तेभ्य उत्तरवेदिः सिꣳही रूपं कृत्वोभयान् अन्तरापक्रम्यातिष्ठत् ते देवा अमन्यन्त यन्तरान् वा इयम् उपावर्त्स्यति त इदम् भविष्यन्तीति ताम् उपामन्त्रयन्त साब्रवीद् वरं वृणै सर्वान् मया कामान् व्यश्नवथ पूर्वां तु माग्नेर् आहुतिर् अश्नवता इति तस्माद् उत्तरवेदिम् पूर्वाम् अग्नेर् व्याघारयन्ति वारेवृतꣳ ह्य् अस्यै शम्यया परि मिमीते मात्रैवास्यै साऽथो युक्तेनैव युक्तम् अव रुन्द्धे वित्तायनी मे ऽसीत्य् आह वित्ता ह्य् एनान् आवत् तिक्तायनी मे ऽसीत्य् आह तिक्तान् ह्य् एनान् आवत् अवतान् मा नाथितम् इत्य् आह नाथितान् ह्य् एनान् आवद् अवतान् मा व्यथितम् इत्य् आह व्यथितान् ह्य् एनान् आवद् विदेर् अग्निर् नभो नाम अग्ने अङ्गिर इति त्रिर् हरति य एवैषु लोकेष्व् अग्नयस् तान् एवाव रुन्द्धे तूष्णीं चतुर्थꣳ हरत्य् अनिरुक्तम् एवाव रुन्द्धे सिꣳहीर् असि महिषीर् असीत्य् आह सिꣳहीर् ह्य् एषा रूपं कृत्वोभयान् अन्तरापक्रम्यातिष्ठद् उरु प्रथस्वोरु ते यज्ञपतिः प्रथताम् इत्य् आह यजमानम् एव प्रजया पशुभिः प्रथयति ध्रुवा असीति सꣳ हन्ति धृत्यै देवेभ्यः शुन्धस्व देवेभ्यः शुम्भस्वेत्य् अव चोक्षति प्र च किरति शुद्ध्यै । इन्द्रघोषस् त्वा वसुभिः पुरस्तात् पात्व् इत्य् आह दिग्भ्य एवैनाम् प्रोक्षति देवाꣳश् चेद् उत्तरवेदिर् उपाववर्तीहैव वि जयामहा इत्य् असुरा वज्रम् उद्यत्य देवान् अभ्य् आयन्त तान् इन्द्रघोषो वसुभिः पुरस्ताद् अप अनुदत मनोजवाः पितृभिर् दक्षिणतः प्रचेता रुद्रैः पश्चाद् विश्वकर्मादित्यैर् उत्तरतो यद् एवम् उत्तरवेदिम् प्रोक्षति दिग्भ्य एव तद् यजमानो भ्रातृव्यान् प्रणुदत इन्द्रो यतीन्त् सालावृकेभ्यः प्रायच्छत् तान् दक्षिणत उत्तरवेद्या आदन् यत् प्रोक्षणीनाम् उच्छिष्येत तद् दक्षिणत उत्तरवेद्यै नि नयेद् यद् एव तत्र क्रूरं तत् तेन शमयति यं द्विष्यात् तं ध्यायेच् छुचैवैनम् अर्पयति ॥
tebhya uttaravediḥ sim̐hī rūpaṃ kṛtvobhayān antarāpakramyātiṣṭhat te devā amanyanta yantarān vā iyam upāvartsyati ta idam bhaviṣyantīti tām upāmantrayanta sābravīd varaṃ vṛṇai sarvān mayā kāmān vyaśnavatha pūrvāṃ tu māgner āhutir aśnavatā iti tasmād uttaravedim pūrvām agner vyāghārayanti vārevṛtam̐ hy asyai śamyayā pari mimīte mātraivāsyai sā'tho yuktenaiva yuktam ava runddhe vittāyanī me 'sīty āha vittā hy enān āvat tiktāyanī me 'sīty āha tiktān hy enān āvat avatān mā nāthitam ity āha nāthitān hy enān āvad avatān mā vyathitam ity āha vyathitān hy enān āvad vider agnir nabho nāma agne aṅgira iti trir harati ya evaiṣu lokeṣv agnayas tān evāva runddhe tūṣṇīṃ caturtham̐ haraty aniruktam evāva runddhe sim̐hīr asi mahiṣīr asīty āha sim̐hīr hy eṣā rūpaṃ kṛtvobhayān antarāpakramyātiṣṭhad uru prathasvoru te yajñapatiḥ prathatām ity āha yajamānam eva prajayā paśubhiḥ prathayati dhruvā asīti sam̐ hanti dhṛtyai devebhyaḥ śundhasva devebhyaḥ śumbhasvety ava cokṣati pra ca kirati śuddhyai | indraghoṣas tvā vasubhiḥ purastāt pātv ity āha digbhya evainām prokṣati devām̐ś ced uttaravedir upāvavartīhaiva vi jayāmahā ity asurā vajram udyatya devān abhy āyanta tān indraghoṣo vasubhiḥ purastād apa anudata manojavāḥ pitṛbhir dakṣiṇataḥ pracetā rudraiḥ paścād viśvakarmādityair uttarato yad evam uttaravedim prokṣati digbhya eva tad yajamāno bhrātṛvyān praṇudata indro yatīnt sālāvṛkebhyaḥ prāyacchat tān dakṣiṇata uttaravedyā ādan yat prokṣaṇīnām ucchiṣyeta tad dakṣiṇata uttaravedyai ni nayed yad eva tatra krūraṃ tat tena śamayati yaṃ dviṣyāt taṃ dhyāyec chucaivainam arpayati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.