समिद् दिशाम् आशया नः सुवर्विन् मधोर् अतो माधवः पात्व् अस्मान् । अग्निर् देवो दुष्टरीतुर् अदाभ्य इदं क्षत्रꣳ रक्षतु पात्व् अस्मान् ॥ रथंतरꣳ सामभिः पात्व् अस्मान् गायत्री छन्दसां विश्वरूपा । त्रिवृन् नो विष्ठया स्तोमो अह्नाꣳ समुद्रो वात इदम् ओजः पिपर्तु ॥ उग्रा दिशाम् अभिभूतिर् वयोधाः शुचिः शुक्रे अहन्य् ओजसीना । इन्द्राधिपतिः पिपृताद् अतो नो महि क्षत्रं विश्वतो धारयेदम् ॥ बृहत् साम क्षत्रभृद् वृद्धवृष्णियं त्रिष्टुभौजः शुभितम् उग्रवीरम् । इन्द्र स्तोमेन पञ्चदशेन मध्यम् इदं वातेन सगरेण रक्ष ॥ प्राची दिशाꣳ सहयशा यशस्वती विश्वे देवाः प्रावृषाह्नाꣳ सुवर्वती । इदं क्षत्रं दुष्टरम् अस्त्व् ओजो ऽनाधृष्टꣳ सहस्रियꣳ सहस्वत् ॥ वैरूपे सामन्न् इह तच् छकेम जगत्यैनं विक्ष्व् आ वेशयामः । विश्वे देवाः सप्तदशेन वर्च इदं क्षत्रꣳ सलिलवातम् उग्रम् ॥ धर्त्री दिशां क्षत्रम् इदं दाधारोपस्थाऽऽशानाम् मित्रवद् अस्त्व् ओजः । मित्रावरुणा शरदाऽह्नां चिकित्नू अस्मै राष्ट्राय महि शर्म यच्छतम् ॥ वैराजे सामन्न् अधि मे मनीषाऽनुष्टुभा सम्भृतं वीर्यꣳ सहः । इदं क्षत्रम् मित्रवद् आर्द्रदानु मित्रावरुणा रक्षतम् आधिपत्यैः ॥ सम्राड् दिशाꣳ सहसाम्नी सहस्वत्य् ऋतुर् हेमन्तो विष्ठया नः पिपर्तु । अवस्युवाताः बृहतीर् नु शक्वरीर् इमं यज्ञम् अवन्तु नो घृताचीः ॥ सुवर्वती सुदुघा नः पयस्वती दिशां देव्यवतु नो घृताची । त्वं गोपाः पुरएतोत पश्चाद् बृहस्पते याम्यां युङ्ग्धि वाचम् ॥ ऊर्ध्वा दिशाꣳ रन्तिर् आशौषधीनाꣳ संवत्सरेण सविता नो अह्नाम् । रेवत् सामातिछन्दा उ छन्दोऽजातशत्रुः स्योना नो अस्तु ॥ स्तोमत्रयस्त्रिꣳशे भुवनस्य पत्नि विवस्वद्वाते अभि नः गृणाहि । घृतवती सवितर् आधिपत्यैः पयस्वती रन्तिर् आशा नो अस्तु ॥ ध्रुवा दिशां विष्णुपत्न्य् अघोराऽस्येशाना सहसो या मनोता । बृहस्पतिर् मातरिश्वोत वायुः संधुवाना वाता अभि नो गृणन्तु ॥ विष्टम्भो दिवो धरुणः पृथिव्या अस्येशाना जगतो विष्णुपत्नी । विश्वव्यचा इषयन्ती सुभूतिः शिवा नो अस्त्व् अदितिर् उपस्थे ॥ वैश्वानरो न ऊत्या पृष्टो दिवि । अनु नो ऽद्यानुमतिः । अन्व् इद् अनुमते त्वम् । कया नश् चित्र आ भुवत् को अद्य युङ्क्ते ॥
samid diśām āśayā naḥ suvarvin madhor ato mādhavaḥ pātv asmān | agnir devo duṣṭarītur adābhya idaṃ kṣatram̐ rakṣatu pātv asmān || rathaṃtaram̐ sāmabhiḥ pātv asmān gāyatrī chandasāṃ viśvarūpā | trivṛn no viṣṭhayā stomo ahnām̐ samudro vāta idam ojaḥ pipartu || ugrā diśām abhibhūtir vayodhāḥ śuciḥ śukre ahany ojasīnā | indrādhipatiḥ pipṛtād ato no mahi kṣatraṃ viśvato dhārayedam || bṛhat sāma kṣatrabhṛd vṛddhavṛṣṇiyaṃ triṣṭubhaujaḥ śubhitam ugravīram | indra stomena pañcadaśena madhyam idaṃ vātena sagareṇa rakṣa || prācī diśām̐ sahayaśā yaśasvatī viśve devāḥ prāvṛṣāhnām̐ suvarvatī | idaṃ kṣatraṃ duṣṭaram astv ojo 'nādhṛṣṭam̐ sahasriyam̐ sahasvat || vairūpe sāmann iha tac chakema jagatyainaṃ vikṣv ā veśayāmaḥ | viśve devāḥ saptadaśena varca idaṃ kṣatram̐ salilavātam ugram || dhartrī diśāṃ kṣatram idaṃ dādhāropasthā''śānām mitravad astv ojaḥ | mitrāvaruṇā śaradā'hnāṃ cikitnū asmai rāṣṭrāya mahi śarma yacchatam || vairāje sāmann adhi me manīṣā'nuṣṭubhā sambhṛtaṃ vīryam̐ sahaḥ | idaṃ kṣatram mitravad ārdradānu mitrāvaruṇā rakṣatam ādhipatyaiḥ || samrāḍ diśām̐ sahasāmnī sahasvaty ṛtur hemanto viṣṭhayā naḥ pipartu | avasyuvātāḥ bṛhatīr nu śakvarīr imaṃ yajñam avantu no ghṛtācīḥ || suvarvatī sudughā naḥ payasvatī diśāṃ devyavatu no ghṛtācī | tvaṃ gopāḥ puraetota paścād bṛhaspate yāmyāṃ yuṅgdhi vācam || ūrdhvā diśām̐ rantir āśauṣadhīnām̐ saṃvatsareṇa savitā no ahnām | revat sāmātichandā u chando'jātaśatruḥ syonā no astu || stomatrayastrim̐śe bhuvanasya patni vivasvadvāte abhi naḥ gṛṇāhi | ghṛtavatī savitar ādhipatyaiḥ payasvatī rantir āśā no astu || dhruvā diśāṃ viṣṇupatny aghorā'syeśānā sahaso yā manotā | bṛhaspatir mātariśvota vāyuḥ saṃdhuvānā vātā abhi no gṛṇantu || viṣṭambho divo dharuṇaḥ pṛthivyā asyeśānā jagato viṣṇupatnī | viśvavyacā iṣayantī subhūtiḥ śivā no astv aditir upasthe || vaiśvānaro na ūtyā pṛṣṭo divi | anu no 'dyānumatiḥ | anv id anumate tvam | kayā naś citra ā bhuvat ko adya yuṅkte ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.