हिरण्यवर्णाः शुचयः पावका यासु जातः कश्यपो यास्व् इन्द्रः । अग्निं गर्भं दधिरे विरूपास् ता न आपः शꣳ स्योना भवन्तु ॥ यासाꣳ राजा वरुणो याति मध्ये सत्यानृते अवपश्यञ् जनानाम् । मधुश्चुतः शुचयो याः पावकास् ता न आपः शꣳ स्योना भवन्तु ॥ यासां देवा दिवि कृण्वन्ति भक्षं या अन्तरिक्षे बहुधा भवन्ति । याः पृथिवीम् पयसोन्दन्ति शुक्रास् ता न आपः शꣳ स्योना भवन्तु ॥ शिवेन मा चक्षुषा पश्यतापः शिवया तनुवो ऽप स्पृशत त्वचम् मे । सर्वाꣳ अग्नीꣳ र् अप्सुषदो हुवे वो मयि वर्चो बलम् ओजो नि धत्त ॥ यद् अदः सम्प्रयतीर् अहाव् अनदता हते । तस्माद् आ नद्यो नाम स्थ ता वो नामानि सिन्धवः ॥ यत् प्रेषिता वरुणेन ताः शीभꣳ समवल्गत । तद् आप्नोद् इन्द्रो वो यतीस् तस्माद् आपो अनु स्थन ॥ अपकामꣳ स्यन्दमाना अवीवरत वो हिकम् । इन्द्रो वः शक्तिभिर् देवीस् तस्माद् वार् णाम वो हितम् ॥ एको देवो अप्य् अतिष्ठत् स्यन्दमाना यथावशम् । उद् आनिषुर् महीर् इति तस्माद् उदकम् उच्यते ॥ आपो भद्रा घृतम् इद् आप आसुर् अग्नीषोमौ बिभ्रत्य् आप इत् ताः । तीव्रो रसो मधुपृचाम् ॥ अरंगम आ मा प्राणेन सह वर्चसा गन् ॥ आद् इत् पश्याम्य् उत वा शृणोम्य् आ मा घोषो गच्छति वाङ् न आसाम् । मन्ये भेजानो अमृतस्य तर्हि हिरण्यवर्णा अतृपं यद् वः ॥ आपो हि ष्ठा मयोभुवस् ता न ऊर्जे दधातन । महे रणाय चक्षसे ॥ यो वः शिवतमो रसस् तस्य भाजयतेह नः । उशतीर् इव मातरः ॥ तस्मा अरं गमाम वो यस्य क्षयाय जिन्वथ । आपो जनयथा च नः ॥ दिवि श्रयस्वान्तरिक्षे यतस्व पृथिव्या सम् भव ब्रह्मवर्चसम् असि ब्रह्मवर्चसाय त्वा ॥
hiraṇyavarṇāḥ śucayaḥ pāvakā yāsu jātaḥ kaśyapo yāsv indraḥ | agniṃ garbhaṃ dadhire virūpās tā na āpaḥ śam̐ syonā bhavantu || yāsām̐ rājā varuṇo yāti madhye satyānṛte avapaśyañ janānām | madhuścutaḥ śucayo yāḥ pāvakās tā na āpaḥ śam̐ syonā bhavantu || yāsāṃ devā divi kṛṇvanti bhakṣaṃ yā antarikṣe bahudhā bhavanti | yāḥ pṛthivīm payasondanti śukrās tā na āpaḥ śam̐ syonā bhavantu || śivena mā cakṣuṣā paśyatāpaḥ śivayā tanuvo 'pa spṛśata tvacam me | sarvām̐ agnīm̐ r apsuṣado huve vo mayi varco balam ojo ni dhatta || yad adaḥ samprayatīr ahāv anadatā hate | tasmād ā nadyo nāma stha tā vo nāmāni sindhavaḥ || yat preṣitā varuṇena tāḥ śībham̐ samavalgata | tad āpnod indro vo yatīs tasmād āpo anu sthana || apakāmam̐ syandamānā avīvarata vo hikam | indro vaḥ śaktibhir devīs tasmād vār ṇāma vo hitam || eko devo apy atiṣṭhat syandamānā yathāvaśam | ud āniṣur mahīr iti tasmād udakam ucyate || āpo bhadrā ghṛtam id āpa āsur agnīṣomau bibhraty āpa it tāḥ | tīvro raso madhupṛcām || araṃgama ā mā prāṇena saha varcasā gan || ād it paśyāmy uta vā śṛṇomy ā mā ghoṣo gacchati vāṅ na āsām | manye bhejāno amṛtasya tarhi hiraṇyavarṇā atṛpaṃ yad vaḥ || āpo hi ṣṭhā mayobhuvas tā na ūrje dadhātana | mahe raṇāya cakṣase || yo vaḥ śivatamo rasas tasya bhājayateha naḥ | uśatīr iva mātaraḥ || tasmā araṃ gamāma vo yasya kṣayāya jinvatha | āpo janayathā ca naḥ || divi śrayasvāntarikṣe yatasva pṛthivyā sam bhava brahmavarcasam asi brahmavarcasāya tvā ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.