प्रजापतिः पशूनसृजत । तेऽस्मात्सृष्टाः पराञ्च आयन् । तानग्निष्टोमेन नाप्नोत् । तानुक्थ्येन नाप्नोत् । तान्षोडशिना नाप्नोत् । तान्रात्रिया नाप्नोत् । तान्त्संधिना नाप्नोत् । सोऽग्निमब्रवीत् । इमान्म ईप्सेति । तानग्निस्त्रिवृता स्तोमेन नाप्नोत् १ स इन्द्र मब्रवीत् । इमान्म ईप्सेति । तानिन्द्रः पञ्चदशेन स्तोमेन नाप्नोत् । स विश्वान्देवानब्रवीत् । इमान्म ईप्सतेति । तान्विश्वे देवाः सप्तदशेन स्तोमेन नाप्नुवन् । स विष्णुमब्रवीत् । इमान्म ईप्सेति । तान्विष्णुरेकविꣳशेन स्तोमेनाप्नोत् । वारवन्तीयेनावारयत २ इदं विष्णुर्विचक्रम इति व्यक्रमत । यस्मात्पशवः प्र प्रेव भ्रꣳ शेरन् । स एतेन यजेत । यदाप्नोत् । तदप्तोर्यामस्याप्तोर्यामत्वम् । एतेन वै देवा जैत्वानि जित्वा । यं काममकामयन्त तमाप्नुवन् । यं कामं कामयते । तमेतेनाप्नोति ३ २.७.१५ यज्ञसंयुक्तालौकिकः राजाभिषेकः व्याघ्रोऽयमग्नौ चरति प्रविष्टः । ऋषीणां पुत्रो अभिशस्तिपा अयम् । नमस्कारेण । नमसा ते जुहोमि । मा देवानां मिथुया कर्म भागम् । सावीर्हि देव प्रसवाय पित्रे । वर्ष्माणमस्मै वरिमाणमस्मै । अथास्मभ्यꣳ सवितः सर्वताता । दिवे दिव आसुवा भूरिपश्वः । भूतो भूतेषु चरति प्रविष्टः । स भूतानामधिपतिर्बभूव १ तस्य मृत्यौ चरति राजसूयम् । स राजा राज्यमनुमन्यतामिदम् । येभिश्शिल्पैः पप्रथानामदृꣳहत् । योभिर्द्यामभ्यपिꣳशत्प्रजापतिः । येभिर्वाचं विश्वरूपाꣳ समव्ययत् । तेनेममग्न इह वर्चसा समङ्ग्धि । येभिरादित्यस्तपति प्रकेतुभिः । येभिः सूर्यो ददृशे चित्रभानुः । येभिर्वाचं पुष्कलेभिरव्ययत् । तेनेममग्न इह वर्चसा समङ्ग्धि २ आऽयं भातु शवसा पञ्च कृष्टीः । इन्द्र इव ज्येष्ठो भवतु प्रजावान् । अस्मा अस्तु पुष्कलं चित्रभानु । आऽयं पृणक्तु रजसी उपस्थम् । यत्ते शिल्पं कश्यप रोचनावत् । इन्द्रियावत्पुष्कलं चित्रभानु । यस्मिन्त्सूर्या अर्पिताः सप्त साकम् । तस्मिन्राजानमधिविश्रयेमम् । द्यौरसि पृथिव्यसि । व्याघ्रो वैयाघ्रेऽधि ३ विश्रयस्व दिशो महीः । विशस्त्वा सर्वा वाञ्छन्तु । मा त्वद्राष्ट्रमधिभ्रशत् । या दिव्या आपः पयसा संबभूवुः । या अन्तरिक्ष उत पार्थिवीर्याः । तासां त्वा सर्वासाꣳ रुचा । अभिषिञ्चामि वर्चसा । अभि त्वा वर्चसा सिचं दिव्येन । पयसा सह । यथासा राष्ट्रवर्धनः ४ तथा त्वा सविता करत् । इन्द्रं विश्वा अवीवृधन् । समुद्र व्यचसं गिरः । रथीतमꣳ रथीनाम् । वाजानाꣳ सत्पतिं पतिम् । वसवस्त्वा पुरस्तादभिषिञ्चन्तु गायत्रेण छन्दसा । रुद्रा स्त्वा दक्षिणतोऽभिषिञ्चन्तु त्रैष्टुभेन छन्दसा । आदि-त्यास्त्वा पश्चादभिषिञ्चन्तु जागतेन छन्दसा । विश्वे त्वा देवा उत्तरतो-ऽभिषिञ्चन्त्वानुष्टुभेन छन्दसा । बृहस्पतिस्त्वोपरिष्टादभिषिञ्चतु पाङ्क्तेन छन्दसा ५ अरुणं त्वा वृकमुग्रं खजंकरम् । रोचमानं मरुतामग्रे अर्चिषः । सूर्यवन्तं मघवानं विषासहिम् । इन्द्रमुक्थ्येषु नामहूतमꣳ हुवेम । प्र बाहवा सिसृतं जीवसे नः । आ नो गव्यूतिमुक्षतं घृतेन । आ नो जने श्रवयतं युवाना । श्रुतं मे मित्रावरुणा हवेमा । इन्द्रस्य ते वीर्यकृतः । बाहू उपावहरामि ६
prajāpatiḥ paśūnasṛjata | te'smātsṛṣṭāḥ parāñca āyan | tānagniṣṭomena nāpnot | tānukthyena nāpnot | tānṣoḍaśinā nāpnot | tānrātriyā nāpnot | tāntsaṃdhinā nāpnot | so'gnimabravīt | imānma īpseti | tānagnistrivṛtā stomena nāpnot 1 sa indra mabravīt | imānma īpseti | tānindraḥ pañcadaśena stomena nāpnot | sa viśvāndevānabravīt | imānma īpsateti | tānviśve devāḥ saptadaśena stomena nāpnuvan | sa viṣṇumabravīt | imānma īpseti | tānviṣṇurekavim̐śena stomenāpnot | vāravantīyenāvārayata 2 idaṃ viṣṇurvicakrama iti vyakramata | yasmātpaśavaḥ pra preva bhram̐ śeran | sa etena yajeta | yadāpnot | tadaptoryāmasyāptoryāmatvam | etena vai devā jaitvāni jitvā | yaṃ kāmamakāmayanta tamāpnuvan | yaṃ kāmaṃ kāmayate | tametenāpnoti 3 2.7.15 yajñasaṃyuktālaukikaḥ rājābhiṣekaḥ vyāghro'yamagnau carati praviṣṭaḥ | ṛṣīṇāṃ putro abhiśastipā ayam | namaskāreṇa | namasā te juhomi | mā devānāṃ mithuyā karma bhāgam | sāvīrhi deva prasavāya pitre | varṣmāṇamasmai varimāṇamasmai | athāsmabhyam̐ savitaḥ sarvatātā | dive diva āsuvā bhūripaśvaḥ | bhūto bhūteṣu carati praviṣṭaḥ | sa bhūtānāmadhipatirbabhūva 1 tasya mṛtyau carati rājasūyam | sa rājā rājyamanumanyatāmidam | yebhiśśilpaiḥ paprathānāmadṛm̐hat | yobhirdyāmabhyapim̐śatprajāpatiḥ | yebhirvācaṃ viśvarūpām̐ samavyayat | tenemamagna iha varcasā samaṅgdhi | yebhirādityastapati praketubhiḥ | yebhiḥ sūryo dadṛśe citrabhānuḥ | yebhirvācaṃ puṣkalebhiravyayat | tenemamagna iha varcasā samaṅgdhi 2 ā'yaṃ bhātu śavasā pañca kṛṣṭīḥ | indra iva jyeṣṭho bhavatu prajāvān | asmā astu puṣkalaṃ citrabhānu | ā'yaṃ pṛṇaktu rajasī upastham | yatte śilpaṃ kaśyapa rocanāvat | indriyāvatpuṣkalaṃ citrabhānu | yasmintsūryā arpitāḥ sapta sākam | tasminrājānamadhiviśrayemam | dyaurasi pṛthivyasi | vyāghro vaiyāghre'dhi 3 viśrayasva diśo mahīḥ | viśastvā sarvā vāñchantu | mā tvadrāṣṭramadhibhraśat | yā divyā āpaḥ payasā saṃbabhūvuḥ | yā antarikṣa uta pārthivīryāḥ | tāsāṃ tvā sarvāsām̐ rucā | abhiṣiñcāmi varcasā | abhi tvā varcasā sicaṃ divyena | payasā saha | yathāsā rāṣṭravardhanaḥ 4 tathā tvā savitā karat | indraṃ viśvā avīvṛdhan | samudra vyacasaṃ giraḥ | rathītamam̐ rathīnām | vājānām̐ satpatiṃ patim | vasavastvā purastādabhiṣiñcantu gāyatreṇa chandasā | rudrā stvā dakṣiṇato'bhiṣiñcantu traiṣṭubhena chandasā | ādi-tyāstvā paścādabhiṣiñcantu jāgatena chandasā | viśve tvā devā uttarato-'bhiṣiñcantvānuṣṭubhena chandasā | bṛhaspatistvopariṣṭādabhiṣiñcatu pāṅktena chandasā 5 aruṇaṃ tvā vṛkamugraṃ khajaṃkaram | rocamānaṃ marutāmagre arciṣaḥ | sūryavantaṃ maghavānaṃ viṣāsahim | indramukthyeṣu nāmahūtamam̐ huvema | pra bāhavā sisṛtaṃ jīvase naḥ | ā no gavyūtimukṣataṃ ghṛtena | ā no jane śravayataṃ yuvānā | śrutaṃ me mitrāvaruṇā havemā | indrasya te vīryakṛtaḥ | bāhū upāvaharāmi 6
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.