विष्णोः क्रमो ऽस्य् अभिमातिहा गायत्रं छन्द आ रोह पृथिवीम् अनु वि क्रमस्व निर्भक्तः स यं द्विष्मो विष्णोः क्रमो ऽस्य् अभिशस्तिहा त्रैष्टुभं छन्द आ रोहान्तरिक्षम् अनु वि क्रमस्व निर्भक्तः स यं द्विष्मो विष्णोः क्रमो ऽस्य् अरातीयतो हन्ता जागतं छन्द आ रोह दिवम् अनु वि क्रमस्व निर्भक्तः स यं द्विष्मो विष्णोः क्रमो ऽसि शत्रूयतो हन्ताऽऽनुष्टुभं छन्द आ रोह दिशो ऽनु वि क्रमस्व निर्भक्तः स यं द्विष्मः । अक्रन्दद् अग्निः स्तनयन्न् इव द्यौः क्षामा रेरिहद् वीरुधः समञ्जन् । सद्यो जज्ञानो वि हीम् इद्धो अख्यद् आ रोदसी भानुना भात्य् अन्तः ॥ अग्ने ऽभ्यावर्तिन्न् अभि न आ वर्तस्वाऽऽयुषा वर्चसा सन्या मेधया प्रजया धनेन ॥ अग्ने अङ्गिरः शतं ते सन्त्व् आवृतः सहस्रं त उपावृतः । तासाम् पोषस्य पोषेण पुनर् नो नष्टम् आ कृधि पुनर् नो रयिम् आकृधि ॥ पुनर् ऊर्जा नि वर्तस्व पुनर् अग्न इषाऽऽयुषा । पुनर् नः पाहि विश्वतः ॥ सह रय्या नि वर्तस्वाग्ने पिन्वस्व धारया । विश्वप्स्निया विश्वतस् परि ॥ उद् उत्तमं वरुण पाशम् अस्मद् अवाधमम् वि मध्यमꣳ श्रथाय । अथा वयम् आदित्य व्रते तवानागसो अदितये स्याम ॥ आ त्वाऽहार्षम् अन्तर् अभूर् ध्रुवस् तिष्ठाविचाचलिः । विशस् त्वा सर्वा वाञ्छन्त्व् अस्मिन् राष्ट्रम् अधि श्रय ॥ अग्रे बृहन्न् उषसामूर्ध्वो अस्थान् निर्जग्मिवान् तमसो ज्योतिषाऽऽगात् । अग्निर् भानुना रुशता स्वङ्ग आ जातो विश्वा सद्मान्य् अप्राः ॥ सीद त्वम् मातुर् अस्याः ॥ उपस्थे विश्वान्य् अग्ने वयुनानि विद्वान् । मैनाम् अर्चिषा मा तपसाभि शूशुचो ऽन्तर् अस्याꣳ शुक्रज्योतिर् वि भाहि ॥ अन्तर् अग्ने रुचा त्वम् उखायै सदने स्वे । तस्यास् त्वꣳ हरसा तपञ् जातवेदः शिवो भव ॥ शिवो भूत्वा मह्यम् अग्ने ऽथो सीद शिवस् त्वम् । शिवाः कृत्वा दिशः सर्वाः स्वां योनिम् इहासदः ॥ हꣳसः शुचिषद् वसुर् अन्तरिक्षसद् होता वेदिषद् अतिथिर् दुरोणसत् । नृषद् वरसद् व्योमसद् अब्जा गोजा ऋतजा अद्रिजा ऋतम् बृहत् ॥
viṣṇoḥ kramo 'sy abhimātihā gāyatraṃ chanda ā roha pṛthivīm anu vi kramasva nirbhaktaḥ sa yaṃ dviṣmo viṣṇoḥ kramo 'sy abhiśastihā traiṣṭubhaṃ chanda ā rohāntarikṣam anu vi kramasva nirbhaktaḥ sa yaṃ dviṣmo viṣṇoḥ kramo 'sy arātīyato hantā jāgataṃ chanda ā roha divam anu vi kramasva nirbhaktaḥ sa yaṃ dviṣmo viṣṇoḥ kramo 'si śatrūyato hantā''nuṣṭubhaṃ chanda ā roha diśo 'nu vi kramasva nirbhaktaḥ sa yaṃ dviṣmaḥ | akrandad agniḥ stanayann iva dyauḥ kṣāmā rerihad vīrudhaḥ samañjan | sadyo jajñāno vi hīm iddho akhyad ā rodasī bhānunā bhāty antaḥ || agne 'bhyāvartinn abhi na ā vartasvā''yuṣā varcasā sanyā medhayā prajayā dhanena || agne aṅgiraḥ śataṃ te santv āvṛtaḥ sahasraṃ ta upāvṛtaḥ | tāsām poṣasya poṣeṇa punar no naṣṭam ā kṛdhi punar no rayim ākṛdhi || punar ūrjā ni vartasva punar agna iṣā''yuṣā | punar naḥ pāhi viśvataḥ || saha rayyā ni vartasvāgne pinvasva dhārayā | viśvapsniyā viśvatas pari || ud uttamaṃ varuṇa pāśam asmad avādhamam vi madhyamam̐ śrathāya | athā vayam āditya vrate tavānāgaso aditaye syāma || ā tvā'hārṣam antar abhūr dhruvas tiṣṭhāvicācaliḥ | viśas tvā sarvā vāñchantv asmin rāṣṭram adhi śraya || agre bṛhann uṣasāmūrdhvo asthān nirjagmivān tamaso jyotiṣā''gāt | agnir bhānunā ruśatā svaṅga ā jāto viśvā sadmāny aprāḥ || sīda tvam mātur asyāḥ || upasthe viśvāny agne vayunāni vidvān | mainām arciṣā mā tapasābhi śūśuco 'ntar asyām̐ śukrajyotir vi bhāhi || antar agne rucā tvam ukhāyai sadane sve | tasyās tvam̐ harasā tapañ jātavedaḥ śivo bhava || śivo bhūtvā mahyam agne 'tho sīda śivas tvam | śivāḥ kṛtvā diśaḥ sarvāḥ svāṃ yonim ihāsadaḥ || ham̐saḥ śuciṣad vasur antarikṣasad hotā vediṣad atithir duroṇasat | nṛṣad varasad vyomasad abjā gojā ṛtajā adrijā ṛtam bṛhat ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.