प्रजवं वा एतेन यन्ति यद् दशमम् अहर् । पापावहीयं वा एतेन भवन्ति यद् दशमम् अहर् यो वै प्रजवं यताम् अपथेन प्रतिपद्यते य स्थाणुꣳ हन्ति यो भ्रेषं न्येति स हीयते स यो वै दशमे ऽहन्न् अविवाक्य उपहन्यते स हीयते तस्मै य उपहताय व्याह तम् एवान्वारभ्य सम् अश्नुते । अथ यो व्याह सः हीयते तस्माद् दशमे ऽहन्न् अविवाक्य उपहताय न व्युच्यम् अथो खल्व् आहुर् यज्ञस्य वै समृद्धेन देवाः सुवर्गं लोकम् आयन् यज्ञस्य व्यृद्धेनासुरान् पराऽभावयन्न् इति यत् खलु वै यज्ञस्य समृद्धं तद् यजमानस्य यद् व्यृद्धं तद् भ्रातृव्यस्य स यो वै दशमे ऽहन्न् अविवाक्य उपहन्यते स एवाति रेचयति ते ये बाह्या दृशीकवः स्युस् ते वि ब्रूयुः । यदि तत्र न विन्देयुर् अन्तःसदसाद् व्युच्यम् । तद् व्युच्यम् एव । अथ वा एतत् सर्पराज्ञिया ऋग्भिः स्तुवन्ति । इयं वै सर्पतो राज्ञी यद् वा अस्यां किं चार्चन्ति यद् आनृचुस् तेनेयꣳ सर्पराज्ञी ते यद् एव किं च वाचाऽऽनृचुर् यद् अतो ऽध्य् अर्चितारः तद् उभयम् आप्त्वाऽवरुध्योत् तिष्ठामेति ताभिर् मनसा स्तुवते न वा इमाम् अश्वरथो नाश्वतरीरथः सद्यः पर्याप्तुम् अर्हति मनो वा इमाꣳ सद्यः पर्याप्तुम् अर्हति मनः परिभवितुम् अथ ब्रह्म वदन्ति परिमिता वा ऋचः परिमितानि सामानि परिमितानि यजूꣳष्य् अथैतस्यैवान्तो नास्ति यद् ब्रह्म तत् प्रतिगृणत आ चक्षीत स प्रतिगरः ॥
prajavaṃ vā etena yanti yad daśamam ahar | pāpāvahīyaṃ vā etena bhavanti yad daśamam ahar yo vai prajavaṃ yatām apathena pratipadyate ya sthāṇum̐ hanti yo bhreṣaṃ nyeti sa hīyate sa yo vai daśame 'hann avivākya upahanyate sa hīyate tasmai ya upahatāya vyāha tam evānvārabhya sam aśnute | atha yo vyāha saḥ hīyate tasmād daśame 'hann avivākya upahatāya na vyucyam atho khalv āhur yajñasya vai samṛddhena devāḥ suvargaṃ lokam āyan yajñasya vyṛddhenāsurān parā'bhāvayann iti yat khalu vai yajñasya samṛddhaṃ tad yajamānasya yad vyṛddhaṃ tad bhrātṛvyasya sa yo vai daśame 'hann avivākya upahanyate sa evāti recayati te ye bāhyā dṛśīkavaḥ syus te vi brūyuḥ | yadi tatra na vindeyur antaḥsadasād vyucyam | tad vyucyam eva | atha vā etat sarparājñiyā ṛgbhiḥ stuvanti | iyaṃ vai sarpato rājñī yad vā asyāṃ kiṃ cārcanti yad ānṛcus teneyam̐ sarparājñī te yad eva kiṃ ca vācā''nṛcur yad ato 'dhy arcitāraḥ tad ubhayam āptvā'varudhyot tiṣṭhāmeti tābhir manasā stuvate na vā imām aśvaratho nāśvatarīrathaḥ sadyaḥ paryāptum arhati mano vā imām̐ sadyaḥ paryāptum arhati manaḥ paribhavitum atha brahma vadanti parimitā vā ṛcaḥ parimitāni sāmāni parimitāni yajūm̐ṣy athaitasyaivānto nāsti yad brahma tat pratigṛṇata ā cakṣīta sa pratigaraḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.