अम्बे अम्बाल्य् अम्बिके न मा नयति कश् चन । ससस्त्य् अश्वकः । सुभगे काम्पीलवासिनि सुवर्गे लोके सम् प्रोर्ण्वाथाम् । आहम् अजानि गर्भधम् आ त्वम् अजासि गर्भधम् । तौ सह चतुरः पदः सम् प्र सारयावहै । वृषा वाꣳ रेतोधा रेतो दधातु । उत् सक्थ्योर् गृदं धेह्य् अञ्जिम् उदञ्जिम्म् अन्व् अज । य स्त्रीणां जीवभोजनो य आसाम् बिलधावनः । प्रिय स्त्रीणाम् अपीच्यः । य आसां कृष्णे लक्ष्मणि सर्दिगृदिम् परावधीत् । अम्बे अम्बाल्य् अम्बिके न मा यभति कश् चन । ससस्त्य् अश्वकः । ऊर्ध्वाम् एनाम् उच् छ्रयताद् वेणुभारं गिराव् इव । अथास्या मध्यम् एधताꣳ शीते वाते पुनन्न् इव । अम्बे अम्बाल्य् अम्बिके न मा यभति कश् चन । ससस्त्य् अश्वकः । यद् धरिणी यवम् अत्ति न पुष्टम् पशु मन्यते । शूद्रा यद् अर्यजारा न पोषाय धनायति । अम्बे अम्बाल्य् अम्बिके न मा यभति कश् चन । ससस्त्य् अश्वकः । इयं यका शकुन्तिकाऽऽहलम् इति सर्पति । आहतं गभे पसो नि जल्गुलीति धाणिका । अम्बे अम्बाल्य् अम्बिके न मा यभति कश् चन । ससस्त्य् अश्वकः । माता च ते पिता च ते ऽग्रं वृक्षस्य रोहतः । प्र सुलामीति ते पिता गभे मुष्टिम् अतꣳसयत् । दधिक्राव्णो अकारिषं जिष्णोर् अश्वस्य वाजिनः । सुरभि नो मुखा करत् प्र ण आयूꣳषि तारिषत् । आपो हि ष्ठा मयोभुवस् ता न ऊर्जे दधातन । महे रणाय चक्षसे ॥ यो वः शिवतमो रसस् तस्य भाजयतेह नः । उशतीर् इव मातरः ॥ तस्मा अरं गमाम वो यस्य क्षयाय जिन्वथ । आपो जनयथा च नः ॥
ambe ambāly ambike na mā nayati kaś cana | sasasty aśvakaḥ | subhage kāmpīlavāsini suvarge loke sam prorṇvāthām | āham ajāni garbhadham ā tvam ajāsi garbhadham | tau saha caturaḥ padaḥ sam pra sārayāvahai | vṛṣā vām̐ retodhā reto dadhātu | ut sakthyor gṛdaṃ dhehy añjim udañjimm anv aja | ya strīṇāṃ jīvabhojano ya āsām biladhāvanaḥ | priya strīṇām apīcyaḥ | ya āsāṃ kṛṣṇe lakṣmaṇi sardigṛdim parāvadhīt | ambe ambāly ambike na mā yabhati kaś cana | sasasty aśvakaḥ | ūrdhvām enām uc chrayatād veṇubhāraṃ girāv iva | athāsyā madhyam edhatām̐ śīte vāte punann iva | ambe ambāly ambike na mā yabhati kaś cana | sasasty aśvakaḥ | yad dhariṇī yavam atti na puṣṭam paśu manyate | śūdrā yad aryajārā na poṣāya dhanāyati | ambe ambāly ambike na mā yabhati kaś cana | sasasty aśvakaḥ | iyaṃ yakā śakuntikā''halam iti sarpati | āhataṃ gabhe paso ni jalgulīti dhāṇikā | ambe ambāly ambike na mā yabhati kaś cana | sasasty aśvakaḥ | mātā ca te pitā ca te 'graṃ vṛkṣasya rohataḥ | pra sulāmīti te pitā gabhe muṣṭim atam̐sayat | dadhikrāvṇo akāriṣaṃ jiṣṇor aśvasya vājinaḥ | surabhi no mukhā karat pra ṇa āyūm̐ṣi tāriṣat | āpo hi ṣṭhā mayobhuvas tā na ūrje dadhātana | mahe raṇāya cakṣase || yo vaḥ śivatamo rasas tasya bhājayateha naḥ | uśatīr iva mātaraḥ || tasmā araṃ gamāma vo yasya kṣayāya jinvatha | āpo janayathā ca naḥ ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.