निग्राभ्या स्थ देवश्रुत आयुर् मे तर्पयत प्राणम् मे तर्पयतापानम् मे तर्पयत व्यानम् मे तर्पयत चक्षुर् मे तर्पयत श्रोत्रम् मे तर्पयत मनो मे तर्पयत वाचम् मे तर्पयतात्मानम् मे तर्पयताङ्गानि मे तर्पयत प्रजाम् मे तर्पयत पशून् मे तर्पयत गृहान् मे तर्पयत गणान् मे तर्पयत सर्वगणम् मा तर्पयत तर्पयत मा गणा मे मा वि तृषन् । ओषधयो वै सोमस्य विशो विशः खलु वै राज्ञः प्रदातोर् ईश्वरा ऐन्द्रः सोमः । अवीवृधं वो मनसा सुजाता ऋतप्रजाता भग इद् वः स्याम । इन्द्रेण देवीर् वीरुधः संविदाना अनु मन्यन्ताꣳ सवनाय सोमम् इत्य् आहौषधीभ्य एवैनꣳ स्वायै विशः स्वायै देवतायै निर्याच्याभि षुणोति यो वै सोमस्याभिषूयमाणस्य प्रथमो ऽꣳशु स्कन्दति स ईश्वर इन्द्रियं वीर्यम् प्रजाम् पशून् यजमानस्य निर्हन्तोस् तम् अभि मन्त्रयेत । आ मास्कान्त् सह प्रजया सह रायस् पोषेणेन्द्रियम् मे वीर्यम् मा निर् वधीः । इत्य् आशिषम् एवैताम् आ शास्त इन्द्रियस्य वीर्यस्य प्रजायै पशूनाम् अनिर्घाताय द्रप्सश् चस्कन्द पृथिवीम् अनु द्याम् इमं च योनिम् अनु यश् च पूर्वः । तृतीयं योनिम् अनु संचरन्तं द्रप्सं जुहोम्य् अनु सप्त होत्राः ॥
nigrābhyā stha devaśruta āyur me tarpayata prāṇam me tarpayatāpānam me tarpayata vyānam me tarpayata cakṣur me tarpayata śrotram me tarpayata mano me tarpayata vācam me tarpayatātmānam me tarpayatāṅgāni me tarpayata prajām me tarpayata paśūn me tarpayata gṛhān me tarpayata gaṇān me tarpayata sarvagaṇam mā tarpayata tarpayata mā gaṇā me mā vi tṛṣan | oṣadhayo vai somasya viśo viśaḥ khalu vai rājñaḥ pradātor īśvarā aindraḥ somaḥ | avīvṛdhaṃ vo manasā sujātā ṛtaprajātā bhaga id vaḥ syāma | indreṇa devīr vīrudhaḥ saṃvidānā anu manyantām̐ savanāya somam ity āhauṣadhībhya evainam̐ svāyai viśaḥ svāyai devatāyai niryācyābhi ṣuṇoti yo vai somasyābhiṣūyamāṇasya prathamo 'm̐śu skandati sa īśvara indriyaṃ vīryam prajām paśūn yajamānasya nirhantos tam abhi mantrayeta | ā māskānt saha prajayā saha rāyas poṣeṇendriyam me vīryam mā nir vadhīḥ | ity āśiṣam evaitām ā śāsta indriyasya vīryasya prajāyai paśūnām anirghātāya drapsaś caskanda pṛthivīm anu dyām imaṃ ca yonim anu yaś ca pūrvaḥ | tṛtīyaṃ yonim anu saṃcarantaṃ drapsaṃ juhomy anu sapta hotrāḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.