यज्ञं वा एतत् सम् भरन्ति यत् सोमक्रयण्यै पदम् । यज्ञमुखꣳ हविर्धाने यर्हि हविर्धाने प्राची प्रवर्तयेयुस् तर्हि तेनाक्षम् उपाञ्ज्यात् । यज्ञमुख एव यज्ञम् अनु सं तनोति प्राञ्चम् अग्निम् प्र हरन्त्य् उत् पत्नीम् आ नयन्त्य् अन्व् अनाꣳसि प्र वर्तयन्ति । अथ वा अस्यैष धिष्णियो हीयते सो ऽनु ध्यायति स ईश्वरो रुद्रो भूत्वा प्रजाम् पशून् यजमानस्य शमयितोः । यर्हि पशुम् आप्रीतम् उदञ्चं नयन्ति तर्हि तस्य पशुश्रपणꣳ हरेत् तेनैवैनम् भागिनं करोति यजमानो वा आहवनीयः । यजमानं वा एतद् वि कर्षन्ते यद् आहवनीयात् पशुश्रपणꣳ हरन्ति स वैव स्यान् निर्मन्थ्यं वा कुर्याद् यजमानस्य सात्मत्वाय यदि पशोर् अवदानं नश्येद् आज्यस्य प्रत्याख्यायम् अव द्येत् सैव ततः प्रायश्चित्तिः । ये पशुं विमथ्नीरन् यस् तान् कामयेत । आर्तिम् आर्छेयुर् इति कुविद् अङ्गेति नमोवृक्तिवत्यर्चाऽऽग्नीध्रे जुहुयात् । नमोवृक्तिम् एवैषां वृङ्क्ते ताजग् आर्तिम् आर्छन्ति ॥
yajñaṃ vā etat sam bharanti yat somakrayaṇyai padam | yajñamukham̐ havirdhāne yarhi havirdhāne prācī pravartayeyus tarhi tenākṣam upāñjyāt | yajñamukha eva yajñam anu saṃ tanoti prāñcam agnim pra haranty ut patnīm ā nayanty anv anām̐si pra vartayanti | atha vā asyaiṣa dhiṣṇiyo hīyate so 'nu dhyāyati sa īśvaro rudro bhūtvā prajām paśūn yajamānasya śamayitoḥ | yarhi paśum āprītam udañcaṃ nayanti tarhi tasya paśuśrapaṇam̐ haret tenaivainam bhāginaṃ karoti yajamāno vā āhavanīyaḥ | yajamānaṃ vā etad vi karṣante yad āhavanīyāt paśuśrapaṇam̐ haranti sa vaiva syān nirmanthyaṃ vā kuryād yajamānasya sātmatvāya yadi paśor avadānaṃ naśyed ājyasya pratyākhyāyam ava dyet saiva tataḥ prāyaścittiḥ | ye paśuṃ vimathnīran yas tān kāmayeta | ārtim ārcheyur iti kuvid aṅgeti namovṛktivatyarcā''gnīdhre juhuyāt | namovṛktim evaiṣāṃ vṛṅkte tājag ārtim ārchanti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.