यथा वै मनुष्या एवं देवा अग्र आसन् ते ऽकामयन्त । अवर्तिम् पाप्मानम् मृत्युम् अपहत्य दैवीꣳ सꣳसदं गच्छेमेति त एतं चतुर्विꣳशतिरात्रम् अपश्यन् तम् आहरन् तेनायजन्त ततो वै ते ऽवर्तिम् पाप्मानम् मृत्युम् अपहत्य दैवीꣳ सꣳसदम् अगच्छन् य एवं विद्वाꣳसश् चतुर्विꣳशतिरात्रम् आसते ऽवर्तिम् एव पाप्मानम् अपहत्य श्रियं गच्छन्ति श्रीर् हि मनुष्यस्य दैवी सꣳसद् । ज्योतिर् अतिरात्रो भवति सुवर्गस्य लोकस्यानुख्यात्यै पृष्ठ्यः षडहो भवति षड् वा ऋतवः संवत्सरस् तम् मासा अर्धमासा ऋतवः प्रविश्य दैवीꣳ सꣳसदम् अगच्छन् य एवं विद्वाꣳसश् चतुर्विꣳशतिरात्रम् आसते संवत्सरम् एव प्रविश्य वस्यसीꣳ सꣳसदं गच्छन्ति त्रयस् त्रयस्त्रिꣳशा अवस्ताद् भवन्ति त्रयस् त्रयस्त्रिꣳशाः परस्तात् त्रयस्त्रिꣳशैर् एवोभवयतो ऽवर्तिम् पाप्मानम् अपहत्य दैवीꣳ सꣳसदम् मध्यतः गच्छन्ति पृष्ठानि हि दैवी सꣳसद् । जामि वा एतत् कुर्वन्ति यत् त्रयस् त्रयस्त्रिꣳशा अन्वञ्चः । मध्ये ऽनिरुक्तो भवति तेनाजामि । ऊर्ध्वानि पृष्ठानि भवन्त्य् ऊर्ध्वाश् छन्दोमाः । उभाभ्याꣳ रूपाभ्याꣳ सुवर्गं लोकं यन्ति । असत्त्रं वा एतद् यद् अच्छन्दोमम् । यच् छन्दोमा भवन्ति तेन सत्त्रम् । देवता एव पृष्ठैर् अव रुन्धते पशूञ् छन्दोमैः । ओजो वै वीर्यम् पृष्ठानि पशवः छन्दोमाः । ओजस्य् एव वीर्ये पशुषु प्रति तिष्ठन्ति त्रयस् त्रयस्त्रिꣳशा अवस्ताद् भवन्ति त्रयस् त्रयस्त्रिꣳशाः परस्तान् मध्ये पृष्ठानि । उरो वै त्रयस्त्रिꣳशा आत्मा पृष्ठानि । आत्मन एव तद् यजमानाः शर्म नह्यन्ते ऽनार्त्यै बृहद्रथंतराभ्यां यन्ति । इयं वाव रथंतरम् असौ बृहत् । आभ्याम् एव यन्ति । अथो अनयोर् एव प्रति तिष्ठन्ति । एते वै यज्ञस्याञ्जसायनी स्रुती ताभ्याम् एव सुवर्गं लोकं यन्ति पराञ्चो वा एते सुवर्गं लोकम् अभ्यारोहन्ति ये पराचीनानि पृष्ठान्य् उपयन्ति प्रत्यङ् षडहो भवति प्रत्यवरूढ्या अथो प्रतिष्ठित्यै । उभयोर् लोकयोर् ऋद्ध्वोत् तिष्ठन्ति त्रिवृतो ऽधि त्रिवृतम् उप यन्ति स्तोमानाꣳ सम्पत्त्यै प्रभवाय ज्योतिर् अग्निष्टोमो भवति । अयं वाव स क्षयः । अस्माद् एव तेन क्षयान् न यन्ति चतुर्विꣳशतिरात्रो भवति चतुर्विꣳशतिर् अर्धमासाः संवत्सरः संवत्सरः सुवर्गो लोकः संवत्सर एव सुवर्गे लोके प्रति तिष्ठन्ति । अथो चतुर्विꣳशत्यक्षरा गायत्री गायत्री ब्रह्मवर्चसम् । गायत्रियैव ब्रह्मवर्चसम् अव रुन्धते । अतिरात्राव् अभितो भवतः । ब्रह्मवर्चसस्य परिगृहीत्यै ॥
yathā vai manuṣyā evaṃ devā agra āsan te 'kāmayanta | avartim pāpmānam mṛtyum apahatya daivīm̐ sam̐sadaṃ gacchemeti ta etaṃ caturvim̐śatirātram apaśyan tam āharan tenāyajanta tato vai te 'vartim pāpmānam mṛtyum apahatya daivīm̐ sam̐sadam agacchan ya evaṃ vidvām̐saś caturvim̐śatirātram āsate 'vartim eva pāpmānam apahatya śriyaṃ gacchanti śrīr hi manuṣyasya daivī sam̐sad | jyotir atirātro bhavati suvargasya lokasyānukhyātyai pṛṣṭhyaḥ ṣaḍaho bhavati ṣaḍ vā ṛtavaḥ saṃvatsaras tam māsā ardhamāsā ṛtavaḥ praviśya daivīm̐ sam̐sadam agacchan ya evaṃ vidvām̐saś caturvim̐śatirātram āsate saṃvatsaram eva praviśya vasyasīm̐ sam̐sadaṃ gacchanti trayas trayastrim̐śā avastād bhavanti trayas trayastrim̐śāḥ parastāt trayastrim̐śair evobhavayato 'vartim pāpmānam apahatya daivīm̐ sam̐sadam madhyataḥ gacchanti pṛṣṭhāni hi daivī sam̐sad | jāmi vā etat kurvanti yat trayas trayastrim̐śā anvañcaḥ | madhye 'nirukto bhavati tenājāmi | ūrdhvāni pṛṣṭhāni bhavanty ūrdhvāś chandomāḥ | ubhābhyām̐ rūpābhyām̐ suvargaṃ lokaṃ yanti | asattraṃ vā etad yad acchandomam | yac chandomā bhavanti tena sattram | devatā eva pṛṣṭhair ava rundhate paśūñ chandomaiḥ | ojo vai vīryam pṛṣṭhāni paśavaḥ chandomāḥ | ojasy eva vīrye paśuṣu prati tiṣṭhanti trayas trayastrim̐śā avastād bhavanti trayas trayastrim̐śāḥ parastān madhye pṛṣṭhāni | uro vai trayastrim̐śā ātmā pṛṣṭhāni | ātmana eva tad yajamānāḥ śarma nahyante 'nārtyai bṛhadrathaṃtarābhyāṃ yanti | iyaṃ vāva rathaṃtaram asau bṛhat | ābhyām eva yanti | atho anayor eva prati tiṣṭhanti | ete vai yajñasyāñjasāyanī srutī tābhyām eva suvargaṃ lokaṃ yanti parāñco vā ete suvargaṃ lokam abhyārohanti ye parācīnāni pṛṣṭhāny upayanti pratyaṅ ṣaḍaho bhavati pratyavarūḍhyā atho pratiṣṭhityai | ubhayor lokayor ṛddhvot tiṣṭhanti trivṛto 'dhi trivṛtam upa yanti stomānām̐ sampattyai prabhavāya jyotir agniṣṭomo bhavati | ayaṃ vāva sa kṣayaḥ | asmād eva tena kṣayān na yanti caturvim̐śatirātro bhavati caturvim̐śatir ardhamāsāḥ saṃvatsaraḥ saṃvatsaraḥ suvargo lokaḥ saṃvatsara eva suvarge loke prati tiṣṭhanti | atho caturvim̐śatyakṣarā gāyatrī gāyatrī brahmavarcasam | gāyatriyaiva brahmavarcasam ava rundhate | atirātrāv abhito bhavataḥ | brahmavarcasasya parigṛhītyai ||
Roman (IAST) transliteration rendered by HREEM from the edition's Devanagari; the Devanagari is the edition's own.
Sanskrit only: no published translation is held for this verse.