वषट्कारो वै गायत्रियै शिरो ऽच्छिनत् तस्यै रसः परापतत् स पृथिवीम् प्राविशत् स खदिरो ऽभवद् यस्य खादिरः स्रुवो भवति छन्दसाम् एव रसेनाव द्यति सरसा अस्याऽऽहुतयो भवन्ति तृतीयस्याम् इतो दिवि सोम आसीत् तं गायत्र्य् आहरत् तस्य पर्णम् अच्छिद्यत तत् पर्णो ऽभवत् तत् पर्णस्य पर्णत्वं यस्य पर्णमयी जुहूः भवति सौम्या अस्याऽऽहुतयो भवन्ति जुषन्ते ऽस्य देवा आहुतीः । देवा वै ब्रह्मन्न् अवदन्त तत् पर्ण उपाशृणोत् सुश्रवा वै नाम यस्य पर्णमयी जुहूर् भवति न पापꣳ श्लोकꣳ शृणोति ब्रह्म वै पर्णो विण् मरुतो ऽन्नं विण् मारुतो ऽश्वत्थो यस्य पर्णमयी जुहूर् भवत्य् आश्वत्थ्य् उपभृद् ब्रह्मणैवान्नम् अव रुन्द्धे ऽथो ब्रह्म एव विश्य् अध्य् ऊहति राष्ट्रं वै पर्णो विड् अश्वत्थो यत् पर्णमयी जुहूर् भवत्य् आश्वत्थ्य् उपभृद् राष्ट्रम् एव विश्य् अध्य् ऊहति प्रजापतिर् वा अजुहोत् सा यत्राऽऽहुतिः प्रत्यतिष्ठत् ततो विकङ्कत उद् अतिष्ठत् ततः प्रजा असृजत यस्य वैकङ्कती ध्रुवा भवति प्रत्य् एवास्याऽऽहुतयस् तिष्ठन्त्य् अथो प्रैव जायते । एतद् वै स्रुचाꣳ रूपं यस्यैवꣳरूपाः स्रुचो भवन्ति सर्वाण्य् एवैनꣳ रूपाणि पशूनाम् उप तिष्ठन्ते नास्यापरूपम् आत्मञ् जायते ॥
vaṣaṭkāro vai gāyatriyai śiro 'cchinat tasyai rasaḥ parāpatat sa pṛthivīm prāviśat sa khadiro 'bhavad yasya khādiraḥ sruvo bhavati chandasām eva rasenāva dyati sarasā asyā''hutayo bhavanti tṛtīyasyām ito divi soma āsīt taṃ gāyatry āharat tasya parṇam acchidyata tat parṇo 'bhavat tat parṇasya parṇatvaṃ yasya parṇamayī juhūḥ bhavati saumyā asyā''hutayo bhavanti juṣante 'sya devā āhutīḥ | devā vai brahmann avadanta tat parṇa upāśṛṇot suśravā vai nāma yasya parṇamayī juhūr bhavati na pāpam̐ ślokam̐ śṛṇoti brahma vai parṇo viṇ maruto 'nnaṃ viṇ māruto 'śvattho yasya parṇamayī juhūr bhavaty āśvatthy upabhṛd brahmaṇaivānnam ava runddhe 'tho brahma eva viśy adhy ūhati rāṣṭraṃ vai parṇo viḍ aśvattho yat parṇamayī juhūr bhavaty āśvatthy upabhṛd rāṣṭram eva viśy adhy ūhati prajāpatir vā ajuhot sā yatrā''hutiḥ pratyatiṣṭhat tato vikaṅkata ud atiṣṭhat tataḥ prajā asṛjata yasya vaikaṅkatī dhruvā bhavati praty evāsyā''hutayas tiṣṭhanty atho praiva jāyate | etad vai srucām̐ rūpaṃ yasyaivam̐rūpāḥ sruco bhavanti sarvāṇy evainam̐ rūpāṇi paśūnām upa tiṣṭhante nāsyāparūpam ātmañ jāyate ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.