आदित्यं गर्भम् पयसा समञ्जन्त् सहस्रस्य प्रतिमां विश्वरूपम् । परि वृङ्ग्धि हरसा माऽभि मृक्षः शतायुषं कृणुहि चीयमानः ॥ इमम् मा हिꣳसीर् द्विपादम् पशूनाꣳ सहस्राक्ष मेध आ चीयमानः । मयुम् आरण्यम् अनु ते दिशामि तेन चिन्वानस् तनुवो नि षीद ॥ वातस्य ध्राजिं वरुणस्य नाभिम् अश्वं जज्ञानꣳ सरिरस्य मध्ये । शिशुं नदीनाꣳ हरिम् अद्रिबुद्धम् अग्ने मा हिꣳसीः परमे व्योमन् ॥ इमम् मा हिꣳसीर् एकशफम् पशूनां कनिक्रदं वाजिनं वाजिनेषु । गौरम् आरण्यम् अनु ते दिशामि तेन चिन्वानस् तनुवो नि षीद ॥ अजस्रम् इन्दुम् अरुषम् भुरण्युम् अग्निम् ईडे पूर्वचित्तौ नमोभिः । स पर्वभिर् ऋतुशः कल्पमानो गाम् मा हिꣳसीर् अदितिं विराजम् ॥ इमꣳ समुद्रꣳ शतधारम् उत्सं व्यच्यमानम् भुवनस्य मध्ये । घृतं दुहानाम् अदितिं जनायाग्ने मा हिꣳसीः परमे व्योमन् । गवयम् आरण्यम् अनु ते दिशामि तेन चिन्वानस् तनुवो नि षीद ॥ वरूत्रिं त्वष्टुर् वरुणस्य नाभिम् अविं जज्ञानाꣳ रजसः परस्मात् । महीꣳ सहस्रीम् असुरस्य मायाम् अग्ने मा हिꣳसीः परमे व्योमन् ॥ इमामूर्णायुं वरुणस्य मायां त्वचम् पशूनां द्विपदां चतुष्पदाम् । त्वष्टुः प्रजानाम् प्रथमं जनित्रम् अग्ने मा हिꣳसीः परमे व्योमन् । उष्ट्रम् आरण्यम् अनु ते दिशामि तेन चिन्वानस् तनुवो नि षीद ॥ यो अग्निर् अग्नेस् तपसो ऽधि जातः शोचात् पृथिव्या उत वा दिवस् परि । येन प्रजा विश्वकर्मा व्यानट् तम् अग्ने हेडः परि ते वृणक्तु ॥ अजा ह्य् अग्नेर् अजनिष्ट गर्भात् सा वा अपश्यज् जनितारम् अग्रे । तया रोहम् आयन्न् उप मेध्यासः तया देवा देवताम् अग्र आयन् । शरभम् आरण्यम् अनु ते दिशामि तेन चिन्वानस् तनुवो नि षीद ॥
ādityaṃ garbham payasā samañjant sahasrasya pratimāṃ viśvarūpam | pari vṛṅgdhi harasā mā'bhi mṛkṣaḥ śatāyuṣaṃ kṛṇuhi cīyamānaḥ || imam mā him̐sīr dvipādam paśūnām̐ sahasrākṣa medha ā cīyamānaḥ | mayum āraṇyam anu te diśāmi tena cinvānas tanuvo ni ṣīda || vātasya dhrājiṃ varuṇasya nābhim aśvaṃ jajñānam̐ sarirasya madhye | śiśuṃ nadīnām̐ harim adribuddham agne mā him̐sīḥ parame vyoman || imam mā him̐sīr ekaśapham paśūnāṃ kanikradaṃ vājinaṃ vājineṣu | gauram āraṇyam anu te diśāmi tena cinvānas tanuvo ni ṣīda || ajasram indum aruṣam bhuraṇyum agnim īḍe pūrvacittau namobhiḥ | sa parvabhir ṛtuśaḥ kalpamāno gām mā him̐sīr aditiṃ virājam || imam̐ samudram̐ śatadhāram utsaṃ vyacyamānam bhuvanasya madhye | ghṛtaṃ duhānām aditiṃ janāyāgne mā him̐sīḥ parame vyoman | gavayam āraṇyam anu te diśāmi tena cinvānas tanuvo ni ṣīda || varūtriṃ tvaṣṭur varuṇasya nābhim aviṃ jajñānām̐ rajasaḥ parasmāt | mahīm̐ sahasrīm asurasya māyām agne mā him̐sīḥ parame vyoman || imāmūrṇāyuṃ varuṇasya māyāṃ tvacam paśūnāṃ dvipadāṃ catuṣpadām | tvaṣṭuḥ prajānām prathamaṃ janitram agne mā him̐sīḥ parame vyoman | uṣṭram āraṇyam anu te diśāmi tena cinvānas tanuvo ni ṣīda || yo agnir agnes tapaso 'dhi jātaḥ śocāt pṛthivyā uta vā divas pari | yena prajā viśvakarmā vyānaṭ tam agne heḍaḥ pari te vṛṇaktu || ajā hy agner ajaniṣṭa garbhāt sā vā apaśyaj janitāram agre | tayā roham āyann upa medhyāsaḥ tayā devā devatām agra āyan | śarabham āraṇyam anu te diśāmi tena cinvānas tanuvo ni ṣīda ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.