देवासुराः संयत्ता आसन् ते देवा अब्रुवन् यो नो वीर्यावत्तमस् तम् अनु समारभामहा इति त इन्द्रम् अब्रुवन् त्वं वै नो वीर्यावत्तमो ऽसि त्वाम् अनु समारभामहा इति सो ऽब्रवीत् तिस्रो म इमास् तनुवो वीर्यावतीस् ताः प्रीणीताथासुरान् अभि भविष्यथेति ता वै ब्रूहीत्य् अब्रुवन् इयम् अꣳहो मुग् इयं विमृधेयम् इन्द्रियावती इत्य् अब्रवीत् त इन्द्रायाꣳहोमुचे पुरोडाशम् एकादशकपालं निर् अवपन्न् इन्द्राय वैमृधायेन्द्रायेन्द्रियावते यद् इन्द्रायाꣳहोमुचे निरवपन्न् अꣳहस एव तेनामुच्यन्त यद् इन्द्राय वैमृधाय मृध एव तेनापाघ्नत यद् इन्द्रायेन्द्रियावत इन्द्रियम् एव तेनात्मन्न् अदधत त्रयस्त्रिꣳशत्कपालम् पुरोडाशं निर् अवपन् त्रयस्त्रिꣳशद् वै देवतास् ता इन्द्र आत्मन्न् अनु समारम्भयत भूत्यै । तां वाव देवा विजितिम् उत्तमाम् असुरैर् व्यजयन्त यो भ्रातृव्यवान्त् स्यात् स स्पर्धमान एतयेष्ट्या यजेतेन्द्रायाꣳहोमुचे पुरोडाशम् एकादशकपालं निर् वपेद् इन्द्राय वैमृधायेन्द्रायेन्द्रियावते । अꣳहसा वा एष गृहीतो यस्माच् छ्रेयान् भ्रातृव्यः । यद् इन्द्रायाꣳहोमुचे निर्वपत्य् अꣳहस एव तेन मुच्यते मृधा वा एषो ऽभिषण्णो यस्मात् समानेष्व् अन्यः श्रेयान् उत अभ्रातृव्यः । यद् इन्द्राय वैमृधाय मृध एव तेनाप हते यद् इन्द्रायेन्द्रियावत इन्द्रियम् एव तेनात्मन् धत्ते त्रयस्त्रिꣳशत्कपालम् पुरोडाशं निर् वपति त्रयस्त्रिꣳशद् वै देवतास् ता एव यजमान आत्मन्न् अनु समारम्भयते भूत्यै सा वा एषा विजितिर् नामेष्टिः । य एवं विद्वान् एतयेष्ट्या यजत उत्तमाम् एव विजितिम् भ्रातृव्येण वि जयते ॥
devāsurāḥ saṃyattā āsan te devā abruvan yo no vīryāvattamas tam anu samārabhāmahā iti ta indram abruvan tvaṃ vai no vīryāvattamo 'si tvām anu samārabhāmahā iti so 'bravīt tisro ma imās tanuvo vīryāvatīs tāḥ prīṇītāthāsurān abhi bhaviṣyatheti tā vai brūhīty abruvan iyam am̐ho mug iyaṃ vimṛdheyam indriyāvatī ity abravīt ta indrāyām̐homuce puroḍāśam ekādaśakapālaṃ nir avapann indrāya vaimṛdhāyendrāyendriyāvate yad indrāyām̐homuce niravapann am̐hasa eva tenāmucyanta yad indrāya vaimṛdhāya mṛdha eva tenāpāghnata yad indrāyendriyāvata indriyam eva tenātmann adadhata trayastrim̐śatkapālam puroḍāśaṃ nir avapan trayastrim̐śad vai devatās tā indra ātmann anu samārambhayata bhūtyai | tāṃ vāva devā vijitim uttamām asurair vyajayanta yo bhrātṛvyavānt syāt sa spardhamāna etayeṣṭyā yajetendrāyām̐homuce puroḍāśam ekādaśakapālaṃ nir vaped indrāya vaimṛdhāyendrāyendriyāvate | am̐hasā vā eṣa gṛhīto yasmāc chreyān bhrātṛvyaḥ | yad indrāyām̐homuce nirvapaty am̐hasa eva tena mucyate mṛdhā vā eṣo 'bhiṣaṇṇo yasmāt samāneṣv anyaḥ śreyān uta abhrātṛvyaḥ | yad indrāya vaimṛdhāya mṛdha eva tenāpa hate yad indrāyendriyāvata indriyam eva tenātman dhatte trayastrim̐śatkapālam puroḍāśaṃ nir vapati trayastrim̐śad vai devatās tā eva yajamāna ātmann anu samārambhayate bhūtyai sā vā eṣā vijitir nāmeṣṭiḥ | ya evaṃ vidvān etayeṣṭyā yajata uttamām eva vijitim bhrātṛvyeṇa vi jayate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.