देवा वै यद् यज्ञेन नावारुन्धत तत् परैर् अवारुन्धत तत् पराणाम् परत्वम् । यत् परे गृह्यन्ते यद् एव यज्ञेन नावरुन्द्धे तस्यावरुद्ध्यै यम् प्रथमं गृह्णातीमम् एव तेन लोकम् अभि जयति यं द्वितीयम् अन्तरिक्षं तेन यं तृतीयम् अमुम् एव तेन लोकम् अभि जयति यद् एते गृह्यन्त एषां लोकानाम् अभिजित्यै । उत्तरेष्व् अहःस्व् अमुतो ऽर्वाञ्चो गृह्यन्ते । अभिजित्यैवेमाँल्लोकान् पुनर् इमं लोकम् प्रत्यवरोहन्ति यत् पूर्वेष्व् अहःस्व् इतः पराञ्चो गृह्यन्ते तस्माद् इतः पराञ्च इमे लोकाः । यद् उत्तरेष्व् अहःस्व् अमुतो ऽर्वाञ्चो गृह्यन्ते तस्माद् अमुतो ऽर्वाञ्च इमे लोकास् तस्माद् अयातयाम्नो लोकान् मनुष्या उप जीवन्ति ब्रह्मवादिनो वदन्ति कस्मात् सत्याद् अद्भ्य ओषधयः सम् भवन्त्य् ओषधयः मनुष्याणाम् अन्नम् प्रजापतिम् प्रजा अनु प्र जायन्त इति परान् अन्व् इति ब्रूयात् । यद् गृह्णाति । अद्भ्यस् त्वौषधीभ्यो गृह्णामीति तस्माद् अद्भ्य ओषधयः सम् भवन्ति यद् गृह्णाति । ओषधीभ्यस् त्वा प्रजाभ्यो गृह्णामीति तस्माद् ओषधयो मनुष्याणाम् अन्नम् । यद् गृह्णाति प्रजाभ्यस् त्वा प्रजापतये गृह्णामीति तस्मात् प्रजापतिम् प्रजा अनु प्र जायन्ते ॥
devā vai yad yajñena nāvārundhata tat parair avārundhata tat parāṇām paratvam | yat pare gṛhyante yad eva yajñena nāvarunddhe tasyāvaruddhyai yam prathamaṃ gṛhṇātīmam eva tena lokam abhi jayati yaṃ dvitīyam antarikṣaṃ tena yaṃ tṛtīyam amum eva tena lokam abhi jayati yad ete gṛhyanta eṣāṃ lokānām abhijityai | uttareṣv ahaḥsv amuto 'rvāñco gṛhyante | abhijityaivemā~llokān punar imaṃ lokam pratyavarohanti yat pūrveṣv ahaḥsv itaḥ parāñco gṛhyante tasmād itaḥ parāñca ime lokāḥ | yad uttareṣv ahaḥsv amuto 'rvāñco gṛhyante tasmād amuto 'rvāñca ime lokās tasmād ayātayāmno lokān manuṣyā upa jīvanti brahmavādino vadanti kasmāt satyād adbhya oṣadhayaḥ sam bhavanty oṣadhayaḥ manuṣyāṇām annam prajāpatim prajā anu pra jāyanta iti parān anv iti brūyāt | yad gṛhṇāti | adbhyas tvauṣadhībhyo gṛhṇāmīti tasmād adbhya oṣadhayaḥ sam bhavanti yad gṛhṇāti | oṣadhībhyas tvā prajābhyo gṛhṇāmīti tasmād oṣadhayo manuṣyāṇām annam | yad gṛhṇāti prajābhyas tvā prajāpataye gṛhṇāmīti tasmāt prajāpatim prajā anu pra jāyante ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.