इन्द्राग्निभ्यां त्वा सयुजा युजा युनज्म्य् आघाराभ्यां तेजसा वर्चसोक्थेभिः स्तोमेभिश् छन्दोभी रय्यै पोषाय सजातानाम् मध्यमस्थेयाय मया त्वा सयुजा युजा युनज्मि । अम्बा दुला नितत्निर् अभ्रयन्ती मेघयन्ती वर्षयन्ती चुपुणीका नामासि प्रजापतिना त्वा विश्वाभिर् धीभिर् उप दधामि पृथिव्य् उदपुरम् अन्नेन विष्टा मनुष्यास् ते गोप्तारो ऽग्निर् वियत्तो ऽस्यां ताम् अहम् प्र पद्ये सा मे शर्म च वर्म चास्तु । अधिद्यौर् अन्तरिक्षम् ब्रह्मणा विष्टा मरुतस् ते गोप्तारो वायुर् वियत्तो ऽस्यां ताम् अहम् प्र पद्ये सा मे शर्म च वर्म चास्तु द्यौर् अपराजिताऽमृतेन विष्टाऽऽदित्यास् ते गोप्तारः सूर्यो वियत्तो ऽस्यां ताम् अहम् प्र पद्ये सा मे शर्म च वर्म चास्तु ॥
indrāgnibhyāṃ tvā sayujā yujā yunajmy āghārābhyāṃ tejasā varcasokthebhiḥ stomebhiś chandobhī rayyai poṣāya sajātānām madhyamastheyāya mayā tvā sayujā yujā yunajmi | ambā dulā nitatnir abhrayantī meghayantī varṣayantī cupuṇīkā nāmāsi prajāpatinā tvā viśvābhir dhībhir upa dadhāmi pṛthivy udapuram annena viṣṭā manuṣyās te goptāro 'gnir viyatto 'syāṃ tām aham pra padye sā me śarma ca varma cāstu | adhidyaur antarikṣam brahmaṇā viṣṭā marutas te goptāro vāyur viyatto 'syāṃ tām aham pra padye sā me śarma ca varma cāstu dyaur aparājitā'mṛtena viṣṭā''dityās te goptāraḥ sūryo viyatto 'syāṃ tām aham pra padye sā me śarma ca varma cāstu ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.