Library·Somadeva: Kathasaritsagara·8·8.1
कथम् एवं सदर्पोक्तेर्गम्यते तस्य वेश्मनि । तच् छ्रुत्वा तस्य सिद्धार्थनामा मन्त्र्येवम् अभ्यधात्
katham evaṃ sadarpoktergamyate tasya veśmani / tac chrutvā tasya siddhārthanāmā mantryevam abhyadhāt
Sanskrit only: no published translation is held for this verse.
नान्यथा देव मन्तव्यं वक्तुम् एवं हि सो ऽर्हति । स हि राजा महादाता पण्डितः सत्कुलोद्गतः
nānyathā deva mantavyaṃ vaktum evaṃ hi so 'rhati / sa hi rājā mahādātā paṇḍitaḥ satkulodgataḥ
Sanskrit only: no published translation is held for this verse.
शूरो ऽश्वमेधयाजी च सदैवान्यापराजितः । विरुद्धं किं नु तेनोक्तं यथावस्त्वभिधायिना
śūro 'śvamedhayājī ca sadaivānyāparājitaḥ / viruddhaṃ kiṃ nu tenoktaṃ yathāvastvabhidhāyinā
Sanskrit only: no published translation is held for this verse.
शत्रुतोदाहृता या वा सा वासवकृते ऽधुना । तद्गन्तव्यं गृहे तस्य सत्यसंधो नृपो हि सः
śatrutodāhṛtā yā vā sā vāsavakṛte 'dhunā / tadgantavyaṃ gṛhe tasya satyasaṃdho nṛpo hi saḥ
Sanskrit only: no published translation is held for this verse.
तद् अपि प्रेष्यतां कश्चित्तस्य चित्तोपलब्धये । इति सिद्धार्थवचनं सर्वे श्रद्दधुरत्र ते
tad api preṣyatāṃ kaścittasya cittopalabdhaye / iti siddhārthavacanaṃ sarve śraddadhuratra te
Sanskrit only: no published translation is held for this verse.
ततो जिज्ञासितुं चन्द्रप्रभस्तं जनमेजयम् । प्रहस्तं व्यसृजत्तं च दूतं तस्याप्यमानयत्
tato jijñāsituṃ candraprabhastaṃ janamejayam / prahastaṃ vyasṛjattaṃ ca dūtaṃ tasyāpyamānayat
Sanskrit only: no published translation is held for this verse.
प्रहस्तश् च स गत्वा तं कौशाम्बीशं ससंविदम् । विधायानीय तल्लेखं चन्द्रप्रभमतोषयत्
prahastaś ca sa gatvā taṃ kauśāmbīśaṃ sasaṃvidam / vidhāyānīya tallekhaṃ candraprabhamatoṣayat
Sanskrit only: no published translation is held for this verse.
सो ऽपि राजा तमेवाशु प्रहस्तं प्रेष्य शाकलात् । जनमेजयपार्श्वं तां परपुष्टामनाययत्
so 'pi rājā tamevāśu prahastaṃ preṣya śākalāt / janamejayapārśvaṃ tāṃ parapuṣṭāmanāyayat
Sanskrit only: no published translation is held for this verse.
ततश् चन्द्रप्रभाद्यास्ते सूर्यप्रभपुरोगमाः । सकान्तिसेनाः कौशाम्बीं विमानेनागमन्नृपाः
tataś candraprabhādyāste sūryaprabhapurogamāḥ / sakāntisenāḥ kauśāmbīṃ vimānenāgamannṛpāḥ
Sanskrit only: no published translation is held for this verse.
तत्र संबन्धिजामातृमुखान् प्रत्युद्गमादिना । प्रह्वस्तान् पूजयाम् आस स राजा जनमेजयः
tatra saṃbandhijāmātṛmukhān pratyudgamādinā / prahvastān pūjayām āsa sa rājā janamejayaḥ
Sanskrit only: no published translation is held for this verse.
ददौ च कृत्वा दुहितुर्विवाहविधिसत्क्रियाम् । पञ्च हस्तिसहस्राणि लक्षं च वरवाजिनाम्
dadau ca kṛtvā duhiturvivāhavidhisatkriyām / pañca hastisahasrāṇi lakṣaṃ ca varavājinām
Sanskrit only: no published translation is held for this verse.
रत्नकाञ्चनसद्वस्त्रकर्पूरागरुपूरितैः । भारैर् भृतानाम् उष्ट्राणां सहस्राण्यपि पञ्च सः
ratnakāñcanasadvastrakarpūrāgarupūritaiḥ / bhārair bhṛtānām uṣṭrāṇāṃ sahasrāṇyapi pañca saḥ
Sanskrit only: no published translation is held for this verse.
चक्रे च वाद्यनृत्तैकमयं लोकमहोत्सवम् । पूजितब्राह्मणवरं मानिताखिलराजकम्
cakre ca vādyanṛttaikamayaṃ lokamahotsavam / pūjitabrāhmaṇavaraṃ mānitākhilarājakam
Sanskrit only: no published translation is held for this verse.
तावच्चाशङ्कितं तत्र नभः पिञ्जरतां ययौ । रक्तारुणत्वमभ्यर्णभावि शंसदिवात्मनः
tāvaccāśaṅkitaṃ tatra nabhaḥ piñjaratāṃ yayau / raktāruṇatvamabhyarṇabhāvi śaṃsadivātmanaḥ
Sanskrit only: no published translation is held for this verse.
तुमुलाकुलशब्दाश् च बभूवुः सहसा दिशः । भीता इवागतं दृष्ट्वा परसैन्यं विहायसा
tumulākulaśabdāś ca babhūvuḥ sahasā diśaḥ / bhītā ivāgataṃ dṛṣṭvā parasainyaṃ vihāyasā
Sanskrit only: no published translation is held for this verse.
तावच् च तत्क्षणं वातुं प्रवृत्तो ऽभून् महानिलः । खेचरैः सह युद्धाय भूचरानुत्क्षिपन्न् इव
tāvac ca tatkṣaṇaṃ vātuṃ pravṛtto 'bhūn mahānilaḥ / khecaraiḥ saha yuddhāya bhūcarānutkṣipann iva
Sanskrit only: no published translation is held for this verse.
क्षणाच् च ददृशे व्योम्नि विद्याधरबलं महत् । दीप्तिद्योतितदिक्चक्रम् उद्यन्नादं महाजवम्
kṣaṇāc ca dadṛśe vyomni vidyādharabalaṃ mahat / dīptidyotitadikcakram udyannādaṃ mahājavam
Sanskrit only: no published translation is held for this verse.
तन्मध्ये चातिसुभगं विद्याधरकुमारकम् । एकं सूर्यप्रभाद्यास्ते पश्यन्ति स्म सुविस्मिताः
tanmadhye cātisubhagaṃ vidyādharakumārakam / ekaṃ sūryaprabhādyāste paśyanti sma suvismitāḥ
Sanskrit only: no published translation is held for this verse.
आषाढेश्वरतनयो दामोदर एष जयति युवराजः । रे मर्त्य धरणिगोचर सूर्यप्रभ निपत पादयोरस्य
āṣāḍheśvaratanayo dāmodara eṣa jayati yuvarājaḥ / re martya dharaṇigocara sūryaprabha nipata pādayorasya
Sanskrit only: no published translation is held for this verse.
प्रणम च रे जनमेजय भवता दत्ता सुता किम् अस्थाने । आराधय तम् इमं तद्देवं नैषो ऽन्यथा क्षमते
praṇama ca re janamejaya bhavatā dattā sutā kim asthāne / ārādhaya tam imaṃ taddevaṃ naiṣo 'nyathā kṣamate
Sanskrit only: no published translation is held for this verse.
इति तस्मिन् क्षणे विद्याधरबन्दी ततो ऽम्बरात् । तस्य दामोदरस्याग्राव्याजहारोच्चया गिरा
iti tasmin kṣaṇe vidyādharabandī tato 'mbarāt / tasya dāmodarasyāgrāvyājahāroccayā girā
Sanskrit only: no published translation is held for this verse.
तच् छ्रुत्वा दृष्टतत्सैन्यो गृहीत्वा खड्गचर्मणी । सूर्यप्रभो नभः क्रोधादुत्पपात स्वविद्यया
tac chrutvā dṛṣṭatatsainyo gṛhītvā khaḍgacarmaṇī / sūryaprabho nabhaḥ krodhādutpapāta svavidyayā
Sanskrit only: no published translation is held for this verse.
अनूत्पेतुश् च सचिवास् तस्य सर्वे धृतायुधाः । प्रहस्तश् च प्रभासश् च भासः सिद्धार्थ एव च
anūtpetuś ca sacivās tasya sarve dhṛtāyudhāḥ / prahastaś ca prabhāsaś ca bhāsaḥ siddhārtha eva ca
Sanskrit only: no published translation is held for this verse.
प्रज्ञाढ्यः सर्वदमनो वीतभीतिः शुभंकरः । विद्याधराणां तैः साकं प्रावर्तत महाहवः
prajñāḍhyaḥ sarvadamano vītabhītiḥ śubhaṃkaraḥ / vidyādharāṇāṃ taiḥ sākaṃ prāvartata mahāhavaḥ
Sanskrit only: no published translation is held for this verse.
सूर्यप्रभश् चाभ्यधावद् यतो दामोदरस् ततः । खड्गेनाघ्नन् रिपून् गृह्णंस् तच्छस्त्राणि स्वचर्मणा
sūryaprabhaś cābhyadhāvad yato dāmodaras tataḥ / khaḍgenāghnan ripūn gṛhṇaṃs tacchastrāṇi svacarmaṇā
Sanskrit only: no published translation is held for this verse.
ते जनाः कति संख्ये च लक्षसंख्या नभश्चराः । समत्वम् एव विविदुर्युध्यमानाः परस्परम्
te janāḥ kati saṃkhye ca lakṣasaṃkhyā nabhaścarāḥ / samatvam eva vividuryudhyamānāḥ parasparam
Sanskrit only: no published translation is held for this verse.
बभुः खड्गलताश् चात्र साकुला रुधिरारुणाः । पतन्त्यः शूरकायेषु कृतान्तस्येव दृष्टयः
babhuḥ khaḍgalatāś cātra sākulā rudhirāruṇāḥ / patantyaḥ śūrakāyeṣu kṛtāntasyeva dṛṣṭayaḥ
Sanskrit only: no published translation is held for this verse.
विद्याधराश् च धरणौ भियेव शरणार्थिनः । शिरोभिश् च शरीरैश् च पेतुश्चन्द्रप्रभाग्रतः
vidyādharāś ca dharaṇau bhiyeva śaraṇārthinaḥ / śirobhiś ca śarīraiś ca petuścandraprabhāgrataḥ
Sanskrit only: no published translation is held for this verse.
सूर्यप्रभो बभौ लोकदृष्टया खेचरश्रिया । सिन्दूरेणेव कीर्णेन नभो ऽभूद् असृजारुणम्
sūryaprabho babhau lokadṛṣṭayā khecaraśriyā / sindūreṇeva kīrṇena nabho 'bhūd asṛjāruṇam
Sanskrit only: no published translation is held for this verse.
सूर्यप्रभश् च संप्राप्य युयुधे तेन संमुखम् । खड्गचर्मधरेणैव सह दामोदरेण सः
sūryaprabhaś ca saṃprāpya yuyudhe tena saṃmukham / khaḍgacarmadhareṇaiva saha dāmodareṇa saḥ
Sanskrit only: no published translation is held for this verse.
युध्यमानश् च करणप्रयोगेण प्रविश्य तम् । खड्गखण्डितचर्माणं रिपुं भूमावपातयत्
yudhyamānaś ca karaṇaprayogeṇa praviśya tam / khaḍgakhaṇḍitacarmāṇaṃ ripuṃ bhūmāvapātayat
Sanskrit only: no published translation is held for this verse.
छेत्तुमिच्छति यावच् च शिरस् तस्य विवेल्लतः । तावद् आगत्य नभसा हुंकारो विष्णुना कृतः
chettumicchati yāvac ca śiras tasya vivellataḥ / tāvad āgatya nabhasā huṃkāro viṣṇunā kṛtaḥ
Sanskrit only: no published translation is held for this verse.
तच् छ्रुत्वा वीक्ष्य च हरिं नम्रस्तद्गौरवेण सः । दामोदरममुञ्चत्तं वधात्सूर्यप्रभस् ततः
tac chrutvā vīkṣya ca hariṃ namrastadgauraveṇa saḥ / dāmodaramamuñcattaṃ vadhātsūryaprabhas tataḥ
Sanskrit only: no published translation is held for this verse.
वधमुक्तं तमादाय भक्तं क्वापि ययौ हरिः । भगवान्स हि सद्भक्तम् इहामुत्र च रक्षति
vadhamuktaṃ tamādāya bhaktaṃ kvāpi yayau hariḥ / bhagavānsa hi sadbhaktam ihāmutra ca rakṣati
Sanskrit only: no published translation is held for this verse.
दामोदरानुगास्ते च ययुः सर्वे यतस् ततः । सूर्यप्रभो ऽपि गगनात्पितुः पार्श्वमवातरत्
dāmodarānugāste ca yayuḥ sarve yatas tataḥ / sūryaprabho 'pi gaganātpituḥ pārśvamavātarat
Sanskrit only: no published translation is held for this verse.
सामात्यमक्षतप्राप्तं पिता चन्द्रप्रभस्य तम् । अभ्यनन्दन्नृपाश्चान्ये तुष्टुवुर्दृष्टविक्रमम्
sāmātyamakṣataprāptaṃ pitā candraprabhasya tam / abhyanandannṛpāścānye tuṣṭuvurdṛṣṭavikramam
Sanskrit only: no published translation is held for this verse.
ततो ऽत्र यावत् सर्वे ते हृष्टास्तत्कथया स्थिताः । आगात् सुभटसंबन्धी तावद्दूतो ऽपरस् ततः
tato 'tra yāvat sarve te hṛṣṭāstatkathayā sthitāḥ / āgāt subhaṭasaṃbandhī tāvaddūto 'paras tataḥ
Sanskrit only: no published translation is held for this verse.
स च चन्द्रप्रभस्यैव लेखमग्रे समर्पयत् । तमुद्घाट्य च सिद्धार्थः सदस्येवम् अवाचयत्
sa ca candraprabhasyaiva lekhamagre samarpayat / tamudghāṭya ca siddhārthaḥ sadasyevam avācayat
Sanskrit only: no published translation is held for this verse.
श्रीमानुन्नतवंशमौक्तिकमणिश्चन्द्रप्रभो भूपती राजा श्रीसुभटेन सादरमिदं श्रीकोङ्कणाद्बोध्यते । नीता मे तनयापहृत्य रजनौ सत्त्वेन केनापि या सा प्राप्ता तव सूनुनेत्यवगतं यत्तेन तुष्टा वयम्
śrīmānunnatavaṃśamauktikamaṇiścandraprabho bhūpatī rājā śrīsubhaṭena sādaramidaṃ śrīkoṅkaṇādbodhyate / nītā me tanayāpahṛtya rajanau sattvena kenāpi yā sā prāptā tava sūnunetyavagataṃ yattena tuṣṭā vayam
Sanskrit only: no published translation is held for this verse.
तद्युक्तेन सुतेन तेन सह तत्सूर्यप्रभेणोद्यमो युष्माभिः क्रियताम् अनर्गलम् इहाप्यस्मद्गृहाभ्यागमे । यावत्तां परलोकतः पुनर् इव प्रत्यागतामात्मजां पश्यामश् च विवाहकार्यमधुना कुर्मश् च तस्या वयम्
tadyuktena sutena tena saha tatsūryaprabheṇodyamo yuṣmābhiḥ kriyatām anargalam ihāpyasmadgṛhābhyāgame / yāvattāṃ paralokataḥ punar iva pratyāgatāmātmajāṃ paśyāmaś ca vivāhakāryamadhunā kurmaś ca tasyā vayam
Sanskrit only: no published translation is held for this verse.
इत्य् अत्र वाचिते लेखे सिद्धार्थेन तथेति सः । राजा चन्द्रप्रभो दूतं सच्चकार जहर्ष च
ity atra vācite lekhe siddhārthena tatheti saḥ / rājā candraprabho dūtaṃ saccakāra jaharṣa ca
Sanskrit only: no published translation is held for this verse.
आनाययच् च सुभटस्यान्तिकं चन्द्रिकावतीम् । तत्सुताम् अपरान्तं तं प्रहस्तं प्रेष्य सत्वरम्
ānāyayac ca subhaṭasyāntikaṃ candrikāvatīm / tatsutām aparāntaṃ taṃ prahastaṃ preṣya satvaram
Sanskrit only: no published translation is held for this verse.
प्रातश् च जग्मुः सर्वे ते कृत्वा सूर्यप्रभं पुरः । अपरान्तं विमानेन जनमेजयसंयुताः
prātaś ca jagmuḥ sarve te kṛtvā sūryaprabhaṃ puraḥ / aparāntaṃ vimānena janamejayasaṃyutāḥ
Sanskrit only: no published translation is held for this verse.
तत्र तान्सुभटो राजा दुहितृप्राप्तिनन्दितः । भृशमानर्च चक्रे च सुतापरिणयोत्सवम्
tatra tānsubhaṭo rājā duhitṛprāptinanditaḥ / bhṛśamānarca cakre ca sutāpariṇayotsavam
Sanskrit only: no published translation is held for this verse.
ददौ च चन्द्रिकावत्यै सो ऽस्यै रत्नादिकं तथा । यथा वीरभटाद्यास्ते स्वदत्तेन ललज्जिरे
dadau ca candrikāvatyai so 'syai ratnādikaṃ tathā / yathā vīrabhaṭādyāste svadattena lalajjire
Sanskrit only: no published translation is held for this verse.
ततः सूर्यप्रभे तत्र स्थिते श्वशुरवेश्मनि । आगात् पौरवसंबन्धी दूतो लावाणकादपि
tataḥ sūryaprabhe tatra sthite śvaśuraveśmani / āgāt pauravasaṃbandhī dūto lāvāṇakādapi
Sanskrit only: no published translation is held for this verse.
सो ऽपि चन्द्रप्रभम् इदं निजस्वामिवचो ऽभ्यधात् । सुता सुलोचना नीता श्रीमत्सूर्यप्रभेण मे
so 'pi candraprabham idaṃ nijasvāmivaco 'bhyadhāt / sutā sulocanā nītā śrīmatsūryaprabheṇa me
Sanskrit only: no published translation is held for this verse.
ततो मे नैव संतापस्तद्युक्तः किं तु मद्गृहम् । आनीयतां स युष्माभिराचारं यद् विदध्महे
tato me naiva saṃtāpastadyuktaḥ kiṃ tu madgṛham / ānīyatāṃ sa yuṣmābhirācāraṃ yad vidadhmahe
Sanskrit only: no published translation is held for this verse.
तच् छ्रुत्वैव मुदाभ्यर्च्य दूतं चन्द्रप्रभो नृपः । आनाययत्प्रहस्तेन पितुः पार्श्वं सुलोचनाम्
tac chrutvaiva mudābhyarcya dūtaṃ candraprabho nṛpaḥ / ānāyayatprahastena pituḥ pārśvaṃ sulocanām
Sanskrit only: no published translation is held for this verse.
ततः ससुभटाः सर्वे सह सूर्यप्रभेण ते । लावाणकं विमानेन ययुर्ध्यातोपगामिना
tataḥ sasubhaṭāḥ sarve saha sūryaprabheṇa te / lāvāṇakaṃ vimānena yayurdhyātopagāminā
Sanskrit only: no published translation is held for this verse.
तत्रोद्वाहोत्सवं कृत्वा सूर्यप्रभसुलोचने । रत्नैरपूरयत्सो ऽपि पौरवो ऽर्चितराजकः
tatrodvāhotsavaṃ kṛtvā sūryaprabhasulocane / ratnairapūrayatso 'pi pauravo 'rcitarājakaḥ
Sanskrit only: no published translation is held for this verse.
तेनोपचर्यमाणेषु सुखस्थेष्व् अत्र तेषु च । प्रजिघाय सुरोहो ऽपि दूतं चीननरेश्वरः
tenopacaryamāṇeṣu sukhastheṣv atra teṣu ca / prajighāya suroho 'pi dūtaṃ cīnanareśvaraḥ
Sanskrit only: no published translation is held for this verse.
सो ऽप्य् अन्यवद्दूतमुखेनार्थयाम् आस पार्थिवः । हृतकन्यस्तया साकं तेषामागमनं गृहे
so 'py anyavaddūtamukhenārthayām āsa pārthivaḥ / hṛtakanyastayā sākaṃ teṣāmāgamanaṃ gṛhe
Sanskrit only: no published translation is held for this verse.
ततश् चन्द्रप्रभो राजा हृष्टस् तस्यापि तां सुताम् । विद्युन्मालां प्रहस्तेनानाययाम् आस केतनम्
tataś candraprabho rājā hṛṣṭas tasyāpi tāṃ sutām / vidyunmālāṃ prahastenānāyayām āsa ketanam
Sanskrit only: no published translation is held for this verse.
अन्येद्युश् च विमानेन सहसूर्यप्रभा ययुः । चन्द्रप्रभाद्याः सर्वे ते चीनदेशं सपौरवाः
anyedyuś ca vimānena sahasūryaprabhā yayuḥ / candraprabhādyāḥ sarve te cīnadeśaṃ sapauravāḥ
Sanskrit only: no published translation is held for this verse.
तत्राग्रे निर्गतो राजा निजकोट्टं प्रवेश्य तान् । स सुरोहो ऽपि दुहितुश्चक्रे वैवाहिकं विधिम्
tatrāgre nirgato rājā nijakoṭṭaṃ praveśya tān / sa suroho 'pi duhituścakre vaivāhikaṃ vidhim
Sanskrit only: no published translation is held for this verse.
आदाच् च विद्युन्मालायै तस्यै सूर्यप्रभाय च । असंख्यहेमहस्त्यश्वरत्नचीनांशुकादिकम्
ādāc ca vidyunmālāyai tasyai sūryaprabhāya ca / asaṃkhyahemahastyaśvaratnacīnāṃśukādikam
Sanskrit only: no published translation is held for this verse.
तस्थुश् च तत्र ते तैस् तैर् भोगैश् चन्द्रप्रभादयः । दिनानि कतिचित्सर्वे सुरोहाभ्यर्चितास्तदा
tasthuś ca tatra te tais tair bhogaiś candraprabhādayaḥ / dināni katicitsarve surohābhyarcitāstadā
Sanskrit only: no published translation is held for this verse.
आसीत्सूर्यप्रभश् चात्र विलसद्धनयौवनः । प्रावृट्कालो यथा विद्युन्मालया शोभितस्तया
āsītsūryaprabhaś cātra vilasaddhanayauvanaḥ / prāvṛṭkālo yathā vidyunmālayā śobhitastayā
Sanskrit only: no published translation is held for this verse.
एवं स बुभुजे तत्र तत्र श्वशुरवेश्मनि । तत्तत्कान्तासखः सूर्यप्रभो भोगान्सबान्धवः
evaṃ sa bubhuje tatra tatra śvaśuraveśmani / tattatkāntāsakhaḥ sūryaprabho bhogānsabāndhavaḥ
Sanskrit only: no published translation is held for this verse.
ततः संमन्त्र्य सिद्धार्थप्रमुखैः सचिवैः सह । क्रमाद्वीरभटादींस्तानश्वीयसहितान्नृपान्
tataḥ saṃmantrya siddhārthapramukhaiḥ sacivaiḥ saha / kramādvīrabhaṭādīṃstānaśvīyasahitānnṛpān
Sanskrit only: no published translation is held for this verse.
विसृज्य निजदेशेषु तं सुरोहमहीपतिम् । आमन्त्र्य तत्सुतायुक्तः पितृभ्यां सह सानुगः
visṛjya nijadeśeṣu taṃ surohamahīpatim / āmantrya tatsutāyuktaḥ pitṛbhyāṃ saha sānugaḥ
Sanskrit only: no published translation is held for this verse.
भूतासनविमानं तदारुह्य व्योमवर्त्मना । स्वं स सूर्यप्रभः प्रायाच्छालकं नगरं कृती
bhūtāsanavimānaṃ tadāruhya vyomavartmanā / svaṃ sa sūryaprabhaḥ prāyācchālakaṃ nagaraṃ kṛtī
Sanskrit only: no published translation is held for this verse.
क्वचिन् नृत्तासङ्गः क्वचिद् अपि च संगीतकरसः क्वचित् पानक्रीडा क्वचन सुदृशां मण्डनविधिः । क्वचिल् लब्धाबीष्टस्तुतिमुखरवैतालिकरवः पुरे तस्मिन्न् आसीत् प्रमद इति तस्यागमनजः
kvacin nṛttāsaṅgaḥ kvacid api ca saṃgītakarasaḥ kvacit pānakrīḍā kvacana sudṛśāṃ maṇḍanavidhiḥ / kvacil labdhābīṣṭastutimukharavaitālikaravaḥ pure tasminn āsīt pramada iti tasyāgamanajaḥ
Sanskrit only: no published translation is held for this verse.
तत्रान्याः पितृवेश्मसु स्थितवतीरानाय्य स स्वप्रिया दत्तैस् तत्पितृभिर् गजाश्वनिवहैस् ताभिः सहैवागतः । नानारत्नसुपूर्णभारविनतैर् उष्ट्रैश् च संख्यातिगैर् लीलादर्शितदिग्जयोत्थविभवश् चक्रे प्रजाकौतुकम्
tatrānyāḥ pitṛveśmasu sthitavatīrānāyya sa svapriyā dattais tatpitṛbhir gajāśvanivahais tābhiḥ sahaivāgataḥ / nānāratnasupūrṇabhāravinatair uṣṭraiś ca saṃkhyātigair līlādarśitadigjayotthavibhavaś cakre prajākautukam
Sanskrit only: no published translation is held for this verse.
बहुवसु भूरिनिधानं तेन महाभोगिना तदाध्युषितम् । सुरधनदभुजगनगरैः कृतम् इव तच् छाकलं विबभौ
bahuvasu bhūrinidhānaṃ tena mahābhoginā tadādhyuṣitam / suradhanadabhujaganagaraiḥ kṛtam iva tac chākalaṃ vibabhau
Sanskrit only: no published translation is held for this verse.
ततो मदनसेनया सह स तत्र सूर्यप्रभो यथाभिमतभोगभुक्सकलपूर्णसंपत्सुखी । उवास पितृसंयुतः ससचिवो ऽन्यपत्नीयुतः कृतागमनसंविदं मयम् उदीक्षमाणो ऽन्वहम्
tato madanasenayā saha sa tatra sūryaprabho yathābhimatabhogabhuksakalapūrṇasaṃpatsukhī / uvāsa pitṛsaṃyutaḥ sasacivo 'nyapatnīyutaḥ kṛtāgamanasaṃvidaṃ mayam udīkṣamāṇo 'nvaham
Sanskrit only: no published translation is held for this verse.