देवस्य त्वा सवितुः प्रसव इति स्फ्यम् आ दत्ते प्रसूत्यै । अश्विनोर् बाहुभ्याम् इत्य् आहाश्विनौ हि देवानाम् अध्वर्यू आस्ताम् पूष्णो हस्ताभ्याम् इत्य् आह यत्यै । शतभृष्टिर् असि वानस्पत्यो द्विषतो वध इत्य् आह वज्रम् एव तत् सꣳ श्यति भ्रातृव्याय प्रहरिष्यन्त् । स्तम्बयजुर् हरत्य् एतावती वै पृथिवी यावती वेदिस् तस्या एतावत एव भ्रातृव्यं निर् भजति तस्मान् नाभागं निर् भजन्ति । त्रिर् हरति त्रय इमे लोका एभ्य एवैनं लोकेभ्यो निर् भजति तूष्णीं चतुर्थꣳ हरत्य् अपरिमिताद् एवैनं निर्भजति । उद् धन्ति यद् एवास्या अमेध्यं तद् अप हन्ति । उद् धन्ति तस्माद् ओषधयः परा भवन्ति मूलं च्छिनत्ति भ्रातृव्यस्यैव मूलं च्छिनत्ति पितृदेवत्याऽतिखातेयतीं खनति प्रजापतिना यज्ञमुखेन सम्मिताम् आ प्रतिष्ठायै खनति यजमानम् एव प्रतिष्ठां गमयति दक्षिणतो वर्षीयसीं करोति देवयजनस्यैव रूपम् अकः पुरीषवतीं करोति प्रजा वै पशवः पुरीषम् प्रजयैवैनम् पशुभिः पुरीषवन्तं करोति । उत्तरम् परिग्राहम् परि गृह्णात्य् एतावती वै पृथिवी यावती वेदिस् तस्या एतावत एव भ्रातृव्यं निर्भज्यात्मन उत्तरम् परिग्राहम् परि गृह्णाति क्रूरम् इव वै एतत् करोति यद् वेदिं करोति धा असि स्वधा असीति योयुप्यते शान्त्यै प्रोक्षणीर् आ सादयत्य् आपो वै रक्षोघ्नी रक्षसाम् अपहत्यै स्फ्यस्य वर्त्मन्त् सादयति यज्ञस्य संतत्यै यं द्विष्यात् तं ध्यायेच् छुचैवैनम् अर्पयति ॥
devasya tvā savituḥ prasava iti sphyam ā datte prasūtyai | aśvinor bāhubhyām ity āhāśvinau hi devānām adhvaryū āstām pūṣṇo hastābhyām ity āha yatyai | śatabhṛṣṭir asi vānaspatyo dviṣato vadha ity āha vajram eva tat sam̐ śyati bhrātṛvyāya prahariṣyant | stambayajur haraty etāvatī vai pṛthivī yāvatī vedis tasyā etāvata eva bhrātṛvyaṃ nir bhajati tasmān nābhāgaṃ nir bhajanti | trir harati traya ime lokā ebhya evainaṃ lokebhyo nir bhajati tūṣṇīṃ caturtham̐ haraty aparimitād evainaṃ nirbhajati | ud dhanti yad evāsyā amedhyaṃ tad apa hanti | ud dhanti tasmād oṣadhayaḥ parā bhavanti mūlaṃ cchinatti bhrātṛvyasyaiva mūlaṃ cchinatti pitṛdevatyā'tikhāteyatīṃ khanati prajāpatinā yajñamukhena sammitām ā pratiṣṭhāyai khanati yajamānam eva pratiṣṭhāṃ gamayati dakṣiṇato varṣīyasīṃ karoti devayajanasyaiva rūpam akaḥ purīṣavatīṃ karoti prajā vai paśavaḥ purīṣam prajayaivainam paśubhiḥ purīṣavantaṃ karoti | uttaram parigrāham pari gṛhṇāty etāvatī vai pṛthivī yāvatī vedis tasyā etāvata eva bhrātṛvyaṃ nirbhajyātmana uttaram parigrāham pari gṛhṇāti krūram iva vai etat karoti yad vediṃ karoti dhā asi svadhā asīti yoyupyate śāntyai prokṣaṇīr ā sādayaty āpo vai rakṣoghnī rakṣasām apahatyai sphyasya vartmant sādayati yajñasya saṃtatyai yaṃ dviṣyāt taṃ dhyāyec chucaivainam arpayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.