सहस्रवृदियं भूमिः । परं व्योम सहस्रवृत् । अश्विना भुज्यू नासत्या । विश्वस्य जगतस्पती, इति । जाया भूमिः पतिर्व्योम । मिथुनं ता अतुर्यथुः । पुत्रो बृहस्पती रुद्रः । सरमा इति स्त्रीपुमम्, इति । शुक्रं वामन्यद्यजतं वामन्यत् । विषुरूपे अहनी द्यौरिव स्थः (१) । विश्वा हि माया अवथः स्वधावन्तौ । भद्रा वां पूषणाविह रातिरस्तु, इति । वासात्यौ चित्रौ जगतो निधानौ । द्यावाभूमी चरथः सꣳ सखायौ । तावश्विना रासभाश्वा हवं मे । शुभस्पती आगतꣳ सूर्यया सह, इति । त्युग्रो ह भुज्युमश्विनोदमेघे । रुयिं न कश्चिन्ममृवां३ अवाहाः । तमूहथुर्नौभिरात्मन्वतीभिः । अन्तरिक्षप्रुड्भिरपोदकाभिः (२), इति । तिस्रः क्षपस्त्रिरहाऽतिव्रजद्भिः । नासत्या भुज्युमूहथुः पतत्रैः । समुद्रस्य धन्वन्नार्द्रस्य पारे । त्रिभी रथैः शतपद्भिः षडश्वैः, इति । सवितारं वितन्वन्तम् । अनुबध्नाति शाम्बरः । आपपूरु षम्वरश्चैव। सविताऽरेपसो भवत्, इति । त्यꣳ सुतृप्तं विदित्वैव । बहुसोमगिरं वशी ( ३) । अन्वेति तुग्रो वक्रियां तम् । आयसूयान्त्सोमतृप्सुषु, इति । स संग्रामस्तमोद्योऽत्योतः । वाचो गाः पिपाति तत् । स तद्गोभिः स्तवाऽत्येत्यन्ये । रक्षसाऽनन्विताश्च ये, इति । अन्वेति परिवृत्यास्तः । एवमेतौ स्थो अश्विना । ते एते द्युःपृथिव्योः । अहरहर्गर्भं दधाथे ( ४), इति । तयोरेतौ वत्सावहोरात्रे । पृथिव्या अहः । दिवो रात्रिः । ता अविसृष्टौ । दंपती एव भवतः, इति । तयोरेतौ वत्सौ । अग्निश्चाऽऽदित्यश्च। रात्रेर्वत्सः । श्वेत आदित्यः । अह्नोऽग्निः । (५) ताम्रो अरुणः । ता अविसृष्टौ । दंपती एव भवतः, इति । तयोरेतौ वत्सौ । वृत्रश्च वैद्युतश्च । अग्नेर्वृत्रः । वैद्युत आदित्यस्य । ता अविसृष्टौ । दंपती एव भवतः, इति । तयोरेतौ वत्सौ (६) । उष्मा च नीहारश्च । वृत्रस्योष्मा । वैद्युतस्य नीहारः । तौ तावेव प्रतिपद्येते, इति । सेयꣳ रात्री गर्भिणी पुत्रेण संवसति । तस्या वा एतदु-ल्बणम् । यद्रात्रौ रश्मयः । यथा गोर्गर्भिण्या उल्बणम् । एवमेतस्यां उल्बणम्, इति । प्रजयिष्णुः प्रजया च पशुभिश्च भवति । य एवं वेद । एतमुद्यन्तमपियन्तं चेति । आदित्यः पुण्यस्य वत्सः, इति । अथ पवित्राङ्गिरसः ( ७), इति ।। स्थोऽपोदकाभिर्वशी दधाथे अग्निस्तयोरेतौ वत्सौ भवति चत्वारि च ।।
sahasravṛdiyaṃ bhūmiḥ | paraṃ vyoma sahasravṛt | aśvinā bhujyū nāsatyā | viśvasya jagataspatī, iti | jāyā bhūmiḥ patirvyoma | mithunaṃ tā aturyathuḥ | putro bṛhaspatī rudraḥ | saramā iti strīpumam, iti | śukraṃ vāmanyadyajataṃ vāmanyat | viṣurūpe ahanī dyauriva sthaḥ (1) | viśvā hi māyā avathaḥ svadhāvantau | bhadrā vāṃ pūṣaṇāviha rātirastu, iti | vāsātyau citrau jagato nidhānau | dyāvābhūmī carathaḥ sam̐ sakhāyau | tāvaśvinā rāsabhāśvā havaṃ me | śubhaspatī āgatam̐ sūryayā saha, iti | tyugro ha bhujyumaśvinodameghe | ruyiṃ na kaścinmamṛvāṃ3 avāhāḥ | tamūhathurnaubhirātmanvatībhiḥ | antarikṣapruḍbhirapodakābhiḥ (2), iti | tisraḥ kṣapastrirahā'tivrajadbhiḥ | nāsatyā bhujyumūhathuḥ patatraiḥ | samudrasya dhanvannārdrasya pāre | tribhī rathaiḥ śatapadbhiḥ ṣaḍaśvaiḥ, iti | savitāraṃ vitanvantam | anubadhnāti śāmbaraḥ | āpapūru ṣamvaraścaiva| savitā'repaso bhavat, iti | tyam̐ sutṛptaṃ viditvaiva | bahusomagiraṃ vaśī ( 3) | anveti tugro vakriyāṃ tam | āyasūyāntsomatṛpsuṣu, iti | sa saṃgrāmastamodyo'tyotaḥ | vāco gāḥ pipāti tat | sa tadgobhiḥ stavā'tyetyanye | rakṣasā'nanvitāśca ye, iti | anveti parivṛtyāstaḥ | evametau stho aśvinā | te ete dyuḥpṛthivyoḥ | aharahargarbhaṃ dadhāthe ( 4), iti | tayoretau vatsāvahorātre | pṛthivyā ahaḥ | divo rātriḥ | tā avisṛṣṭau | daṃpatī eva bhavataḥ, iti | tayoretau vatsau | agniścā''dityaśca| rātrervatsaḥ | śveta ādityaḥ | ahno'gniḥ | (5) tāmro aruṇaḥ | tā avisṛṣṭau | daṃpatī eva bhavataḥ, iti | tayoretau vatsau | vṛtraśca vaidyutaśca | agnervṛtraḥ | vaidyuta ādityasya | tā avisṛṣṭau | daṃpatī eva bhavataḥ, iti | tayoretau vatsau (6) | uṣmā ca nīhāraśca | vṛtrasyoṣmā | vaidyutasya nīhāraḥ | tau tāveva pratipadyete, iti | seyam̐ rātrī garbhiṇī putreṇa saṃvasati | tasyā vā etadu-lbaṇam | yadrātrau raśmayaḥ | yathā gorgarbhiṇyā ulbaṇam | evametasyāṃ ulbaṇam, iti | prajayiṣṇuḥ prajayā ca paśubhiśca bhavati | ya evaṃ veda | etamudyantamapiyantaṃ ceti | ādityaḥ puṇyasya vatsaḥ, iti | atha pavitrāṅgirasaḥ ( 7), iti || stho'podakābhirvaśī dadhāthe agnistayoretau vatsau bhavati catvāri ca ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.