साध्या वै देवाः सुवर्गकामा एतꣳ षड्रात्रम् अपश्यन् तम् आहरन् तेनायजन्त ततो वै ते सुवर्गं लोकम् आयन् य एवं विद्वाꣳसः षड्रात्रम् आसते सुवर्गम् एव लोकं यन्ति देवसत्त्रं वै षड्रात्रः प्रत्यक्षꣳ ह्य् एतानि पृष्ठानि य एवं विद्वाꣳसः षड्रात्रम् आसते साक्षाद् एव देवता अभ्यारोहन्ति षड्रात्रो भवति षड् वा ऋतवः षट् पृष्ठानि पृष्ठैर् एवर्तून् अन्वारोहन्त्य् ऋतुभिः संवत्सरम् । ते संवत्सर एव प्रति तिष्ठन्ति बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति त्रिवृद् अग्निष्टोमो भवति तेज एवाव रुन्धते पञ्चदशो भवति । इन्द्रियम् एवाव रुन्धते सप्तदशः भवति । अन्नाद्यस्यावरुद्ध्यै । अथो प्रैव तेन जायन्ते । एकविꣳशो भवति प्रतिष्ठित्यै । अथो रुचम् एवात्मन् दधते त्रिणवो भवति विजित्यै त्रयस्त्रिꣳशो भवति प्रतिष्ठित्यै सदोहविर्धानिन एतेन षड्रात्रेण यजेरन् । आश्वत्थी हविर्धानं चाग्नीध्रं च भवतस् तद् धि सुवर्ग्यम् । चक्रीवती भवतः सुवर्गस्य लोकस्य समष्ट्यै । उलूखलबुध्नो यूपो भवति प्रतिष्ठित्यै प्राञ्चो यान्ति प्राङ् इव हि सुवर्गः लोकः सरस्वत्या यान्ति । एष वै देवयानः पन्थास् तम् एवान्वारोहन्ति । आक्रोशन्तो यान्ति । अवर्तिम् एवान्यस्मिन् प्रतिषज्य प्रतिष्ठां गच्छन्ति यदा दश शतं कुर्वन्त्य् अथैकम् उत्थानम् । शतायुः पुरुषः शतेन्द्रियः । आयुष्य् एवेन्द्रिये प्रति तिष्ठन्ति यदा शतꣳ सहस्रं कुर्वन्त्य् अथैकम् उत्थानम् । सहस्रसम्मितो वा असौ लोकः । अमुम् एव लोकम् अभि जयन्ति यदैषाम् प्रमीयेत यदा वा जीयेरन्न् अथैकम् उत्थानम् । तद् धि तीर्थम् ॥
sādhyā vai devāḥ suvargakāmā etam̐ ṣaḍrātram apaśyan tam āharan tenāyajanta tato vai te suvargaṃ lokam āyan ya evaṃ vidvām̐saḥ ṣaḍrātram āsate suvargam eva lokaṃ yanti devasattraṃ vai ṣaḍrātraḥ pratyakṣam̐ hy etāni pṛṣṭhāni ya evaṃ vidvām̐saḥ ṣaḍrātram āsate sākṣād eva devatā abhyārohanti ṣaḍrātro bhavati ṣaḍ vā ṛtavaḥ ṣaṭ pṛṣṭhāni pṛṣṭhair evartūn anvārohanty ṛtubhiḥ saṃvatsaram | te saṃvatsara eva prati tiṣṭhanti bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti trivṛd agniṣṭomo bhavati teja evāva rundhate pañcadaśo bhavati | indriyam evāva rundhate saptadaśaḥ bhavati | annādyasyāvaruddhyai | atho praiva tena jāyante | ekavim̐śo bhavati pratiṣṭhityai | atho rucam evātman dadhate triṇavo bhavati vijityai trayastrim̐śo bhavati pratiṣṭhityai sadohavirdhānina etena ṣaḍrātreṇa yajeran | āśvatthī havirdhānaṃ cāgnīdhraṃ ca bhavatas tad dhi suvargyam | cakrīvatī bhavataḥ suvargasya lokasya samaṣṭyai | ulūkhalabudhno yūpo bhavati pratiṣṭhityai prāñco yānti prāṅ iva hi suvargaḥ lokaḥ sarasvatyā yānti | eṣa vai devayānaḥ panthās tam evānvārohanti | ākrośanto yānti | avartim evānyasmin pratiṣajya pratiṣṭhāṃ gacchanti yadā daśa śataṃ kurvanty athaikam utthānam | śatāyuḥ puruṣaḥ śatendriyaḥ | āyuṣy evendriye prati tiṣṭhanti yadā śatam̐ sahasraṃ kurvanty athaikam utthānam | sahasrasammito vā asau lokaḥ | amum eva lokam abhi jayanti yadaiṣām pramīyeta yadā vā jīyerann athaikam utthānam | tad dhi tīrtham ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.