Somadeva: Kathasaritsagara 8.5

आवां महायानसुमायसंज्ञाव् उभाव् अयं सिंहबलस् तृतीयः । महाश्मशानाधिपतित्वसिद्धा विद्याधरेन्द्रैर् अपरैर् अधृष्याः

āvāṃ mahāyānasumāyasaṃjñāv ubhāv ayaṃ siṃhabalas tṛtīyaḥ / mahāśmaśānādhipatitvasiddhā vidyādharendrair aparair adhṛṣyāḥ

Sanskrit only: no published translation is held for this verse.

तेषां श्मशानान्तसुखस्थितानाम् अस्माकम् आगन् निकटं कदाचित् । सदा प्रसन्ना शरभाननाख्या सद्योगिनी दिव्यमहाप्रभावा

teṣāṃ śmaśānāntasukhasthitānām asmākam āgan nikaṭaṃ kadācit / sadā prasannā śarabhānanākhyā sadyoginī divyamahāprabhāvā

Sanskrit only: no published translation is held for this verse.

कुत्र स्थिता त्वं वद किं च तत्र दृष्टं भवत्या भगवत्य् अपूर्वम् । सास्माभिर् इत्थं प्रणिपत्य पृष्टा वृत्तान्तम् एवं वदति स्म देव

kutra sthitā tvaṃ vada kiṃ ca tatra dṛṣṭaṃ bhavatyā bhagavaty apūrvam / sāsmābhir itthaṃ praṇipatya pṛṣṭā vṛttāntam evaṃ vadati sma deva

Sanskrit only: no published translation is held for this verse.

द्रष्टुं प्रभुं स्वं सह योगिनीभिर् देवं महाकालम् अहं गतासम् । व्यजिज्ञपत् तत्र च मत्समक्षम् आगत्य वेतालपतिस् तम् एकः

draṣṭuṃ prabhuṃ svaṃ saha yoginībhir devaṃ mahākālam ahaṃ gatāsam / vyajijñapat tatra ca matsamakṣam āgatya vetālapatis tam ekaḥ

Sanskrit only: no published translation is held for this verse.

अस्मन्महासैन्यपतेस् तनूजां विद्याधरेशैर् निहतस्य देव । पश्याग्निकाख्यस्य हरत्य् अकाण्डे तेजःप्रभो नाम महार्घरूपाम्

asmanmahāsainyapates tanūjāṃ vidyādhareśair nihatasya deva / paśyāgnikākhyasya haraty akāṇḍe tejaḥprabho nāma mahārgharūpām

Sanskrit only: no published translation is held for this verse.

सिद्धैश् च विद्याधरचक्रवर्तिपत्नीभवित्री गदिता प्रभो सा । तन् मोचयैनां कुरु नः प्रसादं यावन् न दूरं ह्रियते हठेन

siddhaiś ca vidyādharacakravartipatnībhavitrī gaditā prabho sā / tan mocayaināṃ kuru naḥ prasādaṃ yāvan na dūraṃ hriyate haṭhena

Sanskrit only: no published translation is held for this verse.

इत्य् आर्तवेतालवचो निशम्य प्रयात तां मोचयतेति सो ऽस्मान् । देवः समादिक्षद् अथाम्बरेण गत्वैव सास्माभिर् अवापि कन्या

ity ārtavetālavaco niśamya prayāta tāṃ mocayateti so 'smān / devaḥ samādikṣad athāmbareṇa gatvaiva sāsmābhir avāpi kanyā

Sanskrit only: no published translation is held for this verse.

सच्चक्रवर्तिश्रुतशर्महेतोर् एतां हरामीति च तं वदन्तम् । संस्तभ्य तेजःप्रभम् आत्मशक्त्या सास्माभिर् आनीय विभोर् वितीर्णा

saccakravartiśrutaśarmahetor etāṃ harāmīti ca taṃ vadantam / saṃstabhya tejaḥprabham ātmaśaktyā sāsmābhir ānīya vibhor vitīrṇā

Sanskrit only: no published translation is held for this verse.

तेनार्पिता च स्वजनाय कन्या दृष्टं मया कामम् अपूर्वम् एतत् । ततो ऽत्र कांश्चिद् दिवसान् उषित्वा प्रणम्य देवं तम् इहागतास्मि

tenārpitā ca svajanāya kanyā dṛṣṭaṃ mayā kāmam apūrvam etat / tato 'tra kāṃścid divasān uṣitvā praṇamya devaṃ tam ihāgatāsmi

Sanskrit only: no published translation is held for this verse.

इत्य् उक्तवाक्या शरभानना सा योगिन्य् अथास्माभिर् अपृच्छ्यतैवम् । को ब्रूहि विद्याधरचक्रवर्ती भविष्यति त्वं खलु वेत्सि सर्वम्

ity uktavākyā śarabhānanā sā yoginy athāsmābhir apṛcchyataivam / ko brūhi vidyādharacakravartī bhaviṣyati tvaṃ khalu vetsi sarvam

Sanskrit only: no published translation is held for this verse.

सूर्यप्रभो हन्त भविष्यतीति प्रोक्ते तया सिंहबलो ऽब्रवीन् नौ । असत्यम् एतन् ननु बद्धकक्ष्या देवा हि सेन्द्राः श्रुतशर्मपक्षे

sūryaprabho hanta bhaviṣyatīti prokte tayā siṃhabalo 'bravīn nau / asatyam etan nanu baddhakakṣyā devā hi sendrāḥ śrutaśarmapakṣe

Sanskrit only: no published translation is held for this verse.

श्रुत्वैतद् आर्या वदति स्म सा नौ न प्रत्ययश् चेच् छृणुतं ब्रवीमि । यथा भविष्यत्य् अचिरेण युद्धं सूर्यप्रभस्य श्रुतशर्मणश् च

śrutvaitad āryā vadati sma sā nau na pratyayaś cec chṛṇutaṃ bravīmi / yathā bhaviṣyaty acireṇa yuddhaṃ sūryaprabhasya śrutaśarmaṇaś ca

Sanskrit only: no published translation is held for this verse.

हनिष्यते सिंहबलो यदायं युष्मत्समक्षं युधि मानुषेण । युवाम् अभिज्ञानम् इदं विलोक्य विज्ञास्यथः सत्यम् इदं वचो मे

haniṣyate siṃhabalo yadāyaṃ yuṣmatsamakṣaṃ yudhi mānuṣeṇa / yuvām abhijñānam idaṃ vilokya vijñāsyathaḥ satyam idaṃ vaco me

Sanskrit only: no published translation is held for this verse.

एतावद् उक्त्वा किल योगिनी सा ययौ च यातानि च तान्य् अहानि । प्रत्यक्षम् अद्येह च दृष्टम् एतन् मर्त्येन यत् सिंहबलो हतो ऽसौ

etāvad uktvā kila yoginī sā yayau ca yātāni ca tāny ahāni / pratyakṣam adyeha ca dṛṣṭam etan martyena yat siṃhabalo hato 'sau

Sanskrit only: no published translation is held for this verse.

तत्प्रत्ययान् निश्चितम् एव मत्वा त्वाम् एव सर्वद्युचराधिराजम् । अवाम् इमौ पादसरोजयुग्मं समाश्रितौ शासनवर्तिनौ ते

tatpratyayān niścitam eva matvā tvām eva sarvadyucarādhirājam / avām imau pādasarojayugmaṃ samāśritau śāsanavartinau te

Sanskrit only: no published translation is held for this verse.

इत्य् उक्तवन्तौ स मयादियुक्तः सूर्यप्रभस् ताव् अथ खेचरेन्द्रौ । श्रद्धाय संमानितवान् यथार्हं हृष्टौ महायानसुमायकौ द्वौ

ity uktavantau sa mayādiyuktaḥ sūryaprabhas tāv atha khecarendrau / śraddhāya saṃmānitavān yathārhaṃ hṛṣṭau mahāyānasumāyakau dvau

Sanskrit only: no published translation is held for this verse.

तच् छ्रुत्वा श्रुतशर्मणो ऽत्र सुतराम् उद्वेगभाजो व्यधाद् आश्वासं किल दूत्यया शतमखः संप्रेष्य विश्वावसुम् । धीरस् त्वं भव सर्वदेवसहितः प्रातः करिष्यामि ते साहाय्यं रणमूर्धनीति धृतिकृत् संदेश्य तत्स्नेहतः

tac chrutvā śrutaśarmaṇo 'tra sutarām udvegabhājo vyadhād āśvāsaṃ kila dūtyayā śatamakhaḥ saṃpreṣya viśvāvasum / dhīras tvaṃ bhava sarvadevasahitaḥ prātaḥ kariṣyāmi te sāhāyyaṃ raṇamūrdhanīti dhṛtikṛt saṃdeśya tatsnehataḥ

Sanskrit only: no published translation is held for this verse.

स च परबलभेदालोकनोत्पन्नतोषः समरशिरसि दृष्टारातिपक्षक्षयश् च । पुनर् अपि निजकान्ताः प्रोज्झ्य सूर्यप्रभस् ता निशि सचिवसमेतो वासकं स्वं विवेश

sa ca parabalabhedālokanotpannatoṣaḥ samaraśirasi dṛṣṭārātipakṣakṣayaś ca / punar api nijakāntāḥ projjhya sūryaprabhas tā niśi sacivasameto vāsakaṃ svaṃ viveśa

Sanskrit only: no published translation is held for this verse.