Somadeva: Kathasaritsagara 8.3

तद् एवम् आदौ नमुचिस् ततो ऽभूत् प्रबलश् च सः । सैष प्रभासस् तत्पुण्यप्रभावाद् दुर्जयो ऽरिभिः

tad evam ādau namucis tato 'bhūt prabalaś ca saḥ / saiṣa prabhāsas tatpuṇyaprabhāvād durjayo 'ribhiḥ

Sanskrit only: no published translation is held for this verse.

या च संबन्धिनी तस्य प्रबलस्यौषधीगुहा । तेन प्रभासस्यात्मीया वश्या सास्य सकिंकरा

yā ca saṃbandhinī tasya prabalasyauṣadhīguhā / tena prabhāsasyātmīyā vaśyā sāsya sakiṃkarā

Sanskrit only: no published translation is held for this verse.

तदधश् चास्ति पाताले मन्दिरं प्रबलस्य तत् । यत्र द्वादश सन्त्य् अस्य मुख्यभार्याः स्वलंकृताः

tadadhaś cāsti pātāle mandiraṃ prabalasya tat / yatra dvādaśa santy asya mukhyabhāryāḥ svalaṃkṛtāḥ

Sanskrit only: no published translation is held for this verse.

विविधानि च रत्नानि नानाप्रहरणानि च । चिन्तामणिश् च लक्षं च योधानां तुरगास् तथा

vividhāni ca ratnāni nānāpraharaṇāni ca / cintāmaṇiś ca lakṣaṃ ca yodhānāṃ turagās tathā

Sanskrit only: no published translation is held for this verse.

तत् प्रभासस्य संबन्धि सर्वम् अस्य पुरार्जितम् । तद् ईदृशः प्रभासो ऽयं नास्येदं किंचिद् अद्भुतम्

tat prabhāsasya saṃbandhi sarvam asya purārjitam / tad īdṛśaḥ prabhāso 'yaṃ nāsyedaṃ kiṃcid adbhutam

Sanskrit only: no published translation is held for this verse.

एवं ततो मुनिकुमारकतो निशम्य सूर्यप्रभप्रभृतयः समयप्रभासाः । रत्नाद्य् अवाप्तुम् अथ तत् प्रययुस् तदैव पातालगं प्रबलवेश्मबिलप्रवेशम्

evaṃ tato munikumārakato niśamya sūryaprabhaprabhṛtayaḥ samayaprabhāsāḥ / ratnādy avāptum atha tat prayayus tadaiva pātālagaṃ prabalaveśmabilapraveśam

Sanskrit only: no published translation is held for this verse.

तेन प्रविश्य परिगृह्य च पूर्वपत्नीश् चिन्तामणिं च तुरगान् असुरांश् च योधान् । निर्गत्य चात्तनिखिलद्रविणः स एकः सूर्यप्रभं किम् अपि तोषितवान् प्रभासः

tena praviśya parigṛhya ca pūrvapatnīś cintāmaṇiṃ ca turagān asurāṃś ca yodhān / nirgatya cāttanikhiladraviṇaḥ sa ekaḥ sūryaprabhaṃ kim api toṣitavān prabhāsaḥ

Sanskrit only: no published translation is held for this verse.

अथ समयसुनीथः सप्रभासः सुमेरुप्रभृतिभिर् अनुयातो राजभिर् मन्त्रिभिश् च । द्रुतम् अभिमतसिद्धिं प्राप्य सूर्यप्रभो ऽसौ पुनर् अपि निजसेनासंनिवेशं तम् आगात्

atha samayasunīthaḥ saprabhāsaḥ sumeruprabhṛtibhir anuyāto rājabhir mantribhiś ca / drutam abhimatasiddhiṃ prāpya sūryaprabho 'sau punar api nijasenāsaṃniveśaṃ tam āgāt

Sanskrit only: no published translation is held for this verse.

तत्र सो ऽसुरनराधिपादिषु स्वस्ववासकगतेषु तेषु तम् । रात्रिशेषम् अनयत् कुशास्तरे संनिगृह्य रणदीक्षितः पुनः

tatra so 'suranarādhipādiṣu svasvavāsakagateṣu teṣu tam / rātriśeṣam anayat kuśāstare saṃnigṛhya raṇadīkṣitaḥ punaḥ

Sanskrit only: no published translation is held for this verse.