भूतेष्टका उप दधाति । अत्रात्र वै मृत्युर् जायते यत्रयत्रैव मृत्युर् जायते तत एवैनम् अव यजते तस्माद् अग्निचित् सर्वम् आयु एति सर्वे ह्य् अस्य मृत्यवो ऽवेष्टाः तस्माद् अग्निचिन् नाभिचरितवै प्रत्यग् एनम् अभिचारः स्तृणुते सूयते वा एष यो ऽग्निं चिनुते देवसुवाम् एतानि हवीꣳ षि भवन्ति । एतावन्तो वै देवानाꣳ सवाः त एव अस्मै सवान् प्र यच्छन्ति त एनꣳ सुवन्ते सवो ऽग्निर् वरुणसवो राजसूयम् ब्रह्मसवश् चित्यः । देवस्य त्वा सवितुः प्रसव इत्य् आह सवितृप्रसूत एवैनम् ब्रह्मणा देवताभिर् अभि षिञ्चति । अन्नस्यान्नस्याभि षिञ्चति । अन्नस्यान्नस्यावरुद्ध्यै पुरस्तात् प्रत्यञ्चम् अभि षिञ्चति पुरस्ताद् धि प्रतीचीनम् अन्नम् अद्यते शीर्षतो ऽभि षिञ्चति शीर्षतो ह्य् अन्नम् अद्यते । आ मुखाद् अन्ववस्रावयति ॥ मुखत एवास्मा अन्नाद्यं दधाति । अग्नेस् त्वा साम्राज्येनाभि षिञ्चामीत्य् आह । एष वा अग्नेः सवः तेनैवैनम् अभि षिञ्चति बृहस्पतेस् त्वा साम्राज्येनाभि षिञ्चामीत्य् आह ब्रह्म वै देवानाम् बृहस्पतिः । ब्रह्मणैवैनम् अभि षिञ्चति । इन्द्रस्य त्वा साम्राज्येनाभि षिञ्चामीत्य् आह । इन्द्रियम् एवास्मिन्न् उपरिष्टाद् दधाति । एतत् वै राजसूयस्य रूपम् । य एवं विद्वान् अग्निं चिनुत उभाव् एव लोकाव् अभि जयति यश् च राजसूयेनेजानस्य यश् चाग्निचितः । इन्द्रस्य सुषुवाणस्य दशधेन्द्रियं वीर्यम् परापतत् तद् देवाः सौत्रामण्या सम् अभरन् । सूयते वा एष यो ऽग्निं चिनुते । अग्निं चित्वा सौत्रामण्या यजेतेन्द्रियम् एव वीर्यꣳ सम्भृत्यात्मन् धत्ते ॥
bhūteṣṭakā upa dadhāti | atrātra vai mṛtyur jāyate yatrayatraiva mṛtyur jāyate tata evainam ava yajate tasmād agnicit sarvam āyu eti sarve hy asya mṛtyavo 'veṣṭāḥ tasmād agnicin nābhicaritavai pratyag enam abhicāraḥ stṛṇute sūyate vā eṣa yo 'gniṃ cinute devasuvām etāni havīm̐ ṣi bhavanti | etāvanto vai devānām̐ savāḥ ta eva asmai savān pra yacchanti ta enam̐ suvante savo 'gnir varuṇasavo rājasūyam brahmasavaś cityaḥ | devasya tvā savituḥ prasava ity āha savitṛprasūta evainam brahmaṇā devatābhir abhi ṣiñcati | annasyānnasyābhi ṣiñcati | annasyānnasyāvaruddhyai purastāt pratyañcam abhi ṣiñcati purastād dhi pratīcīnam annam adyate śīrṣato 'bhi ṣiñcati śīrṣato hy annam adyate | ā mukhād anvavasrāvayati || mukhata evāsmā annādyaṃ dadhāti | agnes tvā sāmrājyenābhi ṣiñcāmīty āha | eṣa vā agneḥ savaḥ tenaivainam abhi ṣiñcati bṛhaspates tvā sāmrājyenābhi ṣiñcāmīty āha brahma vai devānām bṛhaspatiḥ | brahmaṇaivainam abhi ṣiñcati | indrasya tvā sāmrājyenābhi ṣiñcāmīty āha | indriyam evāsminn upariṣṭād dadhāti | etat vai rājasūyasya rūpam | ya evaṃ vidvān agniṃ cinuta ubhāv eva lokāv abhi jayati yaś ca rājasūyenejānasya yaś cāgnicitaḥ | indrasya suṣuvāṇasya daśadhendriyaṃ vīryam parāpatat tad devāḥ sautrāmaṇyā sam abharan | sūyate vā eṣa yo 'gniṃ cinute | agniṃ citvā sautrāmaṇyā yajetendriyam eva vīryam̐ sambhṛtyātman dhatte ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.