ब्रह्मवादिनो वदन्ति स त्वै यजेत यो ऽग्निष्टोमेन यजमानो ऽथ सर्वस्तोमेन यजेतेति यस्य त्रिवृतम् अन्तर्यन्ति प्राणाꣳस् तस्यान्तर्यन्ति प्राणेषु मे ऽप्य् असद् इति खलु वै यज्ञेन यजमानो यजते यस्य पञ्चदशम् अन्तर्यन्ति वीर्यं तस्यान्तर् यन्ति वीर्ये मे ऽप्य् असद् इति खलु वै यज्ञेन यजमानो यजते यस्य सप्तदशम् अन्तर्यन्ति प्रजां तस्यान्तर् यन्ति प्रजायाम् मे ऽप्य् असद् इति खलु वै यज्ञेन यजमानो यजते यस्यैकविꣳशम् अन्तर्यन्ति प्रतिष्ठां तस्यान्तर् यन्ति प्रतिष्ठायाम् मे ऽप्य् असद् इति खलु वै यज्ञेन यजमानो यजते यस्य त्रिणवम् अन्तर्यन्त्य् ऋतूꣳश् च तस्य नक्षत्रियां च विराजम् अन्तर् यन्ति । ऋतुषु मे ऽप्य् असन् नक्षत्रियायां च विराजीति खलु वै यज्ञेन यजमानो यजते यस्य त्रयस्त्रिꣳशम् अन्तर्यन्ति देवतास् तस्यान्तर् यन्ति देवतासु मे ऽप्य् असद् इति खलु वै यज्ञेन यजमानो यजते यो वै स्तोमानाम् अवमम् परमतां गच्छन्तं वेद परमताम् एव गच्छति त्रिवृद् वै स्तोमानाम् अवमस् त्रिवृत् परमस् य एवं वेद परमताम् एव गच्छति ॥
brahmavādino vadanti sa tvai yajeta yo 'gniṣṭomena yajamāno 'tha sarvastomena yajeteti yasya trivṛtam antaryanti prāṇām̐s tasyāntaryanti prāṇeṣu me 'py asad iti khalu vai yajñena yajamāno yajate yasya pañcadaśam antaryanti vīryaṃ tasyāntar yanti vīrye me 'py asad iti khalu vai yajñena yajamāno yajate yasya saptadaśam antaryanti prajāṃ tasyāntar yanti prajāyām me 'py asad iti khalu vai yajñena yajamāno yajate yasyaikavim̐śam antaryanti pratiṣṭhāṃ tasyāntar yanti pratiṣṭhāyām me 'py asad iti khalu vai yajñena yajamāno yajate yasya triṇavam antaryanty ṛtūm̐ś ca tasya nakṣatriyāṃ ca virājam antar yanti | ṛtuṣu me 'py asan nakṣatriyāyāṃ ca virājīti khalu vai yajñena yajamāno yajate yasya trayastrim̐śam antaryanti devatās tasyāntar yanti devatāsu me 'py asad iti khalu vai yajñena yajamāno yajate yo vai stomānām avamam paramatāṃ gacchantaṃ veda paramatām eva gacchati trivṛd vai stomānām avamas trivṛt paramas ya evaṃ veda paramatām eva gacchati ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.