इमाम् अगृभ्णन् रशनाम् ऋतस्य पूर्व आयुषि विदथेषु कव्या । तया देवाः सुतम् आ बभूवुर् ऋतस्य सामन्त् सरम् आरपन्ती ॥ प्रतूर्तं वाजिन्न् आ द्रव वरिष्ठाम् अनु संवतम् । दिवि ते जन्म परमम् अन्तरिक्षे नाभिः पृथिव्याम् अधि योनिः ॥ युञ्जाथाꣳ रासभं युवम् अस्मिन् यामे वृषण्वसू । अग्निम् भरन्तम् अस्मयुम् ॥ योगेयोगे तवस्तरं वाजे-वाजे हवामहे । सखाय इन्द्रमूतये ॥ प्रतूर्वन् एह्य् अवक्रामन्न् अशस्ती रुद्रस्य गाणपत्यान् मयोभूर् एहि । उर्व् अन्तरिक्षम् अन्व् इहि स्वस्तिगव्यूतिर् अभयानि कृण्वन् ॥ पूष्णा सयुजा सह पृथिव्याः सधस्थाद् अग्निम् पुरिष्यम् अङ्गिरस्वद् अच्छेहि । अग्निम् पुरीष्यम् अङ्गिरस्वद् अच्छेमः । अग्निम् पुरीष्यम् अङ्गिरस्वद् भरिष्यामः । अग्निम् पुरीष्यम् अङ्गिरस्वद् भरामः । अन्व् अग्निर् उषसाम् अग्रम् अख्यद् अन्व् अहानि प्रथमो जातवेदाः । अनु सूर्यस्य पुरुत्रा च रश्मीन् अनु द्यावापृथिवी आ ततान ॥ आगत्य वाज्य् अध्वनः सर्वा मृधो वि धूनुते । अग्निꣳ सधस्थे महति चक्षुषा नि चिकीषते ॥ आक्रम्य वाजिन् पृथिवीम् अग्निम् इच्छ रुचा त्वम् । भूया वृत्वाय नो ब्रूहि यतः खनाम तं वयम् ॥ द्यौस् ते पृष्ठम् पृथिवी सधस्थम् आत्मान्तरिक्षꣳ समुद्रस् ते योनिः । विख्याय चक्षुषा त्वम् अभि तिष्ठ पृतन्यतः ॥ उत् क्राम महते सौभगायास्माद् आस्थानाद् द्रविणोदा वाजिन् । वयꣳ स्याम सुमतौ पृथिव्या अग्निं खनिष्यन्त उपस्थे अस्याः ॥ उद् अक्रमीद् द्रविणोदा वाज्य् अर्वाऽकः स लोकꣳ सुकृतम् पृथिव्याः । ततः खनेम सुप्रतीकम् अग्निꣳ सुवो रुहाणा अधि नाक उत्तमे ॥ अपो देवीर् उप सृज मधुमतीर् अयक्ष्माय प्रजाभ्यः । तासाꣳ स्थानाद् उज् जिहताम् ओषधयः सुपिप्पलाः ॥ जिघर्मि अग्निम् मनसा घृतेन प्रतिक्ष्यन्तम् भुवनानि विश्वा । पृथुं तिरश्चा वयसा बृहन्तं व्यचिष्ठम् अन्नꣳ रभसं विदानम् ॥ आ त्वा जिघर्मि वचसा घृतेनारक्षसा मनसा तज् जुषस्व । मर्यश्री स्पृहयद्वर्णो अग्निर् नाभिमृशे तनुवा जर्हृषाणः ॥ परि वाजपतिः कविर् अग्निर् हव्यान्य् अक्रमीत् । दधद् रत्नानि दाशुषे ॥ परि त्वाऽग्ने पुरं वयं विप्रꣳ सहस्य धीमहि । धृषद्वर्णं दिवेदिवे भेत्तारम् भङ्गुरावतः ॥ त्वम् अग्ने द्युभिस् त्वम् आशुशुक्षणिस् त्वम् अद्भ्यस् त्वम् अश्मनस् परि । त्वं वनेभ्यस् त्वम् ओषधीभ्यस् त्वं नृणां नृपते जायसे शुचिः ॥
imām agṛbhṇan raśanām ṛtasya pūrva āyuṣi vidatheṣu kavyā | tayā devāḥ sutam ā babhūvur ṛtasya sāmant saram ārapantī || pratūrtaṃ vājinn ā drava variṣṭhām anu saṃvatam | divi te janma paramam antarikṣe nābhiḥ pṛthivyām adhi yoniḥ || yuñjāthām̐ rāsabhaṃ yuvam asmin yāme vṛṣaṇvasū | agnim bharantam asmayum || yogeyoge tavastaraṃ vāje-vāje havāmahe | sakhāya indramūtaye || pratūrvan ehy avakrāmann aśastī rudrasya gāṇapatyān mayobhūr ehi | urv antarikṣam anv ihi svastigavyūtir abhayāni kṛṇvan || pūṣṇā sayujā saha pṛthivyāḥ sadhasthād agnim puriṣyam aṅgirasvad acchehi | agnim purīṣyam aṅgirasvad acchemaḥ | agnim purīṣyam aṅgirasvad bhariṣyāmaḥ | agnim purīṣyam aṅgirasvad bharāmaḥ | anv agnir uṣasām agram akhyad anv ahāni prathamo jātavedāḥ | anu sūryasya purutrā ca raśmīn anu dyāvāpṛthivī ā tatāna || āgatya vājy adhvanaḥ sarvā mṛdho vi dhūnute | agnim̐ sadhasthe mahati cakṣuṣā ni cikīṣate || ākramya vājin pṛthivīm agnim iccha rucā tvam | bhūyā vṛtvāya no brūhi yataḥ khanāma taṃ vayam || dyaus te pṛṣṭham pṛthivī sadhastham ātmāntarikṣam̐ samudras te yoniḥ | vikhyāya cakṣuṣā tvam abhi tiṣṭha pṛtanyataḥ || ut krāma mahate saubhagāyāsmād āsthānād draviṇodā vājin | vayam̐ syāma sumatau pṛthivyā agniṃ khaniṣyanta upasthe asyāḥ || ud akramīd draviṇodā vājy arvā'kaḥ sa lokam̐ sukṛtam pṛthivyāḥ | tataḥ khanema supratīkam agnim̐ suvo ruhāṇā adhi nāka uttame || apo devīr upa sṛja madhumatīr ayakṣmāya prajābhyaḥ | tāsām̐ sthānād uj jihatām oṣadhayaḥ supippalāḥ || jigharmi agnim manasā ghṛtena pratikṣyantam bhuvanāni viśvā | pṛthuṃ tiraścā vayasā bṛhantaṃ vyaciṣṭham annam̐ rabhasaṃ vidānam || ā tvā jigharmi vacasā ghṛtenārakṣasā manasā taj juṣasva | maryaśrī spṛhayadvarṇo agnir nābhimṛśe tanuvā jarhṛṣāṇaḥ || pari vājapatiḥ kavir agnir havyāny akramīt | dadhad ratnāni dāśuṣe || pari tvā'gne puraṃ vayaṃ vipram̐ sahasya dhīmahi | dhṛṣadvarṇaṃ divedive bhettāram bhaṅgurāvataḥ || tvam agne dyubhis tvam āśuśukṣaṇis tvam adbhyas tvam aśmanas pari | tvaṃ vanebhyas tvam oṣadhībhyas tvaṃ nṛṇāṃ nṛpate jāyase śuciḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.