पवस्व वाजसातय इत्य् अनुष्टुक् प्रतिपद् भवति तिस्रो ऽनुष्टुभश् चतस्रो गायत्रियः । यत् तिस्रो ऽनुष्टुभस् तस्माद् अश्वस् त्रिभिस् तिष्ठꣳस् तिष्ठति यच् चतस्रो गायत्रियस् तस्मात् सर्वाꣳश् चतुरः पदः प्रतिदधत् पलायते परमा वा एषा छन्दसां यद् { अनुष्टुक् ^ अनुष्टुभ् } परमश् चतुष्टोम स्तोमानाम् परमस् त्रिरात्रो यज्ञानाम् परमो ऽश्वः पशूनाम् परमेणैवैनम् परमतां गमयति । एकविꣳशम् अहर् भवति ॥ यस्मिन्न् अश्व आलभ्यते द्वादश मासाः पञ्चर्तवस् त्रय इमे लोका असाव् आदित्य एकविꣳश एष प्रजापतिः प्राजापत्यो ऽश्वस् तम् एव साक्षाद् ऋध्नोति शक्वरयः पृष्ठम् भवन्ति । अन्यदन्यच् छन्दः । अन्येऽन्ये वा एते पशव आ लभ्यन्त उतेव ग्राम्या उतेवाऽऽरण्याः । यच् छक्वरयः पृष्ठम् भवन्त्य् अश्वस्य सर्वत्वाय पार्थुरश्मम् ब्रह्मसामम् भवति रश्मिना वा अश्वः यतः। ईश्वरो वा अश्वो ऽयतो ऽप्रतिष्ठितः पराम् परावतं गन्तोः । यत् पार्थुरश्मम् ब्रह्मसामम् भवत्य् अश्वस्य यत्यै धृत्यै ॥ संकृत्य् अच्छावाकसामम् भवति । उत्सन्नयज्ञो वा एष यद् अश्वमेधः कस् तद् वेदेत्य् आहुर् यदि सर्वो वा क्रियते न वा सर्व इति यत् संकृत्य् अच्छावाकसामम् भवत्य् अश्वस्य सर्वत्वाय पर्याप्त्या अनन्तरायाय सर्वस्तोमो ऽतिरात्र उत्तमम् अहर् भवति सर्वस्याप्त्यै सर्वस्य जित्यै सर्वम् एव तेनाप्नोति सर्वं जयति ॥
pavasva vājasātaya ity anuṣṭuk pratipad bhavati tisro 'nuṣṭubhaś catasro gāyatriyaḥ | yat tisro 'nuṣṭubhas tasmād aśvas tribhis tiṣṭham̐s tiṣṭhati yac catasro gāyatriyas tasmāt sarvām̐ś caturaḥ padaḥ pratidadhat palāyate paramā vā eṣā chandasāṃ yad { anuṣṭuk ^ anuṣṭubh } paramaś catuṣṭoma stomānām paramas trirātro yajñānām paramo 'śvaḥ paśūnām parameṇaivainam paramatāṃ gamayati | ekavim̐śam ahar bhavati || yasminn aśva ālabhyate dvādaśa māsāḥ pañcartavas traya ime lokā asāv āditya ekavim̐śa eṣa prajāpatiḥ prājāpatyo 'śvas tam eva sākṣād ṛdhnoti śakvarayaḥ pṛṣṭham bhavanti | anyadanyac chandaḥ | anye'nye vā ete paśava ā labhyanta uteva grāmyā utevā''raṇyāḥ | yac chakvarayaḥ pṛṣṭham bhavanty aśvasya sarvatvāya pārthuraśmam brahmasāmam bhavati raśminā vā aśvaḥ yataḥ| īśvaro vā aśvo 'yato 'pratiṣṭhitaḥ parām parāvataṃ gantoḥ | yat pārthuraśmam brahmasāmam bhavaty aśvasya yatyai dhṛtyai || saṃkṛty acchāvākasāmam bhavati | utsannayajño vā eṣa yad aśvamedhaḥ kas tad vedety āhur yadi sarvo vā kriyate na vā sarva iti yat saṃkṛty acchāvākasāmam bhavaty aśvasya sarvatvāya paryāptyā anantarāyāya sarvastomo 'tirātra uttamam ahar bhavati sarvasyāptyai sarvasya jityai sarvam eva tenāpnoti sarvaṃ jayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.