प्राचीम् अनु प्रदिशम् प्रेहि विद्वान् अग्नेर् अग्ने पुरोअग्निर् भवेह । विश्वा आशा दीद्यानो वि भाह्य् ऊर्जं नो धेहि द्विपदे चतुष्पदे ॥ क्रमध्वम् अग्निना नाकम् उख्यꣳ हस्तेषु बिभ्रतः । दिवः पृष्ठꣳ सुवर् गत्वा मिश्रा देवेभिर् आद्ध्वम् ॥ पृथिव्या अहम् उद् अन्तरिक्षम् आरुहम् अन्तरिक्षाद् दिवम् आरुहम् । दिवो नाकस्य पृष्ठात् सुवर् ज्योतिर् अगा महम् ॥ सुवर् यन्तो नापेक्षन्त आ द्याꣳ रोहन्ति रोदसी । यज्ञं ये विश्वतोधारꣳ सुविद्वाꣳसो वितेनिरे ॥ अग्ने प्रेहि प्रथमो देवयतां चक्षुर् देवानाम् उत मर्त्यानाम् । इयक्षमाणा भृगुभिः सजोषाः सुवर् यन्तु यजमानाः स्वस्ति ॥ नक्तोषासा समनसा विरूपे धापयेते शिशुम् एकꣳ समीची । द्यावा क्षामा रुक्मो अन्तर् विभाति देवा अग्निं धारयन् द्रविणोदाः ॥ अग्ने सहस्राक्ष शतमूर्धञ् छतं ते प्राणाः सहस्रम् अपानाः । त्वꣳ साहस्रस्य राय ईशिषे तस्मै ते विधेम वाजाय स्वाहा ॥ सुपर्णो ऽसि गरुत्मान् पृथिव्याꣳ सीद पृष्ठे पृथिव्याः सीद भासान्तरिक्षम् आ पृण ज्योतिषा दिवम् उत् तभान तेजसा दिश उद् दृꣳह ॥ आजुह्वानः सुप्रतीकः पुरस्ताद् अग्ने स्वां योनिम् आ सीद साध्या । अस्मिन्त् सधस्थे अध्य् उत्तरस्मिन् विश्वे देवाः यजमानश् च सीदत ॥ प्रेद्धो अग्ने दीदिहि पुरो नो ऽजस्रया सूर्म्या यविष्ठ । त्वाꣳ शश्वन्त उप यन्ति वाजाः ॥ विधेम ते परमे जन्मन्न् अग्ने विधेम स्तोमैर् अवरे सधस्थे । यस्माद् योनेर् उदारिथा यजे तम् प्र त्वे हवीꣳषि जुहुरे समिद्धे ॥ ताꣳ सवितुर् वरेण्यस्य चित्राम् आहं वृणे सुमतिं विश्वजन्याम् । याम् अस्य कण्वो अदुहत् प्रपीनाꣳ सहस्रधाराम् पयसा महीं गाम् ॥ सप्त ते अग्ने समिधः सप्त जिह्वाः सप्तर्षयः सप्त धाम प्रियाणि । सप्त होत्राः सप्तधा त्वा यजन्ति सप्त योनीर् आ पृणस्वा घृतेन ॥ ईदृङ् चान्यादृङ् चैतादृङ् च प्रतिदृङ् च मितश् च सम्मितश् च सभराः । शुक्रज्योतिश् च चित्रज्योतिश् च सत्यज्योतिश् च ज्योतिष्माꣳश् च सत्यश् चर्तपाश् चात्यꣳहाः ॥ ऋतजिच् च सत्यजिच् च सेनजिच् च सुषेणश् चान्त्यमित्रश् च दूरेअमित्रश् च गणः । ऋतश् च सत्यश् च ध्रुवश् च धरुणश् च धर्ता च विधर्ता च विधारयः । ईदृक्षास एतादृक्षास ऊ षु णः सदृक्षासः प्रतिसदृक्षास एतन । मितासश् च सम्मितासश् च न ऊतये सभरसो मरुतो यज्ञे अस्मिन् । इन्द्रं दैवीर् विशो मरुतो ऽनुवर्त्मानो यथेन्द्रं दैवीर् विशो मरुतो ऽनुवर्त्मान एवम् इमं यजमानं दैवीश् च विशो मानुषीश् चानुवर्त्मानो भवन्तु ॥
prācīm anu pradiśam prehi vidvān agner agne puroagnir bhaveha | viśvā āśā dīdyāno vi bhāhy ūrjaṃ no dhehi dvipade catuṣpade || kramadhvam agninā nākam ukhyam̐ hasteṣu bibhrataḥ | divaḥ pṛṣṭham̐ suvar gatvā miśrā devebhir āddhvam || pṛthivyā aham ud antarikṣam āruham antarikṣād divam āruham | divo nākasya pṛṣṭhāt suvar jyotir agā maham || suvar yanto nāpekṣanta ā dyām̐ rohanti rodasī | yajñaṃ ye viśvatodhāram̐ suvidvām̐so vitenire || agne prehi prathamo devayatāṃ cakṣur devānām uta martyānām | iyakṣamāṇā bhṛgubhiḥ sajoṣāḥ suvar yantu yajamānāḥ svasti || naktoṣāsā samanasā virūpe dhāpayete śiśum ekam̐ samīcī | dyāvā kṣāmā rukmo antar vibhāti devā agniṃ dhārayan draviṇodāḥ || agne sahasrākṣa śatamūrdhañ chataṃ te prāṇāḥ sahasram apānāḥ | tvam̐ sāhasrasya rāya īśiṣe tasmai te vidhema vājāya svāhā || suparṇo 'si garutmān pṛthivyām̐ sīda pṛṣṭhe pṛthivyāḥ sīda bhāsāntarikṣam ā pṛṇa jyotiṣā divam ut tabhāna tejasā diśa ud dṛm̐ha || ājuhvānaḥ supratīkaḥ purastād agne svāṃ yonim ā sīda sādhyā | asmint sadhasthe adhy uttarasmin viśve devāḥ yajamānaś ca sīdata || preddho agne dīdihi puro no 'jasrayā sūrmyā yaviṣṭha | tvām̐ śaśvanta upa yanti vājāḥ || vidhema te parame janmann agne vidhema stomair avare sadhasthe | yasmād yoner udārithā yaje tam pra tve havīm̐ṣi juhure samiddhe || tām̐ savitur vareṇyasya citrām āhaṃ vṛṇe sumatiṃ viśvajanyām | yām asya kaṇvo aduhat prapīnām̐ sahasradhārām payasā mahīṃ gām || sapta te agne samidhaḥ sapta jihvāḥ saptarṣayaḥ sapta dhāma priyāṇi | sapta hotrāḥ saptadhā tvā yajanti sapta yonīr ā pṛṇasvā ghṛtena || īdṛṅ cānyādṛṅ caitādṛṅ ca pratidṛṅ ca mitaś ca sammitaś ca sabharāḥ | śukrajyotiś ca citrajyotiś ca satyajyotiś ca jyotiṣmām̐ś ca satyaś cartapāś cātyam̐hāḥ || ṛtajic ca satyajic ca senajic ca suṣeṇaś cāntyamitraś ca dūreamitraś ca gaṇaḥ | ṛtaś ca satyaś ca dhruvaś ca dharuṇaś ca dhartā ca vidhartā ca vidhārayaḥ | īdṛkṣāsa etādṛkṣāsa ū ṣu ṇaḥ sadṛkṣāsaḥ pratisadṛkṣāsa etana | mitāsaś ca sammitāsaś ca na ūtaye sabharaso maruto yajñe asmin | indraṃ daivīr viśo maruto 'nuvartmāno yathendraṃ daivīr viśo maruto 'nuvartmāna evam imaṃ yajamānaṃ daivīś ca viśo mānuṣīś cānuvartmāno bhavantu ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.