देवा वै सत्रमासत । ऋद्धिपरिमितं यशस्कामाः । तेऽब्रुवन् । यन्नः प्रथमं यश ऋच्छात् । सर्वेषां नस्तत्सहासदिति । तेषां कुरुक्षेत्रं वेदिरासीत् । तस्यै खाण्डवो दक्षिणार्ध आसीत् । तूर्घ्नमुत्तरार्धः । परीणज् जघनार्धः । मरव उत्करः १ तेषां मखं वैष्णवं याश आर्च्छत् । तन्न्यकामयत । तेनापाक्रामत् । तं देवा अन्वायन् । यशो वरुरुत्समानाः । तस्यान्वागतस्य । सव्याद्धनुरजायत । दक्षिणादिषवः । तस्मादिषुधन्वं पुण्यजन्म । यज्ञजन्मा हि २ तमेकꣳ सन्तम् । बहवो नाभ्यधृष्णुवन् । तस्मादेकमिषुधन्!विनम् । बहवोऽनिषुधन्वा नाभि धृष्णुवन्ति । सोऽस्मयत । एकं मा सन्तं बहवो नाभ्यधर्षिषुरिति । तस्य सिष्मियाणस्य तेजोऽपाक्रामत् । तद्देवा ओषधीषु न्यमृजुः । ते श्यामाका अभवन् । स्मयाका वै नामैते ३ तत्स्मयाकानाꣳ स्मयाकत्वम् । तस्माद्दीक्षितेनापिगृह्य स्मेतव्यम् । तेजसो धृत्यै । स धनुः प्रतिष्कभ्यातिष्ठत् । ता उपदीका अब्रुवन्वरं वृणामहै । अथ व इमꣳ रन्धयाम । यत्र क्व च खनाम । तदपोऽभि तृणदामेति । तस्मादुपदीका यत्र क्व च खनन्ति । तदपोऽभि तृन्दन्ति ४ वारेवृतꣳ ह्यासाम् । तस्य ज्यामप्यादन् । तस्य धनुर्विप्रवमाणꣳ शिर उदवर्तयत् । तद्द्यावापृथिवी अनु प्रावर्तत यत्प्रावर्तत । तत्प्रवर्ग्यस्य प्रवर्ग्यत्वम् । यद्घ्राꣳ३ इत्यपतत् । तद्घर्मस्य घर्मत्वम् । महतो वीर्यमपप्तदिति । तन्महावीरस्य महावीरत्वम् ५ यदस्याः समभरन् । तत्सम्राज्ञः सम्राट्त्वम् । तꣳ स्तृतं देवतास्त्रेधा व्यगृह्णत । अग्निः प्रातःसवनम् । इन्द्रो माध्यंदिनꣳ सवनम् । विश्वे देवास्तृतीयसवनम् । तेनापशिर्ष्णा यज्ञेन यजमानाः । नाशिषोऽवारुन्धत । न सुवर्गं लोकमभ्यजयन् । ते देवा अश्विनावब्रुवन् ६ भिषजौ वै स्थः । इदं यज्ञस्य शिरः प्रति धत्तमिति । तावब्रूतां वरं वृणावहै । ग्रह एव नावत्रापि गृह्यतामिति । ताभ्यामेतमाश्विनमगृह्णन् । तावेतद्यज्ञस्य शिरः प्रत्यधत्ताम् । यत्प्रवर्ग्यः । तेन सशीर्ष्णा यज्ञेन यजमानाः । अवाशिषोऽरुन्धत । अभि सुवर्गं लोकमजयन् । यत्प्रवर्ग्यं प्रवृणक्ति । यज्ञस्यैव तच्छिरः प्रति दधाति । तेन सशीर्ष्णा यज्ञेन यजमानः । अवाशिषो रुन्धे । अभि सुवर्गं लोकां जयति । तस्मादेष आश्विनप्रवया इव । यत्प्रवर्ग्यः ७ उत्करो ह्येते तृन्दन्ति महावीरत्वमब्रुवन्नजयन्त्सप्त च
devā vai satramāsata | ṛddhiparimitaṃ yaśaskāmāḥ | te'bruvan | yannaḥ prathamaṃ yaśa ṛcchāt | sarveṣāṃ nastatsahāsaditi | teṣāṃ kurukṣetraṃ vedirāsīt | tasyai khāṇḍavo dakṣiṇārdha āsīt | tūrghnamuttarārdhaḥ | parīṇaj jaghanārdhaḥ | marava utkaraḥ 1 teṣāṃ makhaṃ vaiṣṇavaṃ yāśa ārcchat | tannyakāmayata | tenāpākrāmat | taṃ devā anvāyan | yaśo varurutsamānāḥ | tasyānvāgatasya | savyāddhanurajāyata | dakṣiṇādiṣavaḥ | tasmādiṣudhanvaṃ puṇyajanma | yajñajanmā hi 2 tamekam̐ santam | bahavo nābhyadhṛṣṇuvan | tasmādekamiṣudhan!vinam | bahavo'niṣudhanvā nābhi dhṛṣṇuvanti | so'smayata | ekaṃ mā santaṃ bahavo nābhyadharṣiṣuriti | tasya siṣmiyāṇasya tejo'pākrāmat | taddevā oṣadhīṣu nyamṛjuḥ | te śyāmākā abhavan | smayākā vai nāmaite 3 tatsmayākānām̐ smayākatvam | tasmāddīkṣitenāpigṛhya smetavyam | tejaso dhṛtyai | sa dhanuḥ pratiṣkabhyātiṣṭhat | tā upadīkā abruvanvaraṃ vṛṇāmahai | atha va imam̐ randhayāma | yatra kva ca khanāma | tadapo'bhi tṛṇadāmeti | tasmādupadīkā yatra kva ca khananti | tadapo'bhi tṛndanti 4 vārevṛtam̐ hyāsām | tasya jyāmapyādan | tasya dhanurvipravamāṇam̐ śira udavartayat | taddyāvāpṛthivī anu prāvartata yatprāvartata | tatpravargyasya pravargyatvam | yadghrām̐3 ityapatat | tadgharmasya gharmatvam | mahato vīryamapaptaditi | tanmahāvīrasya mahāvīratvam 5 yadasyāḥ samabharan | tatsamrājñaḥ samrāṭtvam | tam̐ stṛtaṃ devatāstredhā vyagṛhṇata | agniḥ prātaḥsavanam | indro mādhyaṃdinam̐ savanam | viśve devāstṛtīyasavanam | tenāpaśirṣṇā yajñena yajamānāḥ | nāśiṣo'vārundhata | na suvargaṃ lokamabhyajayan | te devā aśvināvabruvan 6 bhiṣajau vai sthaḥ | idaṃ yajñasya śiraḥ prati dhattamiti | tāvabrūtāṃ varaṃ vṛṇāvahai | graha eva nāvatrāpi gṛhyatāmiti | tābhyāmetamāśvinamagṛhṇan | tāvetadyajñasya śiraḥ pratyadhattām | yatpravargyaḥ | tena saśīrṣṇā yajñena yajamānāḥ | avāśiṣo'rundhata | abhi suvargaṃ lokamajayan | yatpravargyaṃ pravṛṇakti | yajñasyaiva tacchiraḥ prati dadhāti | tena saśīrṣṇā yajñena yajamānaḥ | avāśiṣo rundhe | abhi suvargaṃ lokāṃ jayati | tasmādeṣa āśvinapravayā iva | yatpravargyaḥ 7 utkaro hyete tṛndanti mahāvīratvamabruvannajayantsapta ca
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.