देवा वा इन्द्रियं वीर्यं व्यभजन्त ततो यद् अत्यशिष्यत तद् अतिग्राह्या अभवन् तद् अतिग्राह्याणाम् अतिग्राह्यत्वम् । यद् अतिग्राह्या गृह्यन्त इन्द्रियम् एव तद् वीर्यं यजमान आत्मन् धत्ते तेज आग्नेयेनेन्द्रियम् ऐन्द्रेण ब्रह्मवर्चसꣳ सौर्येण । उपस्तम्भनं वा एतद् यज्ञस्य यद् अतिग्राह्याश् चक्रे पृष्ठानि यत् पृष्ठ्ये न गृह्णीयात् प्राञ्चं यज्ञम् पृष्ठानि सꣳ शृणीयुः । यद् उक्थ्ये गृह्णीयात् प्रत्यञ्चं यज्ञम् अतिग्राह्याः सꣳ शृणीयुः । विश्वजिति सर्वपृष्ठे ग्रहीतव्या यज्ञस्य सवीर्यत्वाय प्रजापतिर् देवेभ्यो यज्ञान् व्यादिशत् स प्रियास् तनूर् अप न्य् अधत्त तद् अतिग्राह्या अभवन् वितनुस् तस्य यज्ञ इत्य् आहुर् यस्यातिग्राह्या न गृह्यन्त इति । अप्य् अग्निष्टोमे ग्रहीतव्या यज्ञस्य सतनुत्वाय देवता वै सर्वाः सदृशीर् आसन् ता न व्यावृतम् अगच्छन् ते देवाः एत एतान् ग्रहान् अपश्यन् तान् अगृह्णत । आग्नेयम् अग्निर् ऐन्द्रम् इन्द्रः सौर्यꣳ सूर्यस् ततो वै ते ऽन्याभिर् देवताभिर् व्यावृतम् अगच्छन् यस्यैवं विदुष एते ग्रहा गृह्यन्ते व्यावृतम् एव पाप्मना भ्रातृव्येण गच्छति । इमे लोका ज्योतिष्मन्तः समावद्वीर्याः कार्या इत्य् आहुः । आग्नेयेनास्मिम्̐ लोके ज्योतिर् धत्त ऐन्द्रेणान्तरिक्षे । इन्द्रवायू हि सयुजौ सौर्येणामुष्मिम्̐ लोके ज्योतिर् धत्ते ज्योतिष्मन्तो ऽस्मा इमे लोका भवन्ति समावद्वीर्यान् एनान् कुरुते । एतान् वै ग्रहान् बम्बाविश्ववयसाव् अवित्ताम् । ताभ्याम् इमे लोकाः पराञ्चश् चार्वाञ्चश् च प्राभुः । यस्यैवं विदुष एते ग्रहा गृह्यन्ते प्रास्मा इमे लोकाः पराञ्चश् चार्वाञ्चश् च भान्ति ॥
devā vā indriyaṃ vīryaṃ vyabhajanta tato yad atyaśiṣyata tad atigrāhyā abhavan tad atigrāhyāṇām atigrāhyatvam | yad atigrāhyā gṛhyanta indriyam eva tad vīryaṃ yajamāna ātman dhatte teja āgneyenendriyam aindreṇa brahmavarcasam̐ sauryeṇa | upastambhanaṃ vā etad yajñasya yad atigrāhyāś cakre pṛṣṭhāni yat pṛṣṭhye na gṛhṇīyāt prāñcaṃ yajñam pṛṣṭhāni sam̐ śṛṇīyuḥ | yad ukthye gṛhṇīyāt pratyañcaṃ yajñam atigrāhyāḥ sam̐ śṛṇīyuḥ | viśvajiti sarvapṛṣṭhe grahītavyā yajñasya savīryatvāya prajāpatir devebhyo yajñān vyādiśat sa priyās tanūr apa ny adhatta tad atigrāhyā abhavan vitanus tasya yajña ity āhur yasyātigrāhyā na gṛhyanta iti | apy agniṣṭome grahītavyā yajñasya satanutvāya devatā vai sarvāḥ sadṛśīr āsan tā na vyāvṛtam agacchan te devāḥ eta etān grahān apaśyan tān agṛhṇata | āgneyam agnir aindram indraḥ sauryam̐ sūryas tato vai te 'nyābhir devatābhir vyāvṛtam agacchan yasyaivaṃ viduṣa ete grahā gṛhyante vyāvṛtam eva pāpmanā bhrātṛvyeṇa gacchati | ime lokā jyotiṣmantaḥ samāvadvīryāḥ kāryā ity āhuḥ | āgneyenāsmim̐ loke jyotir dhatta aindreṇāntarikṣe | indravāyū hi sayujau sauryeṇāmuṣmim̐ loke jyotir dhatte jyotiṣmanto 'smā ime lokā bhavanti samāvadvīryān enān kurute | etān vai grahān bambāviśvavayasāv avittām | tābhyām ime lokāḥ parāñcaś cārvāñcaś ca prābhuḥ | yasyaivaṃ viduṣa ete grahā gṛhyante prāsmā ime lokāḥ parāñcaś cārvāñcaś ca bhānti ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.