Library·Taittirīya Brāhmaṇa (unaccented text)·3·3.5
सत्यं प्रपद्ये । ऋतं प्रपद्ये । अमृतं प्रपद्ये । प्रजापतेः प्रियां तनुवमनार्तां प्रपद्ये । इदमहं पञ्चदशेन वज्रेण । द्विषन्तं भ्रातृव्यमवक्रामामि । योऽस्मान्द्वेष्टि । यं च वयं द्विष्मः । भूर्भुवः सुवः । हिम् १
satyaṃ prapadye | ṛtaṃ prapadye | amṛtaṃ prapadye | prajāpateḥ priyāṃ tanuvamanārtāṃ prapadye | idamahaṃ pañcadaśena vajreṇa | dviṣantaṃ bhrātṛvyamavakrāmāmi | yo'smāndveṣṭi | yaṃ ca vayaṃ dviṣmaḥ | bhūrbhuvaḥ suvaḥ | him 1
Sanskrit only: no published translation is held for this verse.
प्र वो वाजा अभिद्यवः । हविष्मन्तो घृताच्या । देवाञ्जिगाति सुम्नयुः । अग्न आयाहि वीतये । गृणानो हव्यदातये । नि होता सत्सि बर्हिषि । तं त्वा समिद्भिरङ्गिरः । घृतेन वर्धयामसि । बृहच्छोचा यविष्ठ्य । स नः पृथु श्रवाय्यम् १ अच्छा देव विवाससि । बृहदग्ने सुवीर्यम् । ईडेन्यो नमस्यस् । तिरः । तमाꣳ सि दर्शतः । समग्निरिध्यते वृषा । वृषो अग्निः समिध्यते । अश्वो न देववाहनः । तꣳ हविश्मन्त ईडते । वृषणं त्वा वयं वृषन् । वृषाणः समिधीमहि २ अग्ने दीद्यतं बृहत् । अग्निं दूतं वृणीमहे । होतारं विश्ववेदसम् । अस्य यज्ञस्य सुक्रतुम् । समिध्यमानो अध्वरे । अग्निः पावक ईड्यः । शोचिष्केशस्तमीमहे । समिद्धो अग्न आहुत । देवान्यक्षि स्वध्वर । त्वꣳ हि हव्यवाडसि । आजुहोत दुवस्यत । अग्निं प्रयत्यध्वरे । वृणीध्वꣳ हव्यवाहनम् । त्वं वरुण उत मित्रो अग्ने । त्वां वर्धन्ति मतिभिर्वसिष्ठाः । त्वे वसु सुषणनानि सन्तु । यूयं पात स्वस्तिभिः सदा नः ३
pra vo vājā abhidyavaḥ | haviṣmanto ghṛtācyā | devāñjigāti sumnayuḥ | agna āyāhi vītaye | gṛṇāno havyadātaye | ni hotā satsi barhiṣi | taṃ tvā samidbhiraṅgiraḥ | ghṛtena vardhayāmasi | bṛhacchocā yaviṣṭhya | sa naḥ pṛthu śravāyyam 1 acchā deva vivāsasi | bṛhadagne suvīryam | īḍenyo namasyas | tiraḥ | tamām̐ si darśataḥ | samagniridhyate vṛṣā | vṛṣo agniḥ samidhyate | aśvo na devavāhanaḥ | tam̐ haviśmanta īḍate | vṛṣaṇaṃ tvā vayaṃ vṛṣan | vṛṣāṇaḥ samidhīmahi 2 agne dīdyataṃ bṛhat | agniṃ dūtaṃ vṛṇīmahe | hotāraṃ viśvavedasam | asya yajñasya sukratum | samidhyamāno adhvare | agniḥ pāvaka īḍyaḥ | śociṣkeśastamīmahe | samiddho agna āhuta | devānyakṣi svadhvara | tvam̐ hi havyavāḍasi | ājuhota duvasyata | agniṃ prayatyadhvare | vṛṇīdhvam̐ havyavāhanam | tvaṃ varuṇa uta mitro agne | tvāṃ vardhanti matibhirvasiṣṭhāḥ | tve vasu suṣaṇanāni santu | yūyaṃ pāta svastibhiḥ sadā naḥ 3
Sanskrit only: no published translation is held for this verse.
अग्ने महाꣳ असि ब्राह्मण भारत । असावसौ । देवेद्धो मन्विद्धः । ऋषिष्टुतो विप्रानुमदितः । कविशस्तो ब्रह्मसꣳ शितो घृताहवनः । प्रणीर्यज्ञानाम् । रथीरध्वराणाम् । अतूर्तो होता । तूर्णिर्हव्यवाट् । आस्पात्रं जुहूर्देवानाम् १ चमसो देवपानः । अराꣳ इवाग्ने नेमिर्देवाꣳ स्त्वं परिभूरसि । आवह देवान्यजमानाय । अग्निमग्न आवह । सोममावह । अग्निमावह । प्रजापतिमावह । अग्नीषोमावावह । इन्द्रा ग्नी आवह । इन्द्र मावह । महेन्द्र मावह । देवाꣳ आज्यपाꣳ आवह । अग्निꣳ होत्रायावह । स्वं महिमानमावह । आ चाग्ने देवान्वह । सुयजा च यज जातवेदः २
agne mahām̐ asi brāhmaṇa bhārata | asāvasau | deveddho manviddhaḥ | ṛṣiṣṭuto viprānumaditaḥ | kaviśasto brahmasam̐ śito ghṛtāhavanaḥ | praṇīryajñānām | rathīradhvarāṇām | atūrto hotā | tūrṇirhavyavāṭ | āspātraṃ juhūrdevānām 1 camaso devapānaḥ | arām̐ ivāgne nemirdevām̐ stvaṃ paribhūrasi | āvaha devānyajamānāya | agnimagna āvaha | somamāvaha | agnimāvaha | prajāpatimāvaha | agnīṣomāvāvaha | indrā gnī āvaha | indra māvaha | mahendra māvaha | devām̐ ājyapām̐ āvaha | agnim̐ hotrāyāvaha | svaṃ mahimānamāvaha | ā cāgne devānvaha | suyajā ca yaja jātavedaḥ 2
Sanskrit only: no published translation is held for this verse.
अग्निर्होता । वेत्वग्निः । होत्रं वेत्वप्रावित्रम् । स्मो वयम् । साधु ते यजमान देवता । घृतवतीमध्वर्यो स्रुचमास्यस्व । देवायुवं विश्ववाराम् । ईडामहै देवाꣳ ईडेन्यान् । नमस्याम नमस्यान् । यजाम यज्ञियान् १
agnirhotā | vetvagniḥ | hotraṃ vetvaprāvitram | smo vayam | sādhu te yajamāna devatā | ghṛtavatīmadhvaryo srucamāsyasva | devāyuvaṃ viśvavārām | īḍāmahai devām̐ īḍenyān | namasyāma namasyān | yajāma yajñiyān 1
Sanskrit only: no published translation is held for this verse.
समिधो अग्न आज्यस्य वियन्तु । तनूनपादग्न आज्यस्य वेतु । इडो अग्न आज्यस्य वियन्तु । बर्हिरग्न आज्यस्य वेतु । स्वाहाग्निम् । स्वाहा सोमम् । स्वाहाग्निम् । प्रजापतिम् । स्वाहाग्नीषोमौ । स्वाहेन्द्रा ग्नी ।स्वाहेन्द्र म् । स्वाहा महेन्द्र म् । स्वाहा देवाꣳ आज्यपान् । स्वाहाग्निꣳ होत्राज्जुषाणाः । अग्न आज्यस्य वियन्तु १
samidho agna ājyasya viyantu | tanūnapādagna ājyasya vetu | iḍo agna ājyasya viyantu | barhiragna ājyasya vetu | svāhāgnim | svāhā somam | svāhāgnim | prajāpatim | svāhāgnīṣomau | svāhendrā gnī |svāhendra m | svāhā mahendra m | svāhā devām̐ ājyapān | svāhāgnim̐ hotrājjuṣāṇāḥ | agna ājyasya viyantu 1
Sanskrit only: no published translation is held for this verse.
अग्निर्वृत्राणि जङ्घनत् । द्र विणस्युर्विपन्यया । समिद्धः शुक्र आहुतः । जुषाणो अग्निराज्यस्य वेतु । त्वꣳ सोमासि सत्पतिः । त्वꣳ राजोत वृत्रहा । त्वं भद्रो असि क्रतुः । जुषाणः सोम आज्यस्य हविषो वेतु । अग्निः प्रत्नेन जन्मना । शुम्भानस्तनुवꣳ स्वाम् । कविर्विप्रेण वावृधे । जुषाणो अग्निराज्यस्य वेतु । सोम गीर्भिष्ट्वा वयम् । वर्धयामो वचोविदः । सुमृडीको न आविश । जुषाणः सोम आज्यस्य हविषो वेतु १
agnirvṛtrāṇi jaṅghanat | dra viṇasyurvipanyayā | samiddhaḥ śukra āhutaḥ | juṣāṇo agnirājyasya vetu | tvam̐ somāsi satpatiḥ | tvam̐ rājota vṛtrahā | tvaṃ bhadro asi kratuḥ | juṣāṇaḥ soma ājyasya haviṣo vetu | agniḥ pratnena janmanā | śumbhānastanuvam̐ svām | kavirvipreṇa vāvṛdhe | juṣāṇo agnirājyasya vetu | soma gīrbhiṣṭvā vayam | vardhayāmo vacovidaḥ | sumṛḍīko na āviśa | juṣāṇaḥ soma ājyasya haviṣo vetu 1
Sanskrit only: no published translation is held for this verse.
अग्निर्मूर्धा दिवः ककुत् । पतिः पृथिव्या अयम् । अपाꣳ रेताꣳ सि जिन्वति । भुवो यज्ञस्य रजसश्च नेता । यत्रा नियुद्भिः सचसे शिवाभिः । दिवि मूर्धानं दधिषे सुवर्षाम् । जिह्वामग्ने चकृषे हव्यवाहम् । प्रजापते न त्वदेतान्यन्यः । विश्वा जातानि परि ता बभूव । यत्कामास्ते जुहुमस्तन्नो अस्तु १ वयꣳ स्याम पतयो रयीणाम् । स वेद पुत्रः पितरꣳ स मातरम् । स सूनुर्भुवत्स भुवत्पुनर्मघः । स द्यामौर्णोदन्तरिक्षꣳ स सुवः । स विश्वा भुवो अभवत्स आभवत् । अग्नीषोमा सवेदसा । सहूती वनतं गिरः । सं देवत्रा बभूवथुः । युवमेतानि दिवि रोचनानि । अग्निश्च सोम सक्रतू अधत्तम् २ युवꣳ सिन्धूꣳ रभिशस्तेरवद्यात् । अग्नीषोमावमुञ्चतं गृभीतान् । इन्द्रा ग्नी रोचना दिवः । परि वाजेषु भूषथः । तद्वां चेति प्र वीर्यम् । श्नथद्वृत्रमुत सनोति वाजम् । इन्द्रा यो अग्नी सहुरी सपर्यात् । इरज्यन्ता वसव्यस्य भूरेः । सहस्तमा सहसा वाजयन्ता । एन्द्र सानसिꣳ रयिम् ३ सजित्वानꣳ सदासहम् । वर्षिष्ठमूतये भर । प्र ससाहिषे पुरुहूत शत्रून् । ज्येष्ठस्ते शुष्म इह रातिरस्तु । इन्द्रा भर दक्षिणेना वसूनि । पतिः सिन्धूनामसि रेवतीनाम् । महाꣳ इन्द्रो य ओजसा । पर्जन्यो वृष्टिमाꣳ इव । स्तोमैर्वत्सस्य वावृधे । महाꣳ इन्द्रो नृवदा चर्षणिप्राः ४ उत द्विबर्हा अमिनः सहोभिः । अस्मद्रि यग्वावृधे वीर्याय । उरुः पृथुः सुकृतः कर्तृभिर्भूत् । पिप्रीहि देवाꣳ उशतो यविष्ठ । विद्वाꣳ ऋतूꣳ रृतुपते यजेह । ये दैव्या ऋत्विजस्तेभिरग्ने । त्वꣳ होतॄणामस्यायजिष्ठः । अग्निꣳ स्विष्टकृतम् । अयाडग्निरग्नेः प्रियाधामानि । अयाट्सोमस्य प्रिया धामानि ५ अयाडग्नेः प्रिया धामानि । अयाट्प्रजापतेः प्रिया धामानि । अयाडग्नीषोमयोः प्रिया धामानि । अयाडिन्द्रा ग्नियोः प्रिया धामानि । अयाडिन्द्र स्य प्रिया धामानि । अयाण्महेन्द्र स्य प्रिया धामानि । अयाड्देवानामाज्यपानां प्रिया धामानि । यक्षदग्नेर्होतुः प्रिया धामानि । यक्षत्स्वं महिमानम् । आयजतामेज्या इषः । कृणोतु सो अध्वरा जातवेदाः । जुषताꣳ हविः । अग्ने यदद्य विशो अध्वरस्य होतः । पावकशोचे वेष्ट्वꣳ हि यज्वा । ऋता यजासि महिना वि यद्भूः । हव्या वह यविष्ठ या ते अद्य ६
agnirmūrdhā divaḥ kakut | patiḥ pṛthivyā ayam | apām̐ retām̐ si jinvati | bhuvo yajñasya rajasaśca netā | yatrā niyudbhiḥ sacase śivābhiḥ | divi mūrdhānaṃ dadhiṣe suvarṣām | jihvāmagne cakṛṣe havyavāham | prajāpate na tvadetānyanyaḥ | viśvā jātāni pari tā babhūva | yatkāmāste juhumastanno astu 1 vayam̐ syāma patayo rayīṇām | sa veda putraḥ pitaram̐ sa mātaram | sa sūnurbhuvatsa bhuvatpunarmaghaḥ | sa dyāmaurṇodantarikṣam̐ sa suvaḥ | sa viśvā bhuvo abhavatsa ābhavat | agnīṣomā savedasā | sahūtī vanataṃ giraḥ | saṃ devatrā babhūvathuḥ | yuvametāni divi rocanāni | agniśca soma sakratū adhattam 2 yuvam̐ sindhūm̐ rabhiśasteravadyāt | agnīṣomāvamuñcataṃ gṛbhītān | indrā gnī rocanā divaḥ | pari vājeṣu bhūṣathaḥ | tadvāṃ ceti pra vīryam | śnathadvṛtramuta sanoti vājam | indrā yo agnī sahurī saparyāt | irajyantā vasavyasya bhūreḥ | sahastamā sahasā vājayantā | endra sānasim̐ rayim 3 sajitvānam̐ sadāsaham | varṣiṣṭhamūtaye bhara | pra sasāhiṣe puruhūta śatrūn | jyeṣṭhaste śuṣma iha rātirastu | indrā bhara dakṣiṇenā vasūni | patiḥ sindhūnāmasi revatīnām | mahām̐ indro ya ojasā | parjanyo vṛṣṭimām̐ iva | stomairvatsasya vāvṛdhe | mahām̐ indro nṛvadā carṣaṇiprāḥ 4 uta dvibarhā aminaḥ sahobhiḥ | asmadri yagvāvṛdhe vīryāya | uruḥ pṛthuḥ sukṛtaḥ kartṛbhirbhūt | piprīhi devām̐ uśato yaviṣṭha | vidvām̐ ṛtūm̐ rṛtupate yajeha | ye daivyā ṛtvijastebhiragne | tvam̐ hotṝṇāmasyāyajiṣṭhaḥ | agnim̐ sviṣṭakṛtam | ayāḍagniragneḥ priyādhāmāni | ayāṭsomasya priyā dhāmāni 5 ayāḍagneḥ priyā dhāmāni | ayāṭprajāpateḥ priyā dhāmāni | ayāḍagnīṣomayoḥ priyā dhāmāni | ayāḍindrā gniyoḥ priyā dhāmāni | ayāḍindra sya priyā dhāmāni | ayāṇmahendra sya priyā dhāmāni | ayāḍdevānāmājyapānāṃ priyā dhāmāni | yakṣadagnerhotuḥ priyā dhāmāni | yakṣatsvaṃ mahimānam | āyajatāmejyā iṣaḥ | kṛṇotu so adhvarā jātavedāḥ | juṣatām̐ haviḥ | agne yadadya viśo adhvarasya hotaḥ | pāvakaśoce veṣṭvam̐ hi yajvā | ṛtā yajāsi mahinā vi yadbhūḥ | havyā vaha yaviṣṭha yā te adya 6
Sanskrit only: no published translation is held for this verse.
उपहूतꣳ रथंतरꣳ सह पृथिव्या । उप मा रथंतरꣳ सह पृथिव्या ह्वयताम् । उपहूतं वामदेव्यꣳ सहान्तरिक्षेण । उप मा वामदेव्यꣳ सहान्तरिक्षेण ह्वयताम् । उपहूतं बृहत्सह दिवा । उप मा बृहत्सह दिवा ह्वयताम् । उपहूताः सप्त होत्राः । उप मा सप्त होत्रा ह्वयन्ताम् । उपहूता धेनुः सहर्षभा । उप मा धेनुः सहर्षभा ह्वयताम् १ उपहूतो भक्षः सखा । उप मा भक्षः सखा ह्वयताम् । उपहूता३ं! हो । इडोपहूता । उपहूतेडा । उपो अस्माꣳ इडा ह्वयताम् । इडोपहूता । उपहूतेडा मानवी घृतपदी मैत्रावरुणी । ब्रह्म देवकृतमुपहूतम् २ दैव्या अध्वर्यव उपहूताः । उपहूता मनुष्याः । य इमं यज्ञमवान् । ये यज्ञपतिं वर्धान् । उपहूते द्यावापृथिवी ।पूर्वजे ऋतावरी ।देवी देवपुत्रे । उपहूतोऽयं यजमानः । उत्तरस्यां देवयज्यायामुपहूतः । भूयसि हविष्करण उपहूतः । दिव्ये धामन्नुपहूतः । इदं मे देवा हविर्जुषन्तामिति तस्मिन्नुपहूतः । विश्वमस्य प्रियमुपहूतम् । विश्वस्य प्रियस्योपहूतस्योपहूतः ३
upahūtam̐ rathaṃtaram̐ saha pṛthivyā | upa mā rathaṃtaram̐ saha pṛthivyā hvayatām | upahūtaṃ vāmadevyam̐ sahāntarikṣeṇa | upa mā vāmadevyam̐ sahāntarikṣeṇa hvayatām | upahūtaṃ bṛhatsaha divā | upa mā bṛhatsaha divā hvayatām | upahūtāḥ sapta hotrāḥ | upa mā sapta hotrā hvayantām | upahūtā dhenuḥ saharṣabhā | upa mā dhenuḥ saharṣabhā hvayatām 1 upahūto bhakṣaḥ sakhā | upa mā bhakṣaḥ sakhā hvayatām | upahūtā3ṃ! ho | iḍopahūtā | upahūteḍā | upo asmām̐ iḍā hvayatām | iḍopahūtā | upahūteḍā mānavī ghṛtapadī maitrāvaruṇī | brahma devakṛtamupahūtam 2 daivyā adhvaryava upahūtāḥ | upahūtā manuṣyāḥ | ya imaṃ yajñamavān | ye yajñapatiṃ vardhān | upahūte dyāvāpṛthivī |pūrvaje ṛtāvarī |devī devaputre | upahūto'yaṃ yajamānaḥ | uttarasyāṃ devayajyāyāmupahūtaḥ | bhūyasi haviṣkaraṇa upahūtaḥ | divye dhāmannupahūtaḥ | idaṃ me devā havirjuṣantāmiti tasminnupahūtaḥ | viśvamasya priyamupahūtam | viśvasya priyasyopahūtasyopahūtaḥ 3
Sanskrit only: no published translation is held for this verse.
देवं बर्हिः । वसुवने वसुधेयस्य वेतु । देवो नराशꣳ सः । वसुवने वसुधेयस्य वेतु । देवो अग्निः स्विष्टकृत् । सुद्र विणा मन्द्रः कविः । सत्यमन्मायजी होता । होतुर्होतुरायजीयान् । अग्ने यान्देवानयाट् । याꣳ अपिप्रेः । ये ते होत्रे अमत्सत । ताꣳ ससनुषीꣳ होत्रां देवंगमाम् । दिवि देवेषु यज्ञमेरयेमम् । स्विष्टकृच्चाग्ने होताभुः । वसुवने वसुधेयस्य नमोवाके वीहि १
devaṃ barhiḥ | vasuvane vasudheyasya vetu | devo narāśam̐ saḥ | vasuvane vasudheyasya vetu | devo agniḥ sviṣṭakṛt | sudra viṇā mandraḥ kaviḥ | satyamanmāyajī hotā | hoturhoturāyajīyān | agne yāndevānayāṭ | yām̐ apipreḥ | ye te hotre amatsata | tām̐ sasanuṣīm̐ hotrāṃ devaṃgamām | divi deveṣu yajñamerayemam | sviṣṭakṛccāgne hotābhuḥ | vasuvane vasudheyasya namovāke vīhi 1
Sanskrit only: no published translation is held for this verse.
इदं द्यावापृथिवी भद्र मभूत् । आर्ध्म सूक्तवाकम् । उत नमोवाकम् । ऋध्यास्म सूक्तोच्यमग्ने । त्वꣳ सूक्तवागसि । उपश्रितो दिवःपृथिव्योः । ओमन्वती तेऽस्मिन्यज्ञे यजमान द्यावापृथिवी स्ताम् । शंगये जीरदानू ।अत्रस्नू अप्रवेदे । उरुगव्यूती अभयंकृतौ १ वृष्टिद्यावा रीत्यापा । शम्भुवौ मयोभुवौ । ऊर्जस्वती च पयस्वती च । सूपचरणा च स्वधिचरणा च । तयोराविदि । अग्निरिदꣳ हविरजुषत । अवीवृधत महो ज्यायोऽकृत । सोम इदꣳ हविरजुषत । अवीवृधत महो ज्यायोऽकृत । अग्निरिदꣳ हविरजुषत २ अवीवृधत महो ज्यायोऽकृत । प्रजापतिरिदꣳ हविरजुषत । अवीवृधत महो ज्यायोऽकृत । अग्नीषोमाविदꣳ हविरजुषेताम् । अवीवृधेतां महो ज्यायो-ऽक्राताम् । इन्द्रा ग्नी इदꣳ हविरजुषेताम् । अवीवृधेतां महो ज्यायोऽक्राताम् । इन्द्र इदꣳ हविरजुषत । अवीवृधत महो ज्यायोऽकृत । महेन्द्र इदꣳ हविरजुषत ३ अवीवृधत महो ज्यायोऽकृत । देवा आज्यपा आज्यमजुषन्त । अवीवृधन्त महो ज्यायोऽक्रत । अग्निर्होत्रेणेदꣳ हविरजुषत । अवीवृधत महो ज्यायोऽकृत । अस्यामृधद्धोत्रायां देवंगमायाम् । आशास्तेऽयं यजमानोऽसौ । आयुराशास्ते । सुप्रजास्त्वमाशास्ते । सजातवनस्यामाशास्ते ४ उत्तरां देवयज्यामाशास्ते । भूयो हविष्करणमाशास्ते । दिव्यं धामाशास्ते । विश्वं प्रियमाशास्ते । यदनेन हविषाशास्ते । तदश्यात्तदृध्यात् । तदस्मै देवा रासन्ताम् । तदग्निर्देवो देवेभ्यो वनते । वयमग्नेर्मानुषाः । इष्टं च वीतं च । उभे च नो द्यावापृथिवी अꣳ हसः पाताम् । इह गतिर्वामस्येदं च । नमो देवेभ्यः ५
idaṃ dyāvāpṛthivī bhadra mabhūt | ārdhma sūktavākam | uta namovākam | ṛdhyāsma sūktocyamagne | tvam̐ sūktavāgasi | upaśrito divaḥpṛthivyoḥ | omanvatī te'sminyajñe yajamāna dyāvāpṛthivī stām | śaṃgaye jīradānū |atrasnū apravede | urugavyūtī abhayaṃkṛtau 1 vṛṣṭidyāvā rītyāpā | śambhuvau mayobhuvau | ūrjasvatī ca payasvatī ca | sūpacaraṇā ca svadhicaraṇā ca | tayorāvidi | agniridam̐ havirajuṣata | avīvṛdhata maho jyāyo'kṛta | soma idam̐ havirajuṣata | avīvṛdhata maho jyāyo'kṛta | agniridam̐ havirajuṣata 2 avīvṛdhata maho jyāyo'kṛta | prajāpatiridam̐ havirajuṣata | avīvṛdhata maho jyāyo'kṛta | agnīṣomāvidam̐ havirajuṣetām | avīvṛdhetāṃ maho jyāyo-'krātām | indrā gnī idam̐ havirajuṣetām | avīvṛdhetāṃ maho jyāyo'krātām | indra idam̐ havirajuṣata | avīvṛdhata maho jyāyo'kṛta | mahendra idam̐ havirajuṣata 3 avīvṛdhata maho jyāyo'kṛta | devā ājyapā ājyamajuṣanta | avīvṛdhanta maho jyāyo'krata | agnirhotreṇedam̐ havirajuṣata | avīvṛdhata maho jyāyo'kṛta | asyāmṛdhaddhotrāyāṃ devaṃgamāyām | āśāste'yaṃ yajamāno'sau | āyurāśāste | suprajāstvamāśāste | sajātavanasyāmāśāste 4 uttarāṃ devayajyāmāśāste | bhūyo haviṣkaraṇamāśāste | divyaṃ dhāmāśāste | viśvaṃ priyamāśāste | yadanena haviṣāśāste | tadaśyāttadṛdhyāt | tadasmai devā rāsantām | tadagnirdevo devebhyo vanate | vayamagnermānuṣāḥ | iṣṭaṃ ca vītaṃ ca | ubhe ca no dyāvāpṛthivī am̐ hasaḥ pātām | iha gatirvāmasyedaṃ ca | namo devebhyaḥ 5
Sanskrit only: no published translation is held for this verse.
तच्छंयोरावृणीमहे । गातुं यज्ञाय । गातुं यज्ञपतये । दैवी स्वस्तिरस्तु नः । स्वस्तिर्मानुषेभ्यः । ऊर्ध्वं जिगातु भेषजम् । शं नो अस्तु द्विपदे । शं चतुष्पदे १
tacchaṃyorāvṛṇīmahe | gātuṃ yajñāya | gātuṃ yajñapataye | daivī svastirastu naḥ | svastirmānuṣebhyaḥ | ūrdhvaṃ jigātu bheṣajam | śaṃ no astu dvipade | śaṃ catuṣpade 1
Sanskrit only: no published translation is held for this verse.
आप्यायस्व । सं ते । ।इह त्वष्टारमग्रियं। तन्नस्तुरीपम् । ।देवानां पत्नीरुशतीरवन्तु नः । प्रावन्तु नस्तुजये वाजसातये । याः पार्थिवासो या अपामपि व्रते । ता नो देवीः सुहवाः शर्म यच्छत । उत ग्ना वियन्तु देवपत्नीः । इन्द्रा ण्यग्नाय्यश्विनी राट् । आ रोदसी वरुणानी शृणोतु । वियन्तु देवीर्य ऋतुर्जनीनाम् १ अग्निर्होता गृहपतिः स राजा । विश्वा वेद जनिमा जातवेदाः । देवानामुत यो मर्त्यानाम् । यजिष्ठः स प्रयजतामृतावा । वयमु त्वा गृहपते जनानाम् । अग्ने अकर्म समिधा बृहन्तम् । अस्थूरिणो गार्हपत्यानि सन्तु । तिग्मेन नस्तेजसा सꣳ शिशाधि २
āpyāyasva | saṃ te | |iha tvaṣṭāramagriyaṃ| tannasturīpam | |devānāṃ patnīruśatīravantu naḥ | prāvantu nastujaye vājasātaye | yāḥ pārthivāso yā apāmapi vrate | tā no devīḥ suhavāḥ śarma yacchata | uta gnā viyantu devapatnīḥ | indrā ṇyagnāyyaśvinī rāṭ | ā rodasī varuṇānī śṛṇotu | viyantu devīrya ṛturjanīnām 1 agnirhotā gṛhapatiḥ sa rājā | viśvā veda janimā jātavedāḥ | devānāmuta yo martyānām | yajiṣṭhaḥ sa prayajatāmṛtāvā | vayamu tvā gṛhapate janānām | agne akarma samidhā bṛhantam | asthūriṇo gārhapatyāni santu | tigmena nastejasā sam̐ śiśādhi 2
Sanskrit only: no published translation is held for this verse.