाणी प्रादुरभूद् दिवः

ity ādi tatra te yāvadvimṛśanti parasparam / evaṃ māheśvarī tāvadvāṇī prādurabhūd divaḥ

Sanskrit only: no published translation is held for this verse.

मन्नेत्रानलदग्धस्य सृष्टस्यात मनोभुवः । नरवाहनदत्तस्य मय् ऐवैषा विनिर्मिता

mannetrānaladagdhasya sṛṣṭasyāta manobhuvaḥ / naravāhanadattasya may aivaiṣā vinirmitā

Sanskrit only: no published translation is held for this verse.

तपस्तुष्टेन भार्यास्य रतिर्मदनमञ्चुका । एतया सहितश्चायं सर्वान्तःपुरमुख्यया

tapastuṣṭena bhāryāsya ratirmadanamañcukā / etayā sahitaścāyaṃ sarvāntaḥpuramukhyayā

Sanskrit only: no published translation is held for this verse.

विद्याधराधिराज्यं स दिव्यं कल्पं करिष्यति । मत्प्रसादाद्विजित्यारीनित्य् उक्त्वा विरराम वाक्

vidyādharādhirājyaṃ sa divyaṃ kalpaṃ kariṣyati / matprasādādvijityārīnity uktvā virarāma vāk

Sanskrit only: no published translation is held for this verse.

श्रुत्वैतां भगवद्वाणीं वत्सेशः सपरिच्छदः । तं प्रणम्य सुदोद्वाहे सनन्दो निश्चयं व्यधात्

śrutvaitāṃ bhagavadvāṇīṃ vatseśaḥ saparicchadaḥ / taṃ praṇamya sudodvāhe sanando niścayaṃ vyadhāt

Sanskrit only: no published translation is held for this verse.

अथ स सचिवमुख्यं पूर्वविज्ञाततत्त्वं नरपतिरभिनन्द्याहूय मौहूर्तिकांश्च । शुभफलदमपृच्छल्लग्नमूचुस्तु ते तं कतिपयदिनमध्ये भाविनं प्राप्तपूजाः

atha sa sacivamukhyaṃ pūrvavijñātatattvaṃ narapatirabhinandyāhūya mauhūrtikāṃśca / śubhaphaladamapṛcchallagnamūcustu te taṃ katipayadinamadhye bhāvinaṃ prāptapūjāḥ

Sanskrit only: no published translation is held for this verse.

कालं मनागनुभविष्यति कंचिदत्र पुत्रो वियोगमनया सह भार्यया ते । जानीमहे वयमिदं निजशास्त्रदृष्ट्या वत्सेश्वरेति जगदुर्गणकाः पुनस्ते

kālaṃ manāganubhaviṣyati kaṃcidatra putro viyogamanayā saha bhāryayā te / jānīmahe vayamidaṃ nijaśāstradṛṣṭyā vatseśvareti jagadurgaṇakāḥ punaste

Sanskrit only: no published translation is held for this verse.

ततः स सूनोर् निजवैभवोचितं विवाहसंभारविधिं व्यधान् नृपः । तथा यथास्य स्वपुरी न केवलं पृथिव्यपि क्षोभमगात् तदुद्यमात्

tataḥ sa sūnor nijavaibhavocitaṃ vivāhasaṃbhāravidhiṃ vyadhān nṛpaḥ / tathā yathāsya svapurī na kevalaṃ pṛthivyapi kṣobhamagāt tadudyamāt

Sanskrit only: no published translation is held for this verse.

प्राप्ते विवाहदिवसे ऽथ कलिङ्गसेना पित्रा निसृष्टनिजदिव्यविभूषणायाः । तस्याः प्रसाधनविधिं दुहितुश्चकार सोमप्रभा पतिनिदेशवशागता च

prāpte vivāhadivase 'tha kaliṅgasenā pitrā nisṛṣṭanijadivyavibhūṣaṇāyāḥ / tasyāḥ prasādhanavidhiṃ duhituścakāra somaprabhā patinideśavaśāgatā ca

Sanskrit only: no published translation is held for this verse.

कृतदिव्यकौतुका सा सुतरामथ मदनमञ्चुका विबभौ । नन्वेवम् एव कान्ता चन्द्रतनुः कार्तिकानुगता

kṛtadivyakautukā sā sutarāmatha madanamañcukā vibabhau / nanvevam eva kāntā candratanuḥ kārtikānugatā

Sanskrit only: no published translation is held for this verse.

दिव्याङ्गनाश् च तस्या हराज्ञया श्रूयमाणगीतरवाः । तद्रूपजिताच्छन्ना ह्रीता इव मङ्गलं विदधुः

divyāṅganāś ca tasyā harājñayā śrūyamāṇagītaravāḥ / tadrūpajitācchannā hrītā iva maṅgalaṃ vidadhuḥ

Sanskrit only: no published translation is held for this verse.

भक्तानुकम्पिनि जयाद्रिसुते त्वयाद्य रत्यास् तपः स्वयमुपेत्य कृतं कृतार्थम् । इत्य् आदि दिव्यवरचारणवाद्यमिश्र वाक्यानुमेयम् अपि संदधते ऽत्र गौर्याः

bhaktānukampini jayādrisute tvayādya ratyās tapaḥ svayamupetya kṛtaṃ kṛtārtham / ity ādi divyavaracāraṇavādyamiśra vākyānumeyam api saṃdadhate 'tra gauryāḥ

Sanskrit only: no published translation is held for this verse.

अथ नरवाहनदत्तः प्रविवेश स मदनमञ्चुकाध्युषितम् । कृतवरकौतुकशोभी विविधमहातोद्यभृद्विवाहगृहम्

atha naravāhanadattaḥ praviveśa sa madanamañcukādhyuṣitam / kṛtavarakautukaśobhī vividhamahātodyabhṛdvivāhagṛham

Sanskrit only: no published translation is held for this verse.

निर्वर्त्य तत्र बहलोद्यतविप्रमत्तवीवाहमङ्गलविधिं च वधूवरौ तौ । वेदीं समारुरुहतुर्ज्वलिताग्निमुच्चै राज्ञां शिरोभुवमिवामलरत्नदीपाम्

nirvartya tatra bahalodyatavipramattavīvāhamaṅgalavidhiṃ ca vadhūvarau tau / vedīṃ samāruruhaturjvalitāgnimuccai rājñāṃ śirobhuvamivāmalaratnadīpām

Sanskrit only: no published translation is held for this verse.

यदि युगपद् इहेन्दुमूर्तिभानू कनकगिरिं भ्रमतो ऽभितः कदाचित् । भवति तदुपमा तयोस्तदानीं जगति वधूवरयोः प्रदक्षिणे ऽग्नेः

yadi yugapad ihendumūrtibhānū kanakagiriṃ bhramato 'bhitaḥ kadācit / bhavati tadupamā tayostadānīṃ jagati vadhūvarayoḥ pradakṣiṇe 'gneḥ

Sanskrit only: no published translation is held for this verse.

यथा विवाहोत्सवतूर्यनादान् अपोथयन् दुन्दुभयो ऽन्तरिक्षे । तथा वधूत्सारितहोमलाजाः सुरोज्झिताः कौसुमवृष्टयो ऽत्र

yathā vivāhotsavatūryanādān apothayan dundubhayo 'ntarikṣe / tathā vadhūtsāritahomalājāḥ surojjhitāḥ kausumavṛṣṭayo 'tra

Sanskrit only: no published translation is held for this verse.

ततः कनकराशिभिर्मणिमयैश् च जामातरं समर्चयदुदारधीः किल कलिङ्गसेना तथा । यथात्र बुबुधे जनैर् अपि सुदुर्गतो ऽस्याः पुरः स काममलकापतिः कृपणभूभृतो ऽन्ये तु के

tataḥ kanakarāśibhirmaṇimayaiś ca jāmātaraṃ samarcayadudāradhīḥ kila kaliṅgasenā tathā / yathātra bubudhe janair api sudurgato 'syāḥ puraḥ sa kāmamalakāpatiḥ kṛpaṇabhūbhṛto 'nye tu ke

Sanskrit only: no published translation is held for this verse.

निष्पन्नतादृशचिराभिमतानुरूपपाणिग्रहोत्सवविधी च वधूवरौ तौ । अभ्यन्तरं विविशतुः प्रमदोपरुद्धं लोकस्य मानसमिवामलचित्रभक्ति

niṣpannatādṛśacirābhimatānurūpapāṇigrahotsavavidhī ca vadhūvarau tau / abhyantaraṃ viviśatuḥ pramadoparuddhaṃ lokasya mānasamivāmalacitrabhakti

Sanskrit only: no published translation is held for this verse.

सद्वाहिनीपरिगतैर् अपि विश्ववन्द्य शौर्याश् चितैर् अपि जितावनतैर्नरेन्द्रैः । सा वारिराशिभिरिवाशु पुरी पुपूरे वत्सेश्वरस्य सदुपायनरत्नहस्तैः

sadvāhinīparigatair api viśvavandya śauryāś citair api jitāvanatairnarendraiḥ / sā vārirāśibhirivāśu purī pupūre vatseśvarasya sadupāyanaratnahastaiḥ

Sanskrit only: no published translation is held for this verse.

अनुजीविजनाय सो ऽपि राजा व्यकिरद्धेम तथा महोत्सवे ऽस्मिन् । यदि परमभवन्न जातरूपा जननीगर्भगता यथास्य राष्ट्रे

anujīvijanāya so 'pi rājā vyakiraddhema tathā mahotsave 'smin / yadi paramabhavanna jātarūpā jananīgarbhagatā yathāsya rāṣṭre

Sanskrit only: no published translation is held for this verse.

वरचारणनर्तकीसमूहैर् विविधदिगन्तसमागतैस् तदात्र । परितः स्तवनृत्तगीतवाद्यैर् बुबुधे तन्मय एव जीवलोकः

varacāraṇanartakīsamūhair vividhadigantasamāgatais tadātra / paritaḥ stavanṛttagītavādyair bubudhe tanmaya eva jīvalokaḥ

Sanskrit only: no published translation is held for this verse.

वातोद्धूतपताकाबाहुलता चोत्सवे ऽत्र कौशाम्बी । सापि ननर्तेव पुरी पौरस्त्रीरचितमण्डनाभरणा

vātoddhūtapatākābāhulatā cotsave 'tra kauśāmbī / sāpi nanarteva purī paurastrīracitamaṇḍanābharaṇā

Sanskrit only: no published translation is held for this verse.

एवं च स प्रतिदिनं परिवर्धमानो निर्वर्त्यते स्म सुचिरेण महोत्सवो ऽत्र । सर्वः सद् ऐव च सुहृत्स्वजनो जनश् च हृष्टस् ततः किम् अपि पूर्णमनोरथो ऽभूत्

evaṃ ca sa pratidinaṃ parivardhamāno nirvartyate sma sucireṇa mahotsavo 'tra / sarvaḥ sad aiva ca suhṛtsvajano janaś ca hṛṣṭas tataḥ kim api pūrṇamanoratho 'bhūt

Sanskrit only: no published translation is held for this verse.

स च नरवाहनदत्तो युवराजो मदनमञ्चुकासहितः । भजते स्म सुचिरकाङ्क्षितमुदयैषी जीवलोकसुखम्

sa ca naravāhanadatto yuvarājo madanamañcukāsahitaḥ / bhajate sma sucirakāṅkṣitamudayaiṣī jīvalokasukham

Sanskrit only: no published translation is held for this verse.